ورتالىق افريكا رەسپۋبليكاسى كۇن باتارەياسى جۇيەلەرىن بەلسەندى تۇردە ەنگىزۋدە دەپ حابارلايدى Qamshy.kz اقپارات اگەنتتىگى.

بۇل تۋرالى ەكسپو-2017 حالىقارالىق مامانداندىرىلعان كورمەسى اياسىندا ورتالىق افريكا رەسپۋبليكاسىنىڭ ۇلتتىق كۇنىن مەرەكەلەۋ بارىسىندا ەلدىڭ ساۋدا جانە يندۋستريا مينيسترلىگىنىڭ باس ساۋدا ينسپەكتورى دجواحيم كوياگازومو مالىمدەدى. ءوز سوزىندە دجواحيم كوياگازومو قازىرگى كەزدە مەملەكەت ەنەرگەتيكانى دامىتۋ سالاسىندا بەلسەندى جۇمىس جۇرگىزۋدە ەكەنىن اتاپ ءوتتى. ونىڭ ايتۋىنشا، ەلدە جاقىن ارادا ۇلكەن كۇن باتارەيالار پاركى سالىنادى. سونىمەن قاتار، دجواحيم كوياگازومو ەكوجۇيەنى ساقتاۋ ءۇشىن جاڭارتىلاتىن ەنەرگيا كوزدەرىن ەنگىزۋ مەن دامىتۋدىڭ ماڭىزدىلىعىنا توقتالدى.  

«ورتالىق افريكا رەسپۋبليكاسى ەكوجۇيەنى قورعاپ، ونى دۇرىس باسقارۋدى كوزدەيدى. مەملەكەتىمىز 5،4 ملن. گا ەكۆاتورلىق قالىڭ ىلعال ورماندارىنا يە، ونىڭ 3،5 ميلليون گا اۋدانى باقىلانادى. جاڭارتىلاتىن ەنەرگيا كوزدەرىن ەنگىزۋ – ەلىمىزدىڭ دامۋى مەن ورمانداردى ساقتاۋعا قاجەتتى. تۇراقتى پروگرەسس ءىرى قالالار جانىنداعى ورماندى اۋدانداردىڭ قىسقارۋىنا اكەلدى. ەكسپو-2017 كورمەسى جاسىل ەنەرگەتيكا سالاسىندا تاجىريبە الماسۋعا مۇمكىندىك بەردى»، – دەدى دجواحيم كوياگازومو.

ءوز كەزەگىندە قازاقستان رەسپۋبليكاسى ءبىلىم جانە عىلىم مينيسترلىگىنىڭ جاۋاپتى حاتشىسى ارىن ورسارييەۆ ەكسپو-2017 كورمەسىنە قاتىسۋشى مەملەكەتتەردىڭ جوبالارى مەن جەتىستىكتەرى قازاقستان ءۇشىن پايدالى ءارى الەمدىك ەكونوميكانىڭ دامۋىنا جانە قورشاعان ورتانى ساقتاۋعا ىقپال ەتەتىندىگىنە سەنىم ءبىلدىردى.

«بولاشاق ەنەرگياسى» تاقىرىبىنداعى كورمە ەنەرگەتيكالىق رەسۋرستاردىڭ جويىلۋى جانە قورشاعان ورتانىڭ لاستانۋى ماسەلەلەرىن شەشۋدى ماقسات ەتكەن حالىقارالىق قاۋىمداستىق ءۇشىن ماڭىزدى. 2013 جىلى قازاقستان جاسىل ەكونوميكاعا كوشۋ تۇجىرىمداماسىن قابىلدادى. جىل سايىن ءجىو-نىڭ 2% كولەمىندەگى قاراجاتتى «جاسىل جاڭارتۋعا» ينۆەستيسيالاۋعا نيەتتىمىز»، – دەدى ارىن ورسارييەۆ.

ءوز سوزىندە ارىن ورسارييەۆ قازاقستان ورتالىق افريكا رەسپۋبليكاسىمەن ماقساتتى ەكونوميكالىق ىنتىماقتاستىعىن دامىتۋعا مۇددەلى ەكەندىگىن اتاپ ءوتتى.