ورتالىق كوممۋنيكاسيالار قىزمەتىندە ەكسپو-2017 حالىقارالىق كورمەسى اياسىندا استاناداعى قىزىلوردا وبلىسى كۇندەرىنە ارنالعان باسپاسوز-كونفەرەنسياسى ءوتتى. كونفەرەنسياعا وبلىس اكىمىنىڭ ورىنباسارى رۋسلان رۇستەموۆ پەن جاۋاپتى باسقارما باسشىلارى قاتىسىپ، ايماقتىڭ الەۋمەتتىك-ەكونوميكالىق دامۋى مەن مادەنيەت كۇندەرىنە ارنالعان شارالار جايلى باياندادى دەپ حابارلايدى Qamshy.kz اقپارات اگەنتتىگى.

«2012 جىلى قىزىلوردا وبلىسى الەۋمەتتىك ەكونوميكالىق دامۋى جونىنەن ەلىمىز بويىنشا 16 ورىندا بولسا، 2013 جىلدىڭ قورىتىندىسىمەن العاشقى بەستىكتىڭ قاتارىنان كورىندى. ايماقتىڭ الەۋمەتتىك-ەكونوميكالىق دامۋى قارقىندى. اسىرەسە، قۇرىلىس، وڭدەۋ ونەركاسىبى جانە ينۆەستيسيا تارتۋ سالالارىندا تۇراقتى ءوسىم بار. قۇرىلىس، ونىڭ ىشىندە باسپانا سالۋ بويىنشا 306،9 مىڭ شارشى مەتر تۇرعىن ءۇي ىسكە قوسىلدى، بۇل وتكەن جىلدىڭ ءتيىستى كەزەڭىمەن سالىستىرعاندا 138%-عا ارتىق. تۇرعىن ءۇي قۇرىلىسىنىڭ كولەمى بويىنشا ءبىز بۇگىندە استانا، الماتى قالالارى جانە ماڭعىستاۋ وبلىسىمەن قوسقاندا ۇزدىك ءتورت كوشباسشى قۇرامىندامىز. مەملەكەت قاراجاتىنىڭ ەسەبىنەن اعىمداعى جىلدىڭ باسىنان بەرى 980 پاتەرلىك 19 تۇرعىن ءۇي پايدالانۋعا بەرىلدى. جىل سوڭىنا دەيىن 1809 پاتەرلىك 41 كوپپاتەرلى ءۇي، ونىڭ 11ء-ى حالىقتىڭ ءالسىز قورعالعان توپتارى ءۇشىن (ياعني، جالگەرلىك تۇرعىن ءۇي) پايدالانۋعا بەرۋدى جوسپارلاپ وتىرمىز. وزدەرىڭىز بىلەتىندەي، ءبىز قىزىلوردا قالاسىنىڭ سول جاعالاۋ بولىگىن يگەرۋگە بارىنشا كىرىسىپ كەتتى. بۇعان ءبىزدى تۇرعىندار سانىنىڭ جانە ۋربانيزاسيا دەڭگەيىنىڭ ءوسۋى جەتەلەپ وتىر. ءقازىردىڭ وزىندە العاشقى بولىپ 18 كوپقاباتتى ۇيلەردەن تۇراتىن شاعىن اۋدان، بالاباقشا، جاستارعا قىزمەت كورسەتۋ ورتالىعى، «بولاشاق» ۋنيۆەرسيتەتىنىڭ ستۋدەنتتەر قالاشىعى جانە باسقا دا الەۋمەتتىك-مادەني نىساندار قۇرىلىسى باستالدى» دەپ مالىمدەدى وبلىس اكىمىنىڭ ورىنباسارى رۋسلان رۇستەموۆ.

«ەكسپو-2017» حالىقارالىق مامانداندىرىلعان كورمەسى اياسىندا قىزىلوردا وبلىسىنىڭ استانا قالاسىنداعى مادەنيەت كۇندەرى 10-15 تامىز ارالىعىندا وتەدى. وعان وبلىستان 270-كە جۋىق ونەرپاز قاتىسادى. مادەنيەت كۇندەرى 10 تامىزدا ساعات 19.00-دە م. گوركيي اتىنداعى مەملەكەتتىك اكادەميالىق ورىس دراما تەاترىندا وبلىستىق نارتاي بەكەجانوۆ اتىنداعى دراما تەاتر ۇجىمىنىڭ ساحنالاۋىمەن يران عايىپتىڭ «قورقىت» سپەكتاكلىمەن اشىلادى. سپەكتاكلگە شىعارما اۆتورى يران عايىپ قاتىسادى» دەپ باياندادى وبلىس اكىمىنىڭ ورىنباسارى رۋسلان رۇستەموۆ.

مادەني شارالار. 10-20 تامىز كۇندەرى قازانات يپپودرومىنىڭ اۋماعىنداعى ەتنواۋىلدا «سىر شەجىرەسى» اتتى قولونەر شەبەرلەرىنىڭ جانە وبلىستىڭ تاريحى مەن مادەنيەتىنە ارنالعان كورمە جۇمىس جاسايدى. ەتنوگرافيالىق كورمەدە وبلىستىق تاريحي-ولكەتانۋ مۋزەيى ۇسىنعان ايماقتىڭ مادەني مۇراسى مەن تاريحى دامۋىن پاش ەتەتىن ەكسپوناتتار ەل نازارىنا ۇسىنىلادى.   ەتونواۋىلدا ايماق قولونەرشىلەرى «شىعىس بازارى» جارمەڭكەسىنە قاتىسىپ، ءوز تاۋارلارىن ساتادى. كورمەگە رەسپۋبليكاعا بەلگىلى 25 قولونەر شەبەرى قاتىسادى. ولار ءاربىر قوناققا   زەرگەرلىك اشەكەي بۇيىمدارى مەن كيىز ءۇيدىڭ باۋ-شۋلارىن جاساپ، كيىز باسۋ، سۇيەك وڭدەۋ،  توقىما توقۋدان شەبەرلىك كلاستارىن كورسەتەدى. 13 تامىزدا «سىر سۇلەيىن سۇراساڭ» اتتى جىرشى-تەرمەشىلەردىڭ، تۇرماعامبەت وركەسترى مەن اقمەشىت ءانسامبلىنىڭ كونسەرتى وتەدى. قىزىلوردالىق ونەرپازداردىڭ كىشكەنتاي استانالىقتارعا دا ارنالعان تارتۋى بار. 11 تامىزدا  وبلىستىق فيلارمونيا جانىنداعى «ادەمى» بالالار مۋزىكالىق تەاتر ستۋدياسى  كىشكەنتاي كورەرمەندەر ءۇشىن «مازاسىز ءتيىن» قويىلىمىن ساحنالايدى.  مادەنيەت جانە ونەر كۇندەرى 14 تامىزدا «سىرداريا-جىرداريا» اتتى سىر ەلىنىڭ ونەر جۇلدىزدارىنىڭ گالا كونسەرتىمەن قورىتىندىلانادى.

سپورتتىق شارالار. 12 تامىزدا سىر ەلىنىڭ سپورتشىلارى ۇلتتىق سپورت تۇرلەرىنەن جارىسادى. اۋدارىسپاق، تەڭگە ءىلۋ، قىز قۋۋ، جامبى اتۋ، قازاق كۇرەسى، توعىزقۇمالاق، اسىق اتۋ سەكىلدى ۇلتتىق ويىندار وينالادى. قازاقى قۇماي تازىلاردىڭ كورسەتىلىمى وتەدى.

اۋىل شارۋاشىلىعى ونىمدەرىنىڭ جارمەڭكەسى. 12-13 تامىز كۇندەرى ەلىمىزدىڭ باس شاھارىندا قىزىلوردا وبلىسىنىڭ اۋىل شارۋاشىلىعى ونىمدەرىنىڭ جارمەڭكەسى وتەدى. بۇل جارمەڭكەدە 60 ملن. تەڭگە شاماسىنداعى 260 تونناعا جۋىق اۋىلشارۋاشىلىق ونىمدەرى ساتىلادى. وسىعان دەيىن استانادا ەكى رەت اقمولا، باتىس قازاقستان، اتىراۋ وبلىستارىمەن بىرىگىپ، ءوڭىرارالىق اۋىل شارۋاشىلىعى جارمەڭكەلەرى وتكىزىلگەن بولاتىن. بۇل جولى سىربويىلىقتار الماتى وبلىسىمەن بىرىگىپ ەلورداداعى «قازاقستان» سپورت كەشەنىنىڭ اۆتوتۇراعىندا جارمەڭكە ۇيىمداستىرۋدا. جارمەڭكەدە قىزىلوردا قالاسى مەن وبلىستىڭ 7 اۋدانىنداعى 30 شارۋاشىلىق 15 اۆتوكولىكپەن 40-تان اسا ءونىم تۇرلەرى ەلوردالىقتارعا تومەن باعامەن ۇسىنىلادى. ونىڭ ىشىندە كۇرىش – 60 توننا، جىلقى ەتى – 3 توننا، تاۋىق ەتى – 1 توننا، ءسۇت ونىمدەرى – 4 توننا، قىمىز جانە شۇبات 1 توننا، بالىق - 15 توننا، قيار مەن قىزاناق – 20 توننا، كارتوپ – 35 توننا، ءسابىز – 8 توننا، قىرىققابات - 10 توننا، اس تۇزى – 5 توننا، قاۋىن – 40 توننا، قاربىز – 50 توننا ت.ب. ونىمدەر.

ءوڭىردىڭ يندۋستريالىق دامۋى. اتقارىلعان جۇمىستار ناتيجەسىندە سوڭعى 3 جىلدا وڭدەۋ ونەركاسىبى تۇراقتى ءوسىمدى كورسەتىپ وتىر.  وڭدەۋ سەكتورىنداعى ءوندىرىس كولەمى جىل باسىنان بەرى 9،4%-عا، وتكەن 2013 جىلمەن سالىستىرعاندا 1،5 ەسەگە (151،2%) ارتقان. يندۋستريالاندىرۋ باعدارلاماسىنىڭ ەكىنشى بەسجىلدىعى اياسىندا قۇنى 610 ملرد.تەڭگەنى قۇرايتىن، ىسكە قوسىلعاندا 6،2 مىڭ ادامدى جۇمىسپەن قامتيتىن 24 جوبا جۇزەگە اسىرىلۋدا. باعدارلامانىڭ ءبىرىنشى بەسجىلدىعى اياسىندا 17 جوبا ىسكە قوسىلعان بولسا، ەكىنشى بەسجىلدىق اياسىندا ىسكە اسىرىلاتىن 24 جوبادان بۇگىنگى كۇنى 3 جوبا ىسكە قوسىلدى. 2017 جىلدىڭ 6 ايىندا بارلىق ىسكە قوسىلعان جوبالار ارقىلى 8،7 ملرد.تەڭگەنىڭ ءونىمى ءوندىرىلىپ، وڭدەۋ ونەركاسىبىندە وندىرىلگەن ءونىم كولەمىنىڭ 11% قۇرادى. اتاپ ءوتۋ قاجەت، يندۋستريالدىق جوبالار بۇرىن 8 ەلگە ونىمدەرىن ەكسپورتقا شىعارسا، 2017 جىلدان باستاپ 10 ەلگە ونىمدەرىن ەكسپورتقا شىعارا باستادى. 2017 جىلدىڭ 6 ايىندا ەكسپورت كولەمى بىلتىرعى جىلدىڭ ۇقساس كەزەڭىمەن سالىستىرعاندا 56%-عا ارتتى.