رەسەيدىڭ ءبىرىنشى ۆيسە-پريمەرى يگور شۋۆالوۆتىڭ ويىنشا، ەۋرازيالىق ەكونوميكالىق وداقتا رەسەي ەمەس، قازاقستان – كوشباسشى. بۇل تۋرالى رەسەيدىڭ بيلىك وكىلى بۇگىن «ەۋرازيالىق اپتالىق» حالىقارالىق فورۋمىندا ايتتى، دەپ حابارلايدى Qamshy.kz اقپارات اگەنتتىگى.
«ەاەق اياسىندا رەسەيدىڭ كوشباسشىلىق ەتۋى – اسا ءقاۋىپتى. دەگەنمەن بۇل باعىتقا بايلانىستى بىزدە تۇسىنىك تە بار، ماماندار دا جەتكىلىكتى. الايدا ءبىز ءوزىمىزدىڭ ءرولىمىزدى كورسەتە باستاساق، اتالمىش ساياسي جوبا كرەملگە ءتان دەگەن سەكىلدى قوعامدا داۋ تۋادى. ال قازاقستان پرەزيدەنتى جوبا يدەياسىنىڭ نەگىزىن قالاۋشى بولىپ تابىلادى. ول 90-جىلداردان باستاپ ەۋرازيالىق سەرىكتەستىك اياسىندا ءتۇرلى يدەيالاردى كوتەرگەن. سوندىقتان وسى جوبادا قازاقستاننىڭ كوشباسشىلىعىن مويىندايمىز»، – دەدى شۋۆالوۆ.
سونداي-اق، سيفرلى ەكونوميكانى قۇرۋ، شەكتەۋلەر مەن ايىرۋ ماسەلەلەرى بويىنشا ەۋرازيالىق ەكونوميكالىق وداقتى دامىتۋ تۇرعىسىندا قازاقستان كوشباسشىلىعىن كورگىسى كەلەتىنىن جەتكىزدى. ودان بولەك شۋۆالوۆ ەۋرازيالىق وداق بويىنشا وزگە دە سەرىكتەستەردىڭ اتالمىش پوزيسيانى قولدايتىنىنان ءۇمىتتى.
«ەۋرازيالىق سەرىكتەستىك قۇندىلىقتارىنىڭ كوشباسشىسى رەتىندە قازاقستان پرەزيدەنتى نۇرسۇلتان ءابىش ۇلى نازاربايەۆتى ۇلگى تۇتامىز. قازاقستاندا العا ىلگەرىلەۋ باستاماسى قالىپتاسادى دەپ سەنەمىز»، – دەدى ول.
