جۋىردا عانا الاشۇلدارىنىڭ «پاي-پاي-پاي» اتتى انىنە تۇسىرىلگەن بەينەبايان جارىققا شىققان بولاتىن. كليپتىڭ بىرنەشە سەكۋندتىق تيزەرى الەۋمەتتىك جەلىلەردە تارالعان ساتتەن-اق، الاش ۇلى توبى مەن جاڭا تۋىندىلارى تالقىعا ءتۇسىپ، قوعامدا ەكى ءتۇرلى پىكىر قالىپتاستىرعان بولاتىن. اتاپ ايتار بولساق، ەلىمىزدە بەلەڭ الىپ جاتقان زاماناۋي ستيلدەرگە قاتىستى ۇلتتىق مۇددەنىڭ جويىلىپ بارا جاتقاندىعىنان كورىنىس بەرىپ، باتىس ەلدەرىنەن ەلىمىزگە سىڭگەن مادەنيەتتىڭ جاستار اراسىندا كەڭىنەن تارالىپ، ۇلتىمىزعا تيگىزىپ جاتقان كەرى اسەرلەرىن ونەر ارقىلى اشىپ كورسەتكەن. جەلى قولدانۋشىلارى "الاشۇلدارىنىڭ" بۇل بەينەبايانىن تىكەلەي "91" توبىنا باعىتتالعان دەپ، Q-pop فاناتتارى كليپكە قاتىستى وزىندىك كوزقاراستارىن ءبىلدىرىپ، ەكى توپتى ءوزارا سالىستىرا كەتتى. قىسقا عانا مەرزىمدە حالىق اراسىنا كەڭىنەن تارالىپ كەتكەن اتالمىش بەينەبايان، جوعارىدا اتاپ وتكەنىمىزدەي، قوعامنىڭ پىكىرىن ەكىگە جارىپ، ەكى ءتۇرلى پوزيسيانى قالىپتاستىردى. 

ءبىرى – قازاق ەر-جىگىتتەرىنىڭ بۇل ىس-ارەكەتتەرىن قۇپ كورىپ، العىستارىن بىلدىرسە، وزدەرىن Q-pop ءستيلىنىڭ ونەرپازدارى جانە فاناتتارى رەتىندە سانايتىندار اتالمىش توپتى 91 توبىمەن سالىستىرا ءتۇسىپ، تۇرلىشە نەگاتيۆتى پىكىرلەر ايتقان بولاتىن. ونەرپازدىڭ ءومىرى مەن ىس-ارەكەتتەرى قاشان دا ەلدىڭ نازارىندا، حالىقتىڭ تالقىسىندا جۇرەدى. قوعامدا تۋعان داۋعا قاتىستى بەينەباياننىڭ قانداي ماقساتتا تۇسىرىلگەنىنە بايلانىستى Qamshy.kz اقپارات اگەنتتىگىنىڭ ءتىلشىسى ەكى جاقتى – «الاش ۇلى» توبى مەن «91» توبىمەن سۇحباتتاسىپ، پىكىرلەرىن بىلۋگە تىرىستى.

تولىق نۇسقاسى شىقپاي جاتىپ ءبىراز ەلدىڭ سىنىنا ىلىككەن الاشۇلدارى اتالمىش بەينەبايانعا قاتىستى بىلاي دەيدى:

«جالپى بەينەبايان جايىندا ايتار بولساق، بۇل كليپ – ءبىزدىڭ ازاماتتىق پوزيسيامىز، قازاقستان رەسپۋبليكاسىنىڭ ازاماتى رەتىندە بولاشاققا دەگەن الاڭداۋشىلىعىمىز، ازاماتتىق كوزقاراسىمىز. كوپتەن بەرى ويىمىزدى مازالاپ جۇرگەن سۇراقتار. وسى تۇرعىدا ءوزىمىزدىڭ ازاماتتىق پوزيسيامىزدى ءبىلدىرىپ، وسىنداي دۇنيەنى جاساپ شىعارعىمىز كەلدى. ال كەز كەلگەن شىعارماشىلىق پروسەسس سەنارييدەن باستالادى. كليپتىڭ رەجيسسەرى – انۆار مادجانوۆ جانە دە الماس دەگەن جىگىت، بارلىعىمىز ويىمىزدى ورتاعا سالىپ، اقىلداستىق.

قازاق ەلىنىڭ ەلدىگىن، ۇلتتىق مۇددەسىن قۇرتاتىن مۇنداي دۇنيەلەر – ەلىمىزگە سىرتتان ەنىپ جاتقان كۇش. وسى پروسەستى قالاي كورسەتەمىز دەگەن سۇراق تۋىندادى بىزدە؟ ياعني، قالادا، اۋلادا قاراپايىم قازاقتىڭ قىز-جىگىتتەرى ويناپ، كوڭىل كوتەرىپ جاتقان جەرىنەن ەرەكشە ستيلدە كيىنگەن ءبىر ادام كەلىپ، بارلىعىن ءوزىنىڭ سوڭىنان ەرتىپ الىپ كەتەدى. سول ەرەكشە كيىمدى ادام ارقىلى ءبىز سىرتتان كەلىپ جاتقان مادەنيەتتى كورسەتكىمىز كەلدى. الەۋمەتتىك جەلىدە بارلىعى «قىزىل كيىمدى» ادامدى تالقىعا سالىپ، اركىمگە تەڭەپ جاتىر. الايدا بۇل ادام بەلگىلى ءبىر توپتىڭ جەتەكشىسىن نەمەسە پروديۋسەرىن كورسەتىپ، مازاق قىلۋ ەمەس. بۇل – شىعارماشىلىق پودحود، اللەگوريالىق كەيىپكەر دەپ اتاسا دا بولادى. كليپتە بىزگە قارسى ك-پوپەرلار، گوتتار، فريكيلار سەكىلدى مادەنيەتتىڭ ادامدارى بولادى. ەلىمىزدە قاتتى بەلەڭ الىپ جاتقان باسقاشا ۇعىمداعى مادەنيەتتەر وتە كوپ جانە دە ولارعا قوسىلۋشى توپتار دا كوبەيىپ كەلە جاتىر.

قازاق حالقى – وتە ەلىكتەۋشى حالىقپىز. ءيا، شەتتەن ۇيرەنۋ كەرەك، زاماننىڭ اعىمىمەن بىرگە دامۋ كەرەك. الايدا ءبىزدىڭ ۇلتىمىزدىڭ دا وزگە حالىقتاردان ارتىقشىلىعىمىز وتە كوپ. قازاق ۇلتىنىڭ مادەنيەت، تەكتىلىك، قان تازالىعى دەگەن سەكىلدى نارسەلەردى شەتەلدىكتەر بىزدەن ۇيرەنگىسى كەلەدى. ءبىراق قولدا باردا التىننىڭ ءقادىرىن بىلمەي جاتاتىن تۇستارىمىز بار. كەرىسىنشە ولاردىڭ مادەنيەتىن ءوزىمىزدىڭ ەلىمىزگە الىپ كەلىپ، قوعامدى ۋلاپ جاتىرمىز. وسى سىندى ءبىرقاتار ماسەلەلەرگە بايلانىستى الاشتىڭ ۇلدارى رەتىندە، ءوزىمىزدىڭ الاڭداۋشىلىعىمىزدى ءبىلدىرىپ، وزىندىك كوزقاراسىمىزدى بىلدىردىك».

– پاي-پاي-پاي» ءانىنىڭ كليپىنە قاتىستى الەۋمەتتىك جەلى قولدانۋشىلارى تۇرلىشە پىكىر ايتۋدا. بۇعان نە دەيسىزدەر؟

– اتالمىش تۋىندىمىزعا قاتىستى الەۋمەتتىك جەلىدە كوپتەگەن جاعىمسىز پىكىرلەر جازىلىپ جاتىر. ەڭ سوراقىسى، بۇل پىكىرلەردى ءوزىمىزدىڭ باۋىرلارىمىز، قازاقتىڭ قارا دومالاق بالالارى بىلدىرۋدە. ارينە قولدان كەلەر شاما جوق. بالكىم، باسقاشا ءتۇسىنىپ قالعان بولۋ كەرەك.

كاسىبي كوزقاراسقا كەلەر بولساق، بۇل بەينەبايانعا قاتىستى كوپتەگەن كليپتەر، كينولار ءتۇسىرىپ جۇرگەن رەجيسسەرلار، كاسىبي ماماندار وزدەرىنىڭ وڭ باعاسىن بەرىپ، «وتە جاقسى» دەپ باعالاۋدا. سونىمەن قاتار، شەتەلدەن، اسىرەسە تۇركيا، جۇڭگو ەلدەرىنەن وزدەرىنىڭ ريزاشىلىقتارىن ءبىلدىرىپ، ساپاسىنا «وتە جاقسى» دەپ باعالارىن بەرىپ جاتىر. بۇل تەك قازاقستاندا عانا ەمەس، تۇركيادا دا بەلەڭ الىپ جاتقان ماسەلە ەكەن. سول ەلدەگى قانداستارىمىز كوپتەگەن جاعىمدى، جاقسى پىكىرلەر ايتۋدا.

بۇل ماسەلەنى دوعارا الماسپىز، بالكىم، الايدا ءبىزدىڭ تۋىندىمىز ءوزىمىز سەكىلدى ويلايتىن، ەلىمىزدىڭ بولاشاعىنا الاڭدايتىن ادامداردىڭ مۇددەسى ءۇشىن ارنالعان دۇنيە دەپ قابىلداعان ءجون.

– 91 توبىمەن سالىستىرىپ، ءبىرشاما پىكىرلەر ايتىلدى. وسىعان قاتىستى نە ايتا الاسىز؟

– 91 توبىنا قاتىستى كوپ ايتىلىپ جاتىر، ول بالالاردىڭ ەڭبەكقورلىعىنا، شىعارماشىلىقتارىنا ەشنارسە دەمەيمىن. جاقسى اندەرى بار. ونەردەگى ىنىلەرىمىز بولىپ كەلەدى، سول سەبەپتى دە ولاردىڭ بەتتەرىنەن الىپ، اياقتارىنان شالۋ دەگەن ەشقانداي دا وي جوق.

ال الەۋمەتتىك جەلىدەگى جازىلىپ جاتقان پىكىرلەرگە قاتىستى ەشنارسە دەي المايمىن. اركىم نە جازسا دا، ءوزى بىلەدى. ەڭ باستىسى، ءبىز كوپ سويلەگەننىڭ ورنىنا ىس-ارەكەتىمىزبەن كورسەتۋدى ءجون كوردىك.

الاشۇلدارىنىڭ پىكىرلەرى وسىلاي بولدى. ال، اتالمىش بەينەبايانعا قاتىستى «91» توبى نە دەيدى؟

توپ مۇشەلەرىنىڭ وزدەرىمەن بايلانىسقا ءتۇسۋ مۇمكىن بولماعانمەن، ءبىز ولاردىڭ پروديۋسەرلەرى ەربولات بەدەلحانعا قوڭىراۋ شالىپ، الاشۇلدارىنىڭ بۇل تۋىندىسىنا ايتار پىكىرىن بىلمەك بولدىق. الايدا اتالمىش بەينەبايانعا قاتىستى قانداي دا ءبىر پىكىر بىلدىرۋگە ۇزىلدى-كەسىلدى قارسى بولعان ەربولات بەدەلحان: «مەن بۇعان قاتىستى ەشقانداي دا پىكىر بىلدىرمەيمىن، بۇل كليپتى كورگەن دە جوقپىن. ولارعا ەشنارسە دەپ جاۋاپ بەرمەيمىن. الاشۇلىنا تەك باقىت تىلەيمىن»، – دەگەننەن باسقا ەشنارسە ايتپادى.

جاستار اراسىندا قىزۋ تالقىعا تۇسكەن بەينەباياندى نازارلارىڭىزعا ۇسىنا وتىرىپ، ءوز پىكىرىڭىزدى ءبىلدىرۋىڭىزدى سۇرايمىز.

نازەركە لابيحان