تامىزدىڭ 15 مەن 17ء-ى ارالىعىندا وزىق شارۋاشىلىق جەتەكشىلەرى، ق ر ەگىنشىلىك جانە وسىمدىك شارۋاشىلىعى عىلىمي-زەرتتەۋ ينستيتۋتى مەن «جەتىسۋ» الەۋمەتتىك-كاسىپكەرلىك كورپوراسياسى باسشىلارى سەربيا رەسپۋبليكاسىندا بولىپ قايتتى. الماتى وبلىسىنىڭ دەلەگاسياسىن ءوڭىر باسشىسىنىڭ ورىنباسارى سەرىكجان بەسكەمپىروۆ باستاپ باردى دەپ حابارلايدى Qamshy.kz اقپارات اگەنتتگى.
ساپار بارىسىندا قازاقستاندىق دەلەگاسيا سەربيانىڭ اۋىلشارۋاشىلىعى جانە قورشاعان ورتانى قورعاۋ ءمينيسترى برانيسلاۆ نەديموۆيچپەن، ۆويەۆودينا اۆتونومدىق ايماعىنىڭ ۇكىمەت باسشىسى يگور ميروۆيچپەن جانە اۋىلشارۋاشىلىعىمەن اينالىساتىن ءىرى سەربتىك كومپانيا جەتەكشىلەرىمەن كەزدەستى. سونداي-اق وڭتۇستىك-شىعىس ەۋروپاعا تانىمال ەگىن جانە كوكونىس شارۋاشىلىعى «نس سەميا» عىلىمي-وندىرىستىك ينستيتۋتىندا، «بيوسەنس» عىلىمي-يننوۆاسيالىق ينستيتۋتى مەن سەربيانىڭ شاعىن جانە ورتا فەرمەرلىك شارۋاشىلىقتارىندا بولدى.
قازاقستان دەلەگاسياسىنىڭ باسشىسى سەربيا تاراپىن ەلىمىزدىڭ دامۋىنداعى نەگىزگى باسىمدىق ق ر پرەزيدەنتىنىڭ «قازاقستاننىڭ ءۇشىنشى جاڭعىرۋى، جاھاندىق باسەكەگە قابىلەتتىلىك» اتتى جولداۋىندا كورسەتىلگەن اگرونەركاسىپ كەشەنىندە ەكسپورتتىق باعىتتى دامىتۋعا باعىتتالعانىن اتاپ ءوتتى. كەزدەسۋ بارىسىندا قازاقستاننىڭ سەربياداعى ەلشىسى نۇرباح رۇستەموۆ بۇل ساپار ەكى ەل اراسىندا اۋىلشارۋاشىلىعى سالاسىنداعى قارىم-قاتىناستاردى نىعايتۋعا باعىتتالعان كەلىسىمدەردىڭ تاجىربيە جۇزىندە ىسكە اسىرىلۋى ەكەنىن تىلگە تيەك ەتتى. ەلشىنىڭ ايتۋىنشا الماتى وبلىسى مەن ۆويەۆودينا اۆتونومدىق ايماق اكىمشىلىگىنىڭ سەرىكتەستىك تۋرالى كەلىسىمنىڭ ورىندالۋى. ەكى تاراپ سويا، قانت قىزىلشاسى، جۇگەرى مەن كۇنباعىس تۇقىمىن ءوندىرۋ سالاسىندا بىرگە جۇمىس ىستەۋدە قىزىعۋشىلىق تانىتقانىن جەتكىزدى. اۋىلشارۋاشىلىعى ونىمدەرىنىڭ ونىمدىلىگىن ارتتىرۋ باعىتىندا عىلىمي جوبالار بويىنشا ءوزارا تاجىربيە الماسۋدى كوزدەيدى. بۇدان بولەك ەكى ەلدىڭ وقۋ ورىندارىندا اۋىلشارۋاشىلىعى ماماندارىن دايارلاۋ، كووپەراسيا قۇرۋ تاراپىندا ءبىرقاتار ماسەلەلەر قارالدى.
قازان ايىندا ۆويەۆودينا اۆتونوميالىق ايماق باسشىسى مەن سەربتىك اۋىلشارۋاشىلىعى تاۋار وندىرۋشىلەرىنىڭ، ساۋدا-ساتتىق جانە ەكونوميكلىق قارىم-قاتىناستا قىزىعۋشىلىق تانىتقان كومپانيالاردىڭ الماتى وبلىسىنا جاۋاپتى ساپارى جوسپارلاندى.
