بەلگىلى جۋرناليست بيبىگۇل داۋلەتبەك قىزى «حابار» اگەنتتىگىنىڭ باسقارما ءتوراعاسىنىڭ ورىنباسارى رينات كەرتايەۆتىڭ ايىبىن جايىپ سالدى دەپ حابارلايدى Qamshy.kz اقپارات اگەنتىگى. بۇل تۋرالى بيبىگۇل داۋلەت قىزى Facebook پاراقشاسىندا جازعان بولاتىن.
– ايتپاقشى، وسىندا ءبىر جەڭىل ءجۇرىستى قازاق قىزى فىبىدا تىكەلەي ەفير جۇرگىزىپ ءجۇرىپ (ەركەكتەرگە دۋشقا كىرىپ جۋىنعانىن، ودان قالدى دارەتحانادا وتىرعانىن، اۋىزى تولعان مۋسور، وزگە ۇلت وكىلدەرىمەن اراق ءىشىپ، تەمەكى شەگىپ وتىرعانىن تىكەلەي ەفيردە كورسەتەدى ەكەن)، وتاندىق كوگىلدىر ەكرانعا شىعىپ كەتتى دەگەن ءسوزدى ەستىدىم. سوندا بۇل – قازاق جۋرناليستيكاسىنىڭ ولگەنى مە؟! انشىلەردەن قۇتىلا الماي جاتقانىمىزدا، ەندى قالماعانى جىن-ويناق پا؟ 
تەلەارناداعى ارىپتەستەر، ەگەر رەيتينگ ءۇشىن وسىلاي جاساي بەرسەڭىزدەر، ءبىر كۇنى ساين كوشەسىندەگى پريتونداردا جۇمىس ىستەۋگە كەلىسىپ كەتەتىندەيسىزدەر عوي. مىناۋ – ناعىز سۇمدىق! 
تەلەارنادان شىققان ءاربىر جۇرگىزۋشى – حالىقتىڭ ايناسى. سوندا پۋتانالاردى وسىلاي ەفيرگە شىعارسا، جەتكەن جەرىمىز وسى ەكەن دە. 
داۋرەن ابايەۆ مىرزا جۋرناليستيكا سالاسىن تىم بوس جىبەرىپ قويعان جوق پا دەگەن وي كەتەدى كەيدە. نەگە ەفيردىڭ جۇرگىزۋشىلەرىن قاداعالامايدى؟ نەگە ەفيردە جەڭىل جۇرىستىلەر قاپتاپ بارادى؟ ولاردى كورگەن جاس كورەرمەندەر ەلىكتەيدى عوي. "انا اپايىمىز 2 رەت كۇيەۋگە شىعىپتى، مىنا جۇرگىزۋشى توقالى ەكەن. مىناۋ بولسا كۇيەۋىنىڭ كوزىنە ءشوپ سالىپ، اقىل ايتۋدا. مەنىڭ ودان قاي جەرىم كەم؟" دەگەن تۇيسىك قالىپتاسپاي ما؟

"رەيتينگ، رەيتينگ" دەپ، جاستارىمىزدى ۋلاپ جاتقان سەكىلدىمىز. يدەولوگيا جوق. باياعىدا ءولىپ قالعان. وسىنداي داڭعازا-شۋ باعدارلامالاردان گورى، نەگە پەدوفيل، ءسۋيسيدتىڭ الدىن الۋ تۋرالى كورەرمەن قىزىعىپ قارايتىن حابارلار اشپاسقا؟ قازىرگى باق-تىڭ ايتاتىنى – "جول اپاتى"، "پەدوفيل كىشكەنتاي قىزدى زورلاپتى"، "قىرشىنداي جىگىت ءوزىن-وزى كوپىردەن لاقتىردى"، "پالەنشەنى سوتتاپتى، اناۋ ءوزىن ورتەپتى" ت.ب. 
ءبىر تۇشىمدى حابارلار جوق. 
سالماقتى حابارىمدى شىعارعىم كەلگەن ەدى 2-3 جىل بۇرىن. حابارداعى رينات كەرتايەۆ "اي-حاي، 25" توك-شوۋىمدى، "پاي-پاي، 25" ەتىپ وزگەرتىپ، ايدى اسپانعا شىعارىپ، ەفيردەن كورسەتەتىنىن دە بىلتىر وسى فەيسبۋكتان ءبىلدىم (ريناتتى ايتامىن دا "سۇيىنشىلەتىپ" قويادى). ءبىراق، باسى ءبىراز داۋعا قالدى. ول باعدارلامانىڭ اۆتورى مەن ەكەنىن ارىپتەستەرىم جازدى. الايدا، رينات مىرزا مەنىڭ نومىرىمە حابارلاسىپ:
– بيبىگۇل، كەلىسىمگە كەلەيىك، ءوتىنىش؟! ەكەۋمىز ءقازىر بەت جىرتىسقاننان ەشتەڭە ونبەيدى، – دەپ، مەنى كەزدەسۋگە شاقىردى. 
"بولارى بولىپ، بوياۋى ءسىڭىپ" كەتكەن حابارىمدى يەمدەنگەنىن بىلگەنىمدە، ارينە قاتتى ىزالاندىم. جىلاپ تا الدىم. ءبىراق، رينات 2016 جىلعى بيۋدجەتتەن اقشا قاراستىرىپ، باسقا باعدارلامالارىمدى ساتىپ الاتىنىن ايتقاننان سوڭ، بىتىمگە كەلدىم. الايدا، كابينەتىندە قولىن بەرىپ، ۋادەسىن ايتقان رينات كەرتايەۆ "ەركەكتىك" سوزىندە تۇرمادى. مىنە، بۇل ءبىر عانا مىسال.
مەن سەكىلدى تالاي جۋرناليستەردىڭ تاۋى شاعىلىپ جاتقانى قانشاما؟ ريناتتىڭ ۇياتى ءبىلسىن. بۇل دۇنيەدە – اتاق-مانساپ ماڭگىلىك ەمەس! ءومىر – الما-كەزەك. بۇگىن كرەسلودا ول وتىرسا "قونجيىپ"، ەرتەڭ مەن وتىرامىن. بۇگىنگى كۇنمەن ءومىر سۇرگەن تەلەارنا باسشىلارىنىڭ تالايىن كوردىم. ءقازىر شىرەنىپ وتىرادى، ەرتەڭ بۇگىلىپ كەتەدى. كەشە عانا ءزارىن توگىپ، قاھارلانعانداردىڭ دا، ەرتەسىنە مايموڭكەلەپ كەتەتىنىن دە ۋاقىت كورسەتتى. 
"بيبىگۇل اينالايىن، وسەكتىڭ جەتەگىندە كەتتىم، اعاڭدى كەشىر"، – دەگەن باسشىلارىم دا بولدى. 
مەن كەشىرىمدىمىن. ءبىراق، يدەيا ۇرلاۋشىلاردىڭ ءومىرى كەرەمەت بولىپ كەتەتىنىنە سەنىمسىزبىن. سول پلاگياتشىلارعا 2010 جىلى شىققان فرانسيانىڭ "بەز ۋليك" دەگەن ءفيلمدى كورۋگە كەڭەس بەرەمىن. ءبىراق ونداعى كەيىپكەردىڭ ادامگەرشىلىگى بار، ۇياتى جىبەرمەي، تالاي جىلدار بويى كۇندىز كۇلكىدەن، تۇندە ۇيقىدان ايىرىلادى. بىزدىكىلەر سەكىلدى "ءبىر كۇندىكپەن" ءومىر سۇرمەيدى. 
ەفيردىڭ لاستانۋىنا دا وسىنداي باسشىلار كىنالى. ولاردىڭ باستارىندا تەك – رەيتينگ تۇر. اۆتورلىق قۇقىعىمىز باياعىدا تاپتالعان. باسىندا يدەياسى جوق، پلاگياتپەن جۇمىس ىستەيتىن قازاق باسشىلارى تۇرعاندا، وسىلاي تەلەارنالار قۇردىمعا كەتە بەرمەك... 
بۇل – دەگراداسيا!