قىزىلوردادا 65 جاستاعى تولەش قۇيرىقبايەۆا «قامقورلىق» اتتى داعدارىس ورتالىعىنا كەلىپ تۇسكەن. زەينەتكەردىڭ ايتۋىنشا، ول 45 جىل بويى كۇيەۋىنىڭ تاراپىنان قورلىق پەن مازاققا ءتوزىپ كەلگەن. ونىڭ 5 بالاسى بار، الايدا ولاردىڭ بىرەۋى دە اناسىنا قامقورلىق جاساي المايدى ەكەن دەپ حابارلايدى Qamshy.kz اقپارات اگەنتتىگى استانا ارناسىنا سىلتەمە جاساي وتىرىپ.

«مەنىڭ ەشكىمىم جوق، ءوزىم بالالار ۇيىندە تاربيەلەنگەنمىن. بالالارىم نەسيە الىپ بەرۋىمدى وتىنگەن سوڭ، الىپ بەرگەنمىن. ۇيلەرىنىڭ شاتىرىن اۋىستىرىپ بەرۋىمدى سۇرادى، ونى دا اۋىستىرىپ بەردىم، تەك سولاردىڭ جاعدايى جاقسى بولسا بولدى. ال، ەندى ولاردىڭ ەشبىرىنىڭ ماعان قامقورلىق جاساۋعا جاعدايلارى كەلمەيدى، انالارىنا كومەك كورسەتە المايدى ەشبىرى. ومىردە ءبىر قاتتى قۋانعان كەزىم بولماعان. الايدا، مەن بەرىلمەيمىن، بىرەۋدىڭ ءۇيىن جيناپ، كورپە تىگۋ كەرەك بولسا دا، كاسىپ قىلامىن»، –دەيدى قارت انا.

سوڭعى جارتى ايدىڭ ىشىندە اتالمىش ورتالىققا تۋىستارى باس تارتقان 4 قارت اجە كەلىپ تۇسكەن. ولاردىڭ بىرەۋىن تۋىستارى تاۋىپ الىپ كەتتى. قالعاندارى قارتتار ۇيىنە ورنالاسۋ ءۇشىن قۇجاتتاردىڭ راسىمدەلۋىن كۇتىپ وتىر.

داعدارىس ورتالىعىنىڭ ديرەكتورىنىڭ ايتۋىنشا، قارتايعان اتا-انالارىنان باس تارتۋ بۇگىنگى قوعامدا قالىپتى جاعدايعا اينالىپ بارا جاتىر. كوپشىلىك جاستار وزدەرىنىڭ اتا-انالارىنا قامقورلىق تانىتقىلارى كەلمەيدى. قازىرگى تاڭدا، وبلىستىق قارتتار ۇيىندە 160 قاريا تۇرادى، ولاردىڭ 101ء-نىڭ بالا-شاعاسى بار.

«وسى ۋاقىتقا دەيىن ەكى اجە وسىندا تۇرىپ قالىپقا ءتۇسىپ، ومىرگە بەيىمدەلە باستادى. ءقازىر مەملەكەتتىك جاۋاپتى تۇلعالارمەن جۇمىس جاساپ جاتىرمىز. كەيىننەن ءۇش اپانىڭ بىرەۋى قارتتار ۇيىنە تاپسىرىلادى. بالكىم، بىرەۋىنىڭ جولى بولىپ، ۇيىنە ورالىپ، جاقسى ءومىر ءسۇرىپ قالار دەپ ۇمىتتەنەمىز»، – دەيدى «قامقورلىق» ورتالىعىنىڭ ديرەكتورى جاندوس تۇسماعامبەتوۆ.