ەلباسى «سامۇرىق-قازىنا» اكسيونەرلىك قوعامى باسقارماسىنىڭ ءتوراعاسى ءومىرزاق شوكەيەۆتى قابىلدادى. بۇل تۋرالى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ حابارلايدى.

قازاقستان پرەزيدەنتى ەلىمىزدىڭ ەكونوميكاسىندا قوردىڭ ماڭىزدى ءرول اتقاراتىنىن اتاپ ءوتىپ، ونى ءارى قاراي دامىتۋدىڭ جەكەلەگەن باعىتتارىنا توقتالدى.

– «سامۇرىق-قازىنا» قورىنىڭ ەل ەكونوميكاسى ءۇشىن ماڭىزى زور. ول مەملەكەتتىڭ نەگىزگى اكتيۆتەرىن باسقارىپ وتىر. قازىرگى ۋاقىتتا احۋالى جاقسى. مەتالدار باعاسىنىڭ كونيۋنكتۋراسى قولايلى بولىپ قالۋدا، – دەدى نۇرسۇلتان نازاربايەۆ.

ءو.شوكەيەۆ مەملەكەت باسشىسىنا بيىلعى 7 ايدا اتقارىلعان جۇمىستاردىڭ قورىتىندىسى، سونداي-اق قوردى جانە ونىڭ ەنشىلەس كاسىپورىندارىن ترانسفورماسيالاۋ بارىسى تۋرالى باياندادى.

– قوردىڭ وندىرىستىك جانە باعا كورسەتكىشتەرى بىلتىرمەن سالىستىرعاندا الدەقايدا جوعارى. جالپى، قوردىڭ جاعدايى تۇراقتى. ءقازىر ەنشىلەس كومپانيالاردا ترانسفورماسيالاۋدىڭ 130-عا جۋىق جوباسى ەنگىزىلۋدە. جەكەشەلەندىرۋگە قاتىستى ايتار بولساق، جوسپارلانعان 2015 نىساننىڭ 60%-ى جەكەشەلەندىرىلدى. بۇگىندە ءىرى كومپانيالاردى ساتۋعا كىرىستىك، – دەدى «سامۇرىق-قازىنا» اكسيونەرلىك قوعامى باسقارماسىنىڭ ءتوراعاسى.

سونداي-اق، ءو.شوكەيەۆ حالىقارالىق IFSWF-2017 تاۋەلسىز ءال-اۋقات قورلارى فورۋمىن وتكىزۋگە دايىندىق بارىسى جونىندە ايتتى. وندا الەمدىك ەكونوميكا جاعدايىنداعى ينۆەستيسيالىق ساياسات ماسەلەلەرىن تالقىلاۋ جوسپارلانۋدا.

سوڭىندا ەلباسى ءبىرقاتار ناقتى تاپسىرما بەردى.