ورتالىق كوممۋنيكاسيالار قىزمەتى الاڭىندا حالىقارالىق «ەكسپو-2017» كورمەسى اياسىندا جامبى اتۋ بويىنشا «التىن جەبە» حالىقارالىق ءتۋرنيرىن وتكىزۋگە ارنالعان باسپا ءسوز كونفەرەنسياسى ۇيىمداستىرىلدى دەپ حابارلايدى Qamshy.kz اقپارات اگەنتتىگى. شارانىڭ ۇيىمداستىرۋشىلارى: ق ر مادەنيەت جانە سپورت مينيسترلىگى، ق ر «ۇلتتىق سپورت تۇرلەرى قاۋىمداستىعى» جانە «تۇركى حالىقتارىنىڭ ءداستۇرلى سپورت تۇرلەرى قاۋىمداستىعى». الەۋمەتتىك سەرىكتەس - «Samruk-Kazyna Trust» الەۋمەتتىك جوبالاردى دامىتۋ قورى.

جارىسقا الەمنىڭ 25 ەلىنەن 50 جۋىق قاتىسۋشى كەلەدى. ءبىزدىڭ ەلدەن «التىن جەبەدە» بەس سپورتشى ب ا ق سىناماق.  ولار: جامبى اتۋدان قازاقستان رەسپۋبليكاسى چەمپيوناتىنىڭ بىرنەشە دۇركىن جۇلدەگەرى، 2016 جىلعى «ۇلى دالا ويىندارى» فەستيۆالىنىڭ جەڭىمپازى اتانعان ەلدوس باداشيەۆ جانە ەلىشىلىك چەمپيوناتتا توپ جارىپ جۇرگەن ساڭلاقتارىمىز سارىباي ايتبەك، ايكوز ەرالحان، تۋلىبايەۆ ابزال، ۇزدەنبايەۆ بەكقالي.

ق ر «ۇلتتىق سپورت تۇرلەرى قاۋىمداستىعى» پرەزيدەنتى بەكبولات تىلەۋحاننىڭ ايتۋىنشا، ەشكىم جۇلدەسىز قايتپايدى، جۇلدە قورى قوماقتى، بەس ورىنعا دەيىن بايگە بار.  ۇلتتىق ساداق اتۋدان الەمگە اتى ايگىلى كاششاي لايوش سىندى مەرگەنى بار ماجارستاننان چەمەز فاركاس باپتاعان ۆەنگر سۇر مەرگەنى نامەتي كريستوف العاش رەت جامبى سايىسىندا ب ا ق سىناماق. وزدەرىن تۇركى جۇرتىنىڭ ءبىر بۇتاعى ساناپ، ەجەلگى قىپشاق ۇرپاعىمىز دەيتىن ماجارستان حالقى ات ۇستىنەن ساداق اتۋ ءداستۇرىن ۇزاق جىلدان بەرى ناسيحاتتاۋمەن كەلەدى. ۆەنگريادا ەۋروپا كولەمىندەگى ءداستۇرلى ساداق اتۋ جارىستارى ءجيى ۇيىمداستىرىلادى. قازىرگى كەزدە ءبۇتىن ەۋروپاعا ماديار ساداقشىلارىنىڭ مەرگەندىك داڭقى مول جايىلعان. «التىن جەبە» تۋرنيرىنە كەلەتىن نامەتي كريستوف سول كوپ مەرگەننىڭ ىشىندەگى ۇزدىكتەردىڭ ءبىرى، – دەدى ول.

ق ر سپورت جانە دەنە شىنىقتىرۋ ىستەرى كوميتەتى ءتوراعاسى ەلسيار قاناعاتوۆ، قازاقستان رەسپۋبليكاسى مادەنيەت جانە سپورت مينيسترلىگى بۇگىنگى كۇنى ۇلتتىق سپورتتى ۇلىقتاۋعا اسا ۇلكەن كوڭىل ءبولىپ وتىر، وعان دالەل «التىن جەبە» سايىسى. بۇل سايىستىڭ ءجونى بولەك، سەبەبى قازاق جەرىندە «التىن جەبە» ءتۋرنيرى تۇڭعىش ۇيىمداستىرىلىپ وتىر، – دەدى ەلسيار بايمۇحامەد ۇلى.

ۇلتتىق ساداقتارىن ۇلىقتاپ، ساداق اتۋدىڭ حالىقارالىق سايىسىن ەڭ ءجيى ۇيىمداستىراتىن ەلدىڭ ءبىرى – تۇركيا. بۇل ەلدەن اتاعى جەر جارعان باپكەر ليەۆەنت تالحا مەن شاكىرتى مۇرات بونجۋك كەلمەكشى. سونداي-اق، مالايزيادان احما داكالان، پولشادان رادوسلاۆ كوزۋچ، رۋمىنيادان Mihai Cozmei، فينليانديادان Anna Kataviina Aibvecht، كاتاردان Walid Khawajkyc، گەرمانيادان Giulia Josefine Salts سىندى كوزدەگەنىن ءمۇلت جىبەرمەس قولمەرگەن ساداقشىلار ەلورداعا ات باسىن تىرەيدى.  سونىمەن قاتار، ىرگەدەگى كورشىلەرىمىز قىرعىزستان، وزبەكستان، موڭعوليا، رەسەي، جۇڭگو ەلدەرىنىڭ مەرگەندەرى دە جامبى اتۋدان تۇڭعىش وتەتىن حالىقارالىق جارىستان تىس قالماقشى ەمەس.