UAE SWAT Challenge-2026 جارىسىندا قازاقستاندىق ارنايى جاساق ساربازدارىنىڭ كورسەتكەن ناتيجەلەرىنە ءتانتى بولعان الەكساندر ۆۋچيچ قاسىم-جومارت توقايەۆقا قاۋىپسىزدىك سالاسىندا تاجىريبە الماسۋدى ۇسىندى.
سەربيا باسشىسى حالىقارالىق UAE SWAT Challenge-2026 تۋرنيرىنە ەرەكشە توقتالدى. بۇل جارىسقا قازاقستان مەن سەربيا كوماندالارى قاتىستى. ۆۋچيچ قازاقستاندىق ارنايى جاساقتىڭ دايىندىق دەڭگەيىنىڭ وتە جوعارى ەكەنىن اتاپ ءوتىپ، ولاردىڭ سەربيالىق جاۋىنگەرلەردى وقىتۋىنا نيەت ءبىلدىردى.
“قازاقستان ءسوزسىز الەمدەگى ۇزدىك ەلدەردىڭ ءبىرى. سىزدەردىڭ ساربازدارىڭىز جوعارى ناتيجە كورسەتىپ وتىر. ولاردىڭ ءبىزدىڭ جاۋىنگەرلەرمەن تاجىريبە بولىسكەنىن قالار ەدىم”، – دەدى سەربيا پرەزيدەنتى.
سونىمەن قاتار سەربيا پرەزيدەنتى ولاردىڭ كومانداسى كەيبىر سايىس تۇرلەرىندە جاقسى ناتيجە كورسەتكەنىن، الايدا ءبىرقاتار جارىستاردا كۇتكەن ناتيجەگە قول جەتكىزە الماعانىن ايتتى. ال قازاقستاندىق جىگىتتەر مەن قىزدار بىردە-بىر جارىستا قاتەلىك جىبەرمەگەن.
“مەن بۇرىن-سوڭدى مۇندايدى كورگەن ەمەسپىن. سىزدەردىڭ ارنايى بولىمشەلەرىڭىزدىڭ قىزمەتكەرلەرى ەڭ جوعارى دايىندىق پەن كاسىبيلىك دەڭگەيىن كورسەتتى”، – دەپ تۇيىندەدى ۆۋچيچ.
ەسكە سالساق، بۇعان دەيىن قازاقستان دۋباي قالاسىندا وتكەن UAE SWAT Challenge-2026 جارىسىندا ايقىن جەڭىسكە جەتكەن بولاتىن.
UAE SWAT Challenge جارىسى كوپتەن بەرى ەليتالىق ارنايى بولىمشەلەرگە ارنالعان وزىندىك «وليمپيادا» رەتىندە باعالانىپ كەلەدى. مۇندا تەك فيزيكالىق دايىندىق قانا ەمەس، تاكتيكالىق ويلاۋ، جەدەل ارەكەت ەتۋ، مەرگەندىك، كوماندامەن ۇيلەسىمدى جۇمىس ىستەۋ جانە ۇلكەن قىسىم جاعدايىندا شەشىم قابىلداۋ قابىلەتى سىنالادى.
UAE SWAT Challenge -جاي عانا شارا ەمەس. بۇل – الەمنىڭ ۇزدىك ارنايى بولىمشەلەرى قاتىساتىن حالىقارالىق كاسىبي تۋرنير.