جىل باسىندا پرەزيدەنت نازاربايەۆ مەم­لەكەتتىك بيلىكتىڭ تارماقتارى اراسىندا وكىلەتتىكتەردى قايتا ءبولۋ ماسەلەلەرى جونىندەگى جۇمىس توبىن قۇرۋ تۋرالى وكىمگە قول قويعان بولاتىن. جۇمىس توبىن پرەزيدەنت اكىمشىلىگىنىڭ باسشىسى باسقاردى. ونىڭ قۇرامىنا رەسپۋبليكانىڭ پارلامەنتى، ۇكىمەتى، جوعارعى سوتى، وزگە دە مەملەكەتتىك ورگانداردىڭ وكىلدەرى، سونداي-اق عىلىمي-ساراپتامالىق قاۋىمداستىقتىڭ وكىلدەرى كىردى. تۇتاس ءبىر رەفورماتورلىق شتاب دەسەك ارتىق ايتقانىمىز ەمەس.

جۇمىس توبى بىردەن ارەكەتكە كوشىپ، العاشقى ناتيجەلەرىن كورسەتە باستادى. قوعام بۇل ماسەلەگە قىزۋ ارالاسپاسا دا، باق-دا جانە ساراپشىلار اراسىندا بەلگىلى دارەجەدە پىكىر تالاستار ورىن الدى. جاقسىبەكوۆ باستاعان جۇمىس توبى كونستيتۋسيانىڭ 91-بابىنىڭ 2-تارماعىنىڭ رەداكسياسىنا مەملەكەتتىڭ تاۋەلسىزدىگىن، رەسپۋبليكانىڭ ءبىرتۇتاستىعى مەن اۋماقتىق تۇتاستىعىن وزگەرتۋگە تىيىم سالاتىن تولىقتىرۋلاردى ەنگىزىپ، پارلامەنتتەن وتكىزىپ، ول رەداكسيانى پرەزيدەنت قولداپ، قولىن قويعان بولاتىن. وسىلايشا جىل باسىندا مەملەكەتىمىزدىڭ تاريحىندا ەلەۋلى وقيعا ورىن الدى – جوعارعى مەملەكەتتىك ساياسي اپپارات مەملەكەتشىلدىك ۇستانىمىن ايقىندادى.

وسى رەفورمادان كەيىن از عانا ۋاقىت وتكەندە، پرەزيدەنت نازاربايەۆتىڭ باستاماسىمەن تاعى ءبىر ماڭىزدى شەشىم قابىلداندى. 19 ساۋىردە نۇرسۇلتان نازاربايەۆ پرەزيدەنت جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانى قۇرۋ تۋرالى جارلىققا قول قويدى. باعدارلامانى ىسكە اسىرۋ جونىندەگى ۇلتتىق كوميسسيانى باسقارۋدى دا نازاربايەۆ جاقسىبەكوۆكە تاپسىردى. كونستيتۋسيالىق رەفورمالار ۇدەرىسى جۇمساق جاعدايدا ءوتىپ، ەلىمىزدىڭ ساياسي بيلىگىنىڭ فۋنكسياسى جاڭارۋ كەزەڭىنە اياق باستى. ەندىگى قادام قازاق قوعامىنىڭ جاڭعىرۋ ساتىسىنا وتۋىندە تۇر. پرەزيدەنت اكىمشىلىگىنىڭ دەر كەزىندە جاساعان ساياسي تەحنولوگيالىق، ستراتەگيالىق باعدارلاماسى – «جوعارىدان جاسالعان ريەۆوليۋسيا» اسەرىن بەرۋدە. نە دەسەك تە، پرەزيدەنت نازاربايەۆتىڭ «رۋحاني جاڭعىرۋ» يدەياسى قوعامنىڭ الۋان ءتۇرلى توپتارىن ءبىر ماقسات توڭىرەگىندە توپتاستىرۋدا. بۇل ەڭ الدىمەن پرەزيدەنت اكىمشىلىگىنىڭ ۇيىمداسىپ،  جۇمىستى جاقسى قۇرا بىلگەنىڭ ارقاسىندا بولسا، ەكىنشىدەن نازاربايەۆتىڭ اكىمشىلىگى قوعامنىڭ سۇرانىسىن ءدوپ بايقاي بىلۋىندە. وسىعان وراي، ساراپشىلار جاقسىبەكوۆتىڭ اكىمشىلىك باسشىلىعىنا ەكىنشى رەت ورالۋى مەن مەملەكەتشىلدىك ريتوريكانىڭ كۇشەيۋىنىڭ تۇسپا-تۇس كەلگەندىگى كەزدەيسوقتىق ەمەس ەكەنىڭ، كەرىسىنشە بۇل ادىلبەك رىسكەلدى ۇلىنىڭ ۇندەمەي ءجۇرىپ ءىس تىندىراتىن ءستيلى ەكەنىڭ ايتۋدا.

كەشە عانا پرەزيدەنت اكىمشىلىگىنىڭ باسشىسى، ۇلتتىق كوميسسيانىڭ ءتوراعاسى  ءا. جاقسىبەكوۆتىڭ توراعالىعىمەن  «رۋحاني جاڭعىرتۋ» باعدارلاماسىن ىسكە اسىرۋ جونىندەگى ۇلتتىق كوميسسيانىڭ ءۇشىنشى وتىرىسى ءوتىپ، جۇمىستىڭ كەيبىر ناتيجەلەرى بەلگىلى بولدى:

*  قازاق ءتىلىن لاتىن الىپبيىنە كوشىرۋ جوباسى بويىنشا ءتيىستى جۇمىس توبى الداعى كۇزدە جاڭا ءالىپبيدىڭ نۇسقاسىن قاراۋعا ۇسىنادى.

* «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى اياسىندا گۋمانيتارلىق پاندەر بويىنشا 17 وقۋلىقتىڭ ءتىزىمىن جاسالدى. باعدارلامانىڭ اياسىندا قۇرىلعان ۇلتتىق اۋدارما بيۋروسى ولاردى اۋدارۋعا كىرىستى.

* «قازاقستاننىڭ كيەلى جەرلەرىنىڭ گەوگرافياسى» جوباسى بويىنشا رەسپۋبليكالىق دەڭگەيدەگى 100 جانە وڭىرلىك دەڭگەيدەگى 500 كيەلى نىسان ىرىكتەلىپ الىندى.

* «قازاقستانداعى 100 جاڭا ەسىم» جوباسىنا 1500 ءوتىنىم كەلىپ ءتۇستى.

وسى قىسقا ۋاقىت ىشىندە، جاقسىبەكوۆ باستاعان كوميسسيانىڭ كورسەتكەن ناتيجەلەرى ۇمىتتىرەتىندەي اسەر قالدىرۋدا.  سەبەبى، جاقسىبەكوۆ مىرزانىڭ تىكەلەي باسشىلىعىمەن پرەزيدەنت اكىمشىلىگى ءبىر جىلدىڭ ىشىندە رەت-رەتىمەن ەكى رەفورمانى دا جۇزەگە اسىرىپ، اكىمشىلىكتىڭ جۇمىسىن جاڭا كاسىبي ساپا دەڭگەيىنە شىعاردى.

نۇرعالي نۇرتاي