سوڭعى ۋاقىتتاردا ينتەرنەت ارقىلى ەلىمىزدە ۋاعىز ايتاتىن يمام-ۇستازداردان كىمدەردىڭ ۋاعىز-ناسيحاتىن تىڭداۋعا بولادى دەگەن مازمۇندا تىزىمدەلىپ جاسالعان ءتۇرلى ۆيدەولار تارالىپ جاتىر. اتالمىش ۆيدەولاردا ەلىمىزدەگى ءبىرشاما يمام-ۇستازداردىڭ ەسىمى مەن سۋرەتىن كورسەتىپ، وسى كىسىلەردەن ءدىني باعىتتا ءبىلىم ۇيرەنىپ، ۋاعىز-ناسيحاتتارىن تىڭداۋعا بولادى دەلىنگەن. الايدا بەلگىلى بولعانداي، قمدب بۇل تىزىمدەردەن بەيحابار بولىپ شىقتى جانە دە مۇنداي اقپاراتتاردى رۇقساتسىز تاراتۋ – مۇسىلماندىق ادەپكە جات دەپ توپشىلايدى، دەپ حابارلايدى Qamshy.kz اقپارات اگەنتتىگى قمدب رەسمي سايتىنا سىلتەمە جاساي وتىرىپ.

"سوڭعى كەزدەرى الەۋمەتتىك جەلىلەر ارقىلى ەلىمىزدە ۋاعىز-ناسيحات ايتۋىنا رۇقسات ەتىلگەن ءدىن ماماندارىنىڭ ءتىزىمى تارالۋدا. بۇل ءتىزىمدى قازاقستان مۇسىلماندارى ءدىني باسقارماسى جاساماعانىن ەسكەرتەمىز!" – دەلىنگەن حابارلامادا.

تىزىمدە قمدب-عا قاراستى يمامدار مەن عالىمداردان بولەك ءدىني ءبىلىمى جوق تىلشىلەر مەن قوعام قايراتكەرلەرىنىڭ دە ەسىمدەرى جازىلعان. ءتىپتى، ءدىني ءبىلىمدى قايدان العانى بەلگىسىز ادامداردىڭ دا ءاتى-جونى كورسەتىلگەن.

«قمدب مۋفتيات ۇستازدار ءتىزىمى! قازاقستاندا ۋاعىزدارىن تىڭداۋعا رۇقسات ەتىلگەن (كمدب)نىڭ احلي سۋننا ۇستازدارى»، – دەپ باستالاتىن (ءماتىن سول قالپىندا بەرىلدى) جازبانى قازاقستان مۇسىلماندارى ءدىني باسقارماسىنىڭ ىشكى جۇمىستارىنان حابارى جوق ادامنىڭ جازعانى بايقالادى. ءدىني باسقارمانىڭ رەسمي رۇقساتىنسىز جازىلعان اقپاراتتىق ءتىزىم جاماعات اراسىندا تۇسىنبەۋشىلىك تۋدىرۋى مۇمكىن. وسى رەتتە ۋاعىزشىلار ءتىزىمىن جازعان تۇلعانىڭ بۇل ارەكەتى مۇسىلماندىق ادەپكە جات ەكەنىن جەتكىزەمىز.

قمدب ماماندارى بۇل سۇراق توڭىرەگىندە كەز كەلگەن ازاماتتىڭ ساۋالىنا جاۋاپ بەرەدى. قمدب ەل ازاماتتارىنان ءمۇفتياتقا قاتىستى اقپارات تاراتپاۋدى تالاپ ەتەدى»، – دەپ جازىلعان قمدب رەسمي سايتىنداعى حابارلامادا.