وتكەن اپتادا ششۋچينسك-بۋراباي كۋرورتتىق ايماعىنىڭ اۋماعىندا Rixos Borovoe وتەلى «اسىل ميراس» قايىرىمدىلىق قورىمەن بىرلەسىپ، اقمولا اكىمدىگىنىڭ قولداۋىمەن «Charity Tour de Burabay» V مەرەكەلىك قايىرىمدىلىق ۆەلوجارىسىن وتكىزدى دەپ حابارلايدى Qamshy.kz اقپارات اگەنتتىگى اقمولا وبلىسى ىشكى ساياسات باسقارماسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.
بۇل جوبانىڭ ماقساتى – بالالار اۋرۋحانالارىنا قازىرگى زامانعى مەديسينالىق جابدىقتار ساتىپ الۋ جانە اۋىر سىرقاتقا شالدىققان بالالارعا كومەك كورسەتۋ ءۇشىن اقشا قاراجاتىن جيناۋ بولىپ تابىلادى.
2013 جىلدان باستاۋ العان مەرەيتويلى ۆەلوشەرۋگە بيىل 1500-دەن اسا ادام جينالىپ، 718 قاتىسۋشى ششۋچە-بۋراباي اۋماعىنداعى 30 شاقىرىمعا سوزىلعان جولدى ۆەلوسيپەدپەن ەڭسەرىپ ءوتتى. ءىس-شارادا ۆەلوجارىستان بولەك، قايىرىمدىلىق اۋكسيون جانە بالالار سۋرەتىنىڭ جارمەڭكەسى ءوتتى. جالپى، كورپوراتيۆتىك جانە جەكە جارنالار، مەسەناتتاردىڭ جاناشىرلىق جاردەمى، اۋكسيوندار مەن جارمەڭكەلەر ەسەبىنەن تۇسكەن بۇل قايىرىمدىلىق قارجى قازاقستاننىڭ بالالارعا ارنالعان مەديسينالىق جانە تاربيە بەرۋشى مەكەمەلەرىن جابدىقتاۋعا باعىتتالادى.
جىل سايىنعى قايىرىمدىلىق ۆەلوشەرۋى اقمولا وبلىسى اكىمدىگىنىڭ قولداۋىمەن Rixos Borovoe قوناق ءۇيى «اسىل ميراس» قورىمەن بىرلەسە وتكىزىلەدى. ۇيىمداستىرۋشىلار ۆەلوشەرۋ قاتىسۋشىلارىنىڭ سانى جىلدان جىلعا ارتىپ كەلە جاتقانىن اتاپ وتۋدە.
ءىس-شارانىڭ اشىلۋىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى قۇتتىقتاۋ ءسوزىن سويلەدى. «Charity Tour de Burabay قازاقستاندا ۆەلوسيپەد سپورتىن دامىتۋعا جانە دارىپتەۋگە جاعداي جاساپ قانا قويماي، سونىمەن بىرگە، ەم مەن وڭالتۋعا مۇقتاج بالالارعا ەرەكشە كوڭىل ءبولىپ وتىرعانىمىزدى بايقاتادى»، – دەپ اتاپ ءوتتى مينيستر.
Charity Tour de Burabay يدەياسىنا باستاما بەرگەن بيزنەسمەن، مەسەنات جانە «اسىل ميراس» قايىرىمدىلىق قورىنىڭ نەگىزىن سالۋشى بولات وتەمۇراتوۆ ۆەلوشەرۋدى ارى قاراي دا وتكىزۋگە نيەتتى ەكەنىن جەتكىزدى. ول الداعى جىلدارى ءىس-شارانىڭ اۋقىمى كەڭەيىپ، كوپتەگەن بالالار كومەككە قول جەتكىزەتىنىنە ءۇمىت ءبىلدىردى.
قالىپتاسقان ءداستۇر بويىنشا پەلەتوندى «Astana Pro Team» كومانداسىنىڭ باس مەنەدجەرى الەكساندر ۆينوكۋروۆ باستاپ شىقتى. ۆەلوشەرۋ باستالار الدىندا وليمپيادا چەمپيونى ءارى قر-نىڭ ەڭبەك سىڭىرگەن سپورت شەبەرى بىلاي دەپ اتاپ ءوتتى: «Charity Tour de Burabay قازاقستاننىڭ سپورتتىق جانە قايىرىمدىلىق ءىس-شارالار كۇنتىزبەسىندە ماڭىزدى ورىنعا يە بولىپ وتىر. كوماندانىڭ اتىنان جانە ءوزىمنىڭ اتىمنان ۇيىمداستىرۋشىلاردىڭ بارلىعىنا، ىزگى باستامانىڭ جۇزەگە اسۋىنا قولعابىس ەتكەندەرگە العىسىمدى بىلدىرەمىن. بۇل ءىس-شارانى ءبىز جىلدا ۇلكەن قۋانىشپەن قولداپ وتىرامىز».
ۆەلوشەرۋگە الەكساندر ۆينوكۋروۆتان بولەك، قازاقستاندىق زىلتەمىرشى، وليمپيادا ويىندارىنىڭ ەكى دۇركىن چەمپيونى، الەمنىڭ ءتورت دۇركىن چەمپيونى، قازاقستاننىڭ ەڭبەك سىڭىرگەن سپورت شەبەرى يليا يلين، بوكسشى، وليمپيادا چەمپيونى، بوكستان قازاقستاننىڭ ەڭبەك سىڭىرگەن سپورت شەبەرى سەرىك ساپييەۆ تە قاتىستى.
سونىمەن قاتار، قازاقستاندىق اۋەسقوي-بوكسشى، 2016 جىلعى برازيلياداعى وليمپيادا ويىندارىنىڭ چەمپيونى دانيار ەلەۋسىنوۆ، رەسەي جانە قازاقستان تەننيسشىسى گالينا ۆوسكوبويەۆا جانە «Astana Pro Team» كومانداسىنىڭ مۇشەسى ياكوب فۋلسانگ سىندى سپورتشىلارىمىز دا بوي كورسەتتى.
قايىرىمدىلىق ۆەلوشەرۋى اياسىندا اۋكسيون وتكىزىلگەنىن ايتا كەتۋ كەرەك. ونى ۆەلوشەرۋدىڭ ناعىز باستى ءىس-شاراسى دەۋگە بولادى. شارا ۇيىمداستىرۋشىلارى بيىل جينالعان بۇكىل قارجىنى پەتروپاۆل قالاسىنداعى وبلىستىق بالالار اۋرۋحاناسىنا، تالدىقورعان قالاسىنداعى وبلىستىق پەريناتالدىق ورتالىققا، ورال قالاسىنداعى بالالارعا ارنالعان وبلىستىق كوپبەيىندى اۋرۋحاناعا، اقتوبە قالاسىنداعى بالالارعا ارنالعان كلينيكالىق اۋرۋحاناعا، ورال قالاسىنداعى باتىس قازاقستاندىق مۇگەدەك بالالاردىڭ «بايتەرەك» وبلىستىق قوعامدىق بىرلەستىگىنە ارناپ مەديسينالىق جابدىقتار ساتىپ الۋدى جوسپارلاپ وتىر.
بيىلعى جىلعى جينالعان قارجى سومماسى 160 ملن تەڭگەگە جەتكەن. بەس جىل ىشىندە جينالعان قارجى سومماسى 14 ەسەگە ارتىپ، 463،5 ملن تەڭگەنى قۇراعان. ال قاتىسۋشىلاردىڭ سانى 7 ەسەدەن استامعا وسكەن. 2017 جىلى اۋكسيوننان 102،9 ملن تەڭگە، بالالاردىڭ سۋرەتتەر جارمەڭكەسىنەن 684 مىڭ تەڭگە جينالدى. جەكە جانە كورپوراتيۆتىك جارنالار 30،4 ملن تەڭگەدەن اسىپ، مەسەناتتاردىڭ جاناشىرلىق جاردەمى 26 ملن تەڭگەگە جەتكەن.
جىل سايىن وتكىزىلەتىن Charity Tour de Burabay ۆەلوشەرۋى سالاۋاتتى ءومىر سالتىن ناسيحاتتاپ قانا قويماي، قازاقستاندىقتاردىڭ قايىرىمدىلىق ىسكە بەلسەندى قاتىسۋىنا جاعداي جاسايدى ءارى ىشكى ءتۋريزمنىڭ دامۋىنا ۇلكەن ۇلەسىن قوسۋدا.
پىكىر قالدىرۋ