استانادا يادرولىق قاۋىپسىزدىك ماسەلەءسى قاراستىرىلادى. جۇمىسىن ەرتەڭ باستايتىن 62ء-شى پاگۋوش كونفەرەنسياسى بارىسىندا يادرولىق قاۋىپسىزدىك تىلگە تيەك ەتىلەدى. عىلىم جانە جاھاندىق پروبلەمالار جونىندەگى كونفەرەنسيا جۇمىسى 25 تامىز كۇنى ساعات 9:00-دە باستالادى. ق ر پارلامەنتى سەناتى مەن ق ر سىرتقى ىستەر مينيسترلىگىنىڭ قولداۋىمەن ۇيىمداستىرىلعان جيىنعا الەمنىڭ 46 ەلىنەن 200-دەن اسا دەلەگات كەلەدى، دەپ حابارلايدى Qamshy.kz اقپارات اگەنتتىگى.  

ءتورت كۇنگە جالعاساتىن پاگۋوش كونفەرەنسياسى «جاڭا يادرولىق قاۋىپ-قاتەرگە قارسى ءىس-قيمىل» تاقىرىبىندا وتەدى. شارانىڭ اشىلۋىنا ق ر پارلامەنتى سەناتىنىڭ ءتوراعاسى قاسىم-جومارت توقايەۆ، پاگۋوش كونفەرەنسياسىنىڭ پرەزيدەنتى دجايانتا داناپالا، بۇۇ-نىڭ قارۋسىزدانۋ ماسەلەلەرى جونىندەگى جوعارى وكىلى يسۋمي ناكاميسۋ،  يادرولىق سىناقتارعا جاپپاي تىيىم سالۋ تۋرالى شارتى ۇيىمنىڭ اتقارۋشى حاتشىسى لاسسينا زەربو قاتىسادى. بۇل تۋرالى بۇگىن ورتالىق كوممۋنيكاسيالار قىزمەتىندە ايتىلدى. كونفەرەنسيانىڭ جۇمىسىنا ارنالعان باسپا ءسوز جيىندا ق ر سىرتقى ىستەر ءمينيسترىنىڭ ورىنباسارى ەرجان اشىقبايەۆ:

– 62ء-شى پاگۋوش كونفەرەنسياسىنىڭ يادرولىق قاۋىپسىزدىك تاقىرىبىنداعى جيىنى ءبىزدىڭ ەلدە وتەتىنى بەكەر ەمەس. حالىقارالىق ۇيىم قازاقستاندى سۋىق قارۋدان باس تارتقان، بەيبىتشىلىك پەن تاتۋلىقتى ۇستانعان مەملەكەت رەتىندە مويىندايدى، – دەدى.

سونىمەن قاتار باسپا ءسوز جيىنىنا قاتىسقان پاگۋوش كونفەرەنسياسىنىڭ پرەزيدەنتى دجايانتا داناپالا ۇيىمنىڭ تاريحى مەن جۇمىسىنا توقتالدى.

1957 جىلى الەمدە يادرولىق سوعىستىڭ قاۋىپ-قاتەرلەرىن تالقىلاعان عالىمداردىڭ ءبىرىنشى حالىقارالىق كەزدەسۋى كانادانىڭ پاگۋوش قالاسىندا وتكەن. قالانىڭ قۇرمەتىنە اتالعان ۇيىم حالىقارالىق ستاتۋسقا يە.

استانادا وتكىزىلەتىن پاگۋوش كونفەرەنسياسىنىڭ ناتيجەسىندە «استانا دەكلاراسياسى» قابىلدانادى دەپ كۇتىلەدى.