پرەزيدەنت نازاربايەۆ بيىلعى حالىققا جولداۋىندا زەينەتاقى تۋرالى ارناۋلى توقتالعان بولاتىن. جولداۋدا حالىقتىڭ الەۋمەتتىك جاعدايىن جاقسارتۋ تۋراسىندا ايقىن جازىلعان. 

ءۇشىنشى. الەۋمەتتىك قامتاماسىز ەتۋ سالاسىنا قاتىستى.

مەنىڭ تاپسىرمام بويىنشا 2017 جىلعى 1 شىلدەدەن باستاپ 2،1 ميلليون زەينەتكەر ءۇشىن زەينەتاقى 2016 جىلعى دەڭگەيدەن 20%-عا دەيىن ارتتىرىلادى.

بۇدان بولەك، بازالىق زەينەتاقى تاعايىنداۋ 2018 جىلعى 1 شىلدەدەن باستاپ جاڭا ادىستەمە بويىنشا جۇزەگە اسىرىلادى. ونىڭ كولەمى زەينەتاقى جۇيەسىنە قاتىسۋ وتىلىنە بايلانىستى بەلگىلەنەدى.

وسى ءوسىمنىڭ بارلىعى 2018 جىلى بازالىق زەينەتاقىنىڭ جاڭا مولشەرىن 2017 جىلمەن سالىستىرعاندا 1،8 ەسە ارتتىرۋعا مۇمكىندىك بەرەدى.

ەلىمىزدە جىل سايىن 400 مىڭعا جۋىق بالا تۋادى، بۇل – 1999 جىلعى دەڭگەيدەن 2 ەسە دەرلىك جوعارى. مۇنداي جاقسى ءۇردىستى الداعى ۋاقىتتا دا ساقتاۋ كەرەك.

"مەنىڭ تاپسىرمام بويىنشا 2017 جىلعى 1 شىلدەدەن باستاپ بالا تۋعاندا بەرىلەتىن ءبىر رەتتىك جاردەماقى كولەمى 20%-عا وسىرىلەدى.

ەڭ تومەنگى كۇنكورىس شەگىن دە قايتا قاراستىرۋ كەرەك. ول قازاقستاندىقتاردىڭ ناقتى تۇتىنۋشىلىق شىعىستارىنا سايكەس كەلۋگە ءتيىس. بۇل قادام 2018 جىلعى 1 قاڭتاردان باستاپ بازالىق زەينەتاقى، مۇگەدەكتەرگە جانە اسىراۋشىسىنان ايرىلعان وتباسىلارعا ارنالعان جاردەماقى، مۇگەدەك بالا تاربيەلەپ وتىرعاندارعا بەرىلەتىن اتاۋلى كومەك پەن جاردەماقى كولەمىن 3 ميلليون ادام ءۇشىن وسىرۋگە مۇمكىندىك بەرەدى.

2018 جىلعى 1 قاڭتاردان باستاپ اتاۋلى الەۋمەتتىك كومەك كورسەتۋ شەگىن ەڭ تومەنگى كۇنكورىس شەگىنىڭ 40%-ىنان 50%-عا دەيىن ءوسىرىپ، ونىڭ جاڭا فورماتىن ەنگىزۋ كەرەك. بۇل رەتتە جۇمىس ىستەۋگە قابىلەتتى ادامنىڭ ءبارى تەك جۇمىسپەن قامتۋ باعدارلاماسىنا قاتىسۋ شارتى ارقىلى عانا قولداۋعا يە بولۋعا ءتيىس."، - دەلىنگەن جولداۋدا.

2017 جىلدىڭ 1 شىلدەسىندەگى جاعدايعا سايكەس زەينەتاقى جيناعىنىڭ جالپى سوماسى 7،14 ترلن. تەڭگەنى قۇرادى، بۇل جىل باسىنداعى سومادان 450 ملرد. تەڭگەگە (نەمەسە 6،3%-عا) كوبىرەك دەپ حابارلايدى Qamshy.kz اقپارات اگەنتتىگى «بجزق» اق باسپا ءسوز ورتالىعىنا سىلتەمە جاساپ. بۇكىل زەينەتاقى جيناعىنىڭ باسىم بولىگى، ياعني 98،3%-ى مىندەتتى زەينەتاقى جارناسى ەسەبىنەن قۇرالدى. وسى تۇستا 2017 جىلدىڭ ءبىرىنشى جارتىسىنداعى ءتۇسىمنىڭ جالپى سوماسى 364،9 ملرد. تەڭگەنى قۇرادى. الدىڭعى جىلعى كورسەتكىشپەن سالىستىرار بولساق، وتكەن جىلدىڭ تۋرا وسىنداي كەزەڭىندە زەينەتاقى جارناسى 221،8 ملرد. تەڭگەنى قۇراعان، ياعني بۇل سوما 64،5%-عا ءوسىپ وتىر.

2017 جىلدىڭ 6 ايى ىشىندە سالىمشىلارعا (الۋشىلارعا) تيەسىلى 201،3 مىڭ جەكە زەينەتاقى شوتى  (جزش) اشىلدى. ۇستىمىزدەگى جىلدىڭ 1 شىلدەسىندەگى جاعدايعا سايكەس شارتتاردىڭ بارلىعى بويىنشا اشىلعان جزش جالپى سانى 10،07 ملن. بىرلىكتى قۇرادى.

بجزق-نىڭ 2017 جىلدىڭ 6 ايى ىشىندە تولەگەن زەينەتاقى تولەمدەرىنىڭ سوماسى  121،25 ملرد. تەڭگە قۇرادى، وتكەن جىلدىڭ تۋرا وسىنداي كەزەڭىندە بۇل سوما 96،59 ملرد. بولعان، ياعني ءوسىم 25،5%-دى قۇرادى. وسى بۇكىل سومانىڭ ىشىندەگى 86،6 ملرد. تەڭگە (نەمەسە 71،4%-ى) زەينەتاقى جاسىنا جەتكەن كەزدە تولەنەتىن زەينەتاقى بولسا، 14،7 ملرد. تەڭگە (نەمەسە 12،1%) ساقتاندىرۋ ۇيىمدارىنا اۋدارىلعان زەينەتاقى جيناقتارى، 9،7 ملرد. تەڭگە (نەمەسە 8%) شەتەلگە تۇراقتى تۇرۋعا كەتۋگە بايلانىستى جاسالعان تولەمدەر، 10،3 ملرد. تەڭگە (نەمەسە 8،5%) باسقا دا ءبىرجولعى تولەمدەر (مۇراگەرلەرگە جانە جەرلەۋ ءۇشىن) بولىپ تابىلادى.

2017 جىلدىڭ ءبىرىنشى جارتىسىنداعى تازا ينۆەستيسيالىق تابىس سوماسى 205،69 ملرد. تەڭگە قۇرادى. ءسويتىپ 2017 جىلدىڭ 1 قاڭتارىنان باستاپ 30 ماۋسىمى ارالىعىنداعى كەزەڭدە سالىمشىلاردىڭ (الۋشىلاردىڭ) شوتىنا ۇلەستىرىلگەن بجزق زەينەتاقى اكتيۆتەرىنىڭ تابىستىلىعى ينفلياسيانىڭ 3،7%-عا تەڭ دەڭگەيىندە 3،01%-دى قۇرادى. ۇستىمىزدەگى جىلدىڭ 1 تامىزىنداعى جاعدايعا سايكەس بجزق زەينەتاقى اكتيۆتەرىنىڭ تابىستىلىعى 4،3%-دى قۇرادى، بۇل ينفلياسيا دەڭگەيىنەن 0،5%-عا جوعارى (ينفلياسيا - 3،8%).

2017 جىلدىڭ 6 ايى ىشىندە بجزق-نىڭ جەكە قىزمەت كورسەتۋ ورتالىقتارىندا بارلىعى 2،9 ملن-عا جۋىق وپەراسيا جۇرگىزىلدى، ياعني بجزق كەڭسەلەرىندە تۇرعىندارعا ارناپ كۇنىنە 25 مىڭعا جۋىق قىزمەت (وپەراسيا) كورسەتىلەدى.

سونداي-اق، قور ەلەكتروندىق قىزمەتتەردى دامىتۋ باعىتىندا كەڭىنەن قىزمەت جۇرگىزۋدە. ەلەكتروندىق قىزمەتتەردى قولدانۋى مۇمكىن تۇلعالاردىڭ سانى 3،4 ملن-نان اسىپ كەتتى. 2017 جىلدىڭ ءبىرىنشى جارتىسىندا قوردىڭ سايتى جانە موبيلدىك قوسىمشاسى ارقىلى ەلەكتروندىق كوشىرمەنى الۋ قىزمەتى 2،4 ملن-نان استام رەت قولدانىلعان، بۇل 2016 جىلدىڭ ءبىرىنشى جارتىسىنداعى كورسەتكىشتەن 3 ەسەگە جوعارى.

2017 جىلدىڭ 1 شىلدەسىنەن باستاپ قور جاڭا ەلەكتروندىق قىزمەتتەردى ىسكە قوستى. بجزق كەڭسەسىنە بارماستان، ەلەكتروندىق سيفرلىك قولتاڭبا كومەگىمەن قور سايتىنداعى جەكە كابينەت ارقىلى زەينەتاقى تولەمدەرىن تاعايىنداۋ جونىندە ارىز بەرۋ، تولەمدى جۇرگىزۋ جونىندە جىبەرىلگەن ارىزدىڭ جاي-كۇيىن قاداعالاۋ نەمەسە مىندەتتى زەينەتاقى جارنالارىن ەسەپكە الۋ اياسىندا جزش-ن اشۋعا ارىز بەرۋ سىندى جاڭا قىزمەتتەردى حالىق كەڭىنەن قولدانۋدا. ماسەلەن، ءبىر ايدىڭ ىشىندە قور سايتىنداعى بۇل قىزمەتتەردى 33 سالىمشى (الۋشى) قولدانىپ ۇلگەردى.

ۇستىمىزدەگى جىلدىڭ باسىنان باستاپ قور حالىق اراسىندا اقپاراتتىق-تۇسىندىرمە جۇمىستارىن كۇشەيتۋگە، بجزق قىزمەتىن بارىنشا ايقىن ەتۋگە باعدار الىپ وتىر. بيىلعى جىلدىڭ التى ايى ىشىندە كاسىپورىندار مەن ۇيىمداردا 6،6 مىڭنان اسا تانىستىرىلىم وتكىزىلىپ، بۇكىل رەسپۋبليكا بويىنشا وعان 206،6 مىڭنان اسا ادام قاتىستى. الدىڭعى جىلمەن سالىستىرار بولساق، وتكەن جىلدىڭ تۋرا وسىنداي كەزەڭىندە 3 مىڭعا جۋىق تانىستىرىلىم وتكىزىلىپ، بۇكىل 2016 جىل ىشىندە 4،8 مىڭعا دەرلىك تانىستىرىلىم ۇيىمداستىرىلدى. سونىمەن قاتار، 2017 جىلدىڭ 1 شىلدەسىندەگى جاعدايعا سايكەس بجزق جانە جەتى وبلىستىڭ اكىمدىكتەرى اراسىندا ىنتىماقتاسۋ جانە ءوزارا ارەكەتتەسۋ جونىندە مەموراندۋمعا قول قويىلىپ، 5،5 مىڭنان اسا ادام قاتىسقان ەكى اشىق ەسىك كۇنى وتكىزىلدى.

2017 جىلدىڭ ءبىرىنشى جارتىسىندا قوردىڭ تاۋەكەلدەردى باسقارۋ جانە ىشكى باقىلاۋ سالاسىنداعى باستى قۇجاتتارى حالىقارالىق ستاندارتتار تالاپتارىنا سايكەس قايتا قارالىپ، بيزنەس-ۇردىستەرگە بىرىزدىلىكپەن ەندىرىلۋدە. سونداي-اق، قور ISO 9001:2015 ستاندارتىنىڭ تالاپتارىنا سايكەس بينەس-ۇردىستەرىن ستاندارتتاۋ جانە وڭتايلاندىرۋ باعىتىندا بەلسەندى جۇمىس جۇرگىزۋدە، وسى ستاندارتقا سايكەس كەلەتىنىن راستايتىن سەرتيفيكاتتى كەلەسى جىلدىڭ ءبىرىنشى توقسانىندا الۋ جوسپارلانىپ وتىر.

سونىمەن قاتار، شىعىنداردى وڭتايلاندىرۋ جانە تيىمدىلىگى تومەن، باسىمدىققا يە ەمەس شىعىنداردى قىسقارتۋ باعىتىندا دا جۇمىس جالعاستىرىلۋدا. ۇستىمىزدەگى جىلدىڭ ءبىرىنشى جارتىجىلدىعىندا جۇرگىزىلگەن جۇمىس ناتيجەسىندە بجزق شىعىندارى 2017 جىلعا ارناپ بەكىتىلگەن باستاپقى بيۋدجەتكە قاراعاندا 11،7 ملرد. تەڭگەگە (نەمەسە 28%-عا) قىسقارتىلدى. بجزق بارلىق بيزنەس-ۇردىستەرگە تالداۋ جۇرگىزگەن سوڭ، قايتالاناتىن جانە ءتيىمسىز ۇردىستەردى وڭتايلاندىرىپ، قىسقارتتى. سونداي-اق، ۇيىمدىق قۇرىلىم جانە ەڭبەكاقى تولەۋ جۇيەسى قايتا قاراستىرىلدى، بۇل ەڭبەكاقىنى تولەۋ اياسىندا وسىعان دەيىن بەكىتىلگەن شىعىنداردى 2،4 ملرد. تەڭگەگە (نەمەسە 23%-عا) قىسقارتۋعا جاعداي جاسادى.

قور 2017 جىلدىڭ سوڭىنا دەيىن كاسىپورىندار مەن ۇيىمداردا 14 مىڭنان اسا تانىستىرىلىمدى (وسىعان دەيىن وتكىزىلگەن ءىس-شارالاردى قوسقاندا) وتكىزۋدى جوسپارلاپ وتىر، وعان 350 مىڭننان اسا ادامدى قاتىستىرۋ كوزدەلگەن. بجزق-نىڭ ەلەكتروندىق بايلانىس ارنالارى ارقىلى كورسەتەتىن زەينەتاقى قىزمەتتەرى اياسىنداعى وپەراسيالار ۇلەسىن جالپى وپەراسيالار كولەمىنەن 47%-عا دەيىن جەتكىزۋ جوسپارلانىپ وتىر.