اقش قورعانىس ءمينيسترى دجەيمس مەتتيس ءوزىنىڭ ۋكرايناعا ساپارى جونىندە تولىعىراق ايتىپ بەردى دەپ جازادى Qamshy.kz اقپارات اگەنتتىگى.
امەريكالىق باسىلىمداردىڭ مالىمەتىنشە، دجەيمس مەتتيس ستراتەگيالىق سەرىكتەستىك ورناتۋ مەن ۋكراينانىڭ ەگەمەندىگى مەن اۋماقتىق تۇتاستىعىن قولداۋ ماقساتىندا 24 تامىز كۇنى رەسمي ساپارمەن كييەۆ قالاسىنا بارماق.
«ۋكراينا پرەزيدەنتى پەتر پوروشەنكومەن جانە قورعانىس ءمينيسترى ستەپان پولتوراكپەن ستراتەگيالىق سەرىكتەستىكتى نىعايتۋ جانە ۋكراينانىڭ ەگەمەندىگى مەن اۋماقتىق تۇتاستىعىن قولداۋ جونىندە كەزدەسۋلەر جوسپارلادىم»، – دەپ مالىمدەدى مەتتيس جۋرناليستەرگە.
سونداي-اق، ۋكراينا قارۋلى كۇشتەرىن جابدىقتاندىرۋ جانە قوسىمشا قولداۋ كورسەتۋ جايى دا تالقىلاناتىن ماسەلەلەردىڭ قاتارىندا ەكەنىن جەتكىزدى.
«رەسەيدىڭ مينسك كەلىسىمى اياسىندا ءوزىنىڭ مىندەتتەرىن ورىنداتۋ ماقساتىندا قىسىم كورسەتۋ ءۇشىن ناتو وداقتاستارى جانە ۋكراينامەن كەلىسىمگە كەلۋ تۋرالى اقش باسپا ءسوز حاتشىسى رەكس تيللەرسوننىڭ ارەكەتىن قولدايمىن»، – دەدى مەتتيس.
سونىمەن بىرگە، اقش قورعانىس ءمينيسترى ۋكراينانىڭ تاۋەلسىزدىك كۇنىندە كييەۆتەگى اسكەري شەرۋدى تاماشالايتىن بولادى. ۋكراينا باسشىسى پەتر پوروشەنكو دجەيمس مەتتيستىڭ ەلگە ساپارىن مەرەكەنىڭ «باستى سىيلىعى» دەپ اتادى.
بۇدان بۇرىن ۋكراينا پرەزيدەنتى پەتر پوروشەنكو اقش-قا ساپارى بارىسىندا پەنتاگوننىڭ باسشىسىمەن كەزدەسكەنى حابارلانعان.
