«ساياسي قالام. تريبۋنا» گازەتىنىڭ باس رەداكتورى بولعان جانبولات مامايدىڭ قامالعانىنا جارتى جىلدىڭ كولەمىندەي ۋاقىت بولدى. اقپان ايىندا تۇتقىندالعان جۋرناليستكە قاتىستى تەرگەۋ ءىسى اياقتالىپ، 14 تامىز كۇنى العاشقى سوت وتىرىسى ءوتتى. اقپان ايىنان بەرى ءار كۇنى ءۇمىت پەن كۇدىككە تولى ءوتىپ جاتقان جانبولات مامايعا قاتىستى جۇرگىزىلگەن سوت ىسىنە كوز جۇگىرتە كەتەيىك.

وپپوزيسيالىق باسىلىم «ساياسي قالام. تريبۋنا» گازەتىنىڭ كەزەكتى باسىلىمى 1 اقپان كۇنى شىعۋى ءتيىس بولاتىن. الايدا، جانبولات ماماي ب ا ق بەتتەرىنە بەرگەن سۇحباتىندا اتالمىش گازەتتىڭ باسشىسى تيپوگرافيا قىزمەتكەرلەرىنە: "جۇمىستان قۋىلاسىڭدار!" دەپ قورقىتىپ، گازەتتىڭ كەزەكتى سانىن شىعارماي تاستاعاندىعىن ايتقان.

«بۇل گازەتتىڭ جۇمىس ىستەپ كەلە جاتقاندىعىنا 5 جىل بولدى. 1 اقپان كۇنى ادەتتەگىدەي گازەتتىڭ كەزەكتى سانىن باسىپ شىعارماقشى بولدىق. الايدا، «بيزنەس-ينفورم» تيپوگرافياسىنىڭ جۇمىسكەرلەرى باسشىلارى قورقىتىپ، اتالمىش گازەتتى باسىپ شىعارۋعا تىيىم سالعان. ءبىزدىڭ بۇل باسىلىمدا ۇقك باسشىسى كارىم ءماسىموۆ جايلى ۇلكەن ماقالا جارىق كورۋى ءتيىس ەدى. بالكىم، سول سەبەپتى دە شىعارماي تاستاعان بولار. بۇل – ساياسي استارى بار ماسەلە سەكىلدى...»، – دەپ ايتتى جانبولات ماماي.

جانبولات ماماي 10 اقپاندا تۇتقىندالىپ، كەلەسى كۇنى الماتى قالاسى مەدەۋ اۋداندىق سوتىنىڭ شەشىمىمەن ەكى ايعا قاماۋعا الىنعان. تەرگەۋشىلەردىڭ ايتۋىنشا، ونى «بتا بانكتەن ۇرلانعان قاراجاتتى «ساياسي قالام. تريبۋنا» گازەتى ارقىلى زاڭداستىرىپ كەلگەن» دەگەن ايىپ تاعىلعان. تەرگەۋ كەزىندە جۋرناليست بۇل ايىپتاردى جوققا شىعارىپ، اتالمىش ءىستىڭ ساياسي استارى بار ەكەندىگىن ايتقان.

كەيىننەن بەلسەندىلەردەن قۇرالعان «جانبولات مامايدى قورعاۋ» توبى قۇرىلعان.  جانبولات مامايدىڭ ادۆوكاتى جانار بالعابايەۆا ءجۋرناليستى ەكى ايعا قاماۋ جونىندەگى سوت شەشىمىنە اپەللياسيالىق شاعىم تۇسىرگەن.

الايدا سوت ءجۋرناليستى قاماۋدا ۇستاۋ تۋرالى شەشىمىن وزگەرىسسىز قالدىردى. ارىزدى قاراۋ جابىق جاعدايدا ءوتىپ، سوتتىڭ شەشىمىن جانبولات مامايدىڭ ادۆوكاتى جانار بالعابايەۆا حابارلاعان. ول 21 اقپاندا جانبولات مامايمەن كەزدەسىپ، ونىڭ اباقتىداعى جاعدايىن بىلۋگە تىرىستى. ونىڭ ايتۋىنشا، تۇرمەدە جۋرناليستكە فيزيكالىق جانە مورالدىق قىسىم جاسالعان ەكەن. «ساياسي قالام. تريبۋنا» گازەتىنىڭ ءجۋرناليستى ينگا يمانباي جانبولات مامايدىڭ ادۆوكاتقا جازعان ءوتىنىشىن Facebook جەلىسىندەگى جەكە پاراقشاسىندا جاريالاعان. جۋرناليست ءوز وتىنىشىندە ومىرىنە الاڭدايتىنىن جانە باسقا كامەراعا اۋىستىرۋىن سۇراپ جازعان. الايدا مەكەمە باسشىسى باقىتجان بايماعامبەتوۆ جۋرناليستكە اباقتىدا قىسىم جاسالادى دەگەن ايىپتى تەرىسكە شىعارعان.

ەكى ايدان كەيىن جانبولات مامايدى قاماۋ مەرزىمى تاعى ەكى ايعا ۇزارتىلدى. مەدەۋ اۋدانىندا وتكەن تىڭدالىم جابىق تۇردە بولىپ، وعان تىلشىلەردى كىرگىزبەگەن.

كەيىننەن، ماۋسىم ايىندا، مەدەۋ اۋداندىق سوتى جانبولات مامايدى قاماۋ مەرزىمىن 10 شىلدەگە دەيىن ۇزارتتى. ادەتتەگىدەي جابىق تۇردە وتكەن تىڭدالىمعا ءجۋرناليستى قولداۋعا كەلگەن بەلسەندىلەر مەن ب ا ق وكىلدەرى كىرگىزىلمەگەن.

وپپوزيسيالىق «ساياسي قالام. تريبۋنا» گازەتىنىڭ باس رەداكتورى جانبولات مامايدىڭ جاقتاستارى ونى بوساتۋدى تالاپ ەتىپ، الەۋمەتتىك جەلىدە ءساۋىر ايىندا Mamay Fest اكسياسىن وتكىزگەن. بەلسەندىلەر، ءجۋرناليستى بوساتۋىن تالاپ ەتىپ، وعان تاعىلعان ايىپتاردى نەگىزسىز دەپ تانىدى.

28 ماۋسىم كۇنى ءجۋرناليستى قورعاۋ كوميتەتىنىڭ مۇشەلەرى دوڭگەلەك ۇستەل، بيلىكپەن قۋدالانعان بارلىق جۋرناليستەردىڭ قۇقىقتارىن قورعاۋدى كوزدەگەن. ولار ءسوز بوستاندىعىن العا تارتىپ، ب ا ق تۋرالى جاڭا زاڭ جوباسىن سىنعا العان.

كەيىننەن الماتى قالاسىندا ءبىر توپ بەلسەندى جينالىپ، 30 شىلدەدە پوشتا ارقىلى ەۋروپالىق وداققا، ەقىۇ جانە دە ءبىرشاما حالىقارالىق دەموكراتيالىق ۇيىمدارعا حات جولداعان. حاتتى جولداۋشىلار ءبىرشاما بيلىكتىڭ قۋدالاۋىنا تۇسكەن ازاماتتاردىڭ ءتىزىمىن اتاپ، ساياسي تۇتقىن رەتىندە تانىلعانداردىڭ جاعدايىنا نازار اۋدارۋىن سۇراعان. وندا جانبولات مامايدىڭ ۇستىنەن قوزعالعان قىلمىستىق ءىستى قايتا قاراۋلارىن تالاپ ەتكەن.

جوعارىدا اتاپ وتكەنىمىزدەي، تەرگەۋ ءىسى اياقتالىپ، 14 تامىز كۇنى اتالمىش ءىس بويىنشا العاشقى سوت وتىرىسى ءوتىپ، ادۆوكاتى جانار بالعابايەۆا ونى كەپىلمەن بوساتۋىن سۇراعان. الايدا، سۋديا ول ۇسىنىستان باس تارتتى.

بۇگىن جالعاسىن تاپقان سوت پروسەسىندە جانبولات مامايعا قاتىستى ىسكە بتا بانكىنىڭ ەكس-توپ-مەنەدجەرى جاقسىلىق جارىمبەتوۆ كۋاگەر رەتىندە شاقىرىلعان. ول سوتتا جانبولات مامايعا اقشا بەرگەندىگىن ايتتى.

ب ا ق بەتتەرىندە شىققان مالىمەتتەرگە سايكەس، جارىمبەتوۆ «ەلگە تاۋەلسىز باسىلىم كەرەك» دەگەن سەبەپپەن جۋرناليست مامايعا قارجىلاي كومەك كورسەتكەن.

ايتا كەتەر بولساق، بيىل ماۋسىم ايىندا مۇحتار ءابلازوۆتىڭ ءىسى بويىنشا جاقسىلىق جارىمبەتوۆ شارتتى تۇردە قاماۋعا الىنعان.

وپپوزيسيالىق ساياساتكەر مۇحتار ءابلازوۆ ۇرلاعان اقشانى زاڭداستىردى دەگەن ايىپپەن اقپان ايىندا تۇتقىندالعان جانبولات مامايعا قاتىستى كەلەسى سوت وتىرىسى 21 تامىز كۇنى وتەدى.

نازەركە لابيحان