قىركۇيەك ايىندا گرۋزيا ەلى قازاقستانعا قارىزىن قايتارا باستايدى. بۇل جايىندا قازاقستاننىڭ گرۋزياداعى توتەنشە جانە وكىلەتتى ەلشىسى ەرمۇحامەت ەرتىسبايەۆ مالىمدەدى، دەپ  Qamshy.kz اقپارات اگەنتتىگى Tengrinews.kz سايتىنا سىلتەمە جاساپ حابارلايدى.

«قىركۇيەك ايىنىڭ باسىندا گرۋزيا قازاقستانعا مەملەكەتتىك قارىزىن تولەۋىن باستايدى. ءبىز كەزىندە، وسىدان شامامەن 20 جىل بۇرىن گرۋزيندەرگە 27،5 ميلليون دوللار قاراجات قارىزعا بەرگەن بولاتىنبىز. ول 90-جىلداردا بولعان. ول كەزدە ءبىزدىڭ ءوزىمىزدىڭ مەملەكەتتىك قازىنامىز بوساپ تۇرعان بولاتىن، الايدا گرۋزيا ەلى بۇل قارجىنى قاتتى قاجەت ەتكەن»، – دەدى ەرمۇحامەت ەرتىسبايەۆ ق ر ءسىم بريفينگىندە.

«مەن 2013 جىلدىڭ كوكتەمىندە گرۋزيا ەلىنە بارعانىمدا، دوستىقتىڭ اتى دوستىق، الايدا قارىزدى قايتارۋ قاجەتتىگىن ايتقانمىن. بۇل ماسەلەنى قالاي دا بولسىن شەشۋ قاجەت. ءتۇرلى كەلىسسوزدەر جۇرگىزىلدى. ولار پاريجدىك كلۋب جۇيەسى بويىنشا قارىزدارىن وتەيتىن بولادى، بۇل جۇيەدە پايىزدار وتە تومەن»، – دەيدى ەلشى.