قىلمىستىق توپپەن جاسالعان قىلمىستاردى ەسەپكە الماعاندا، بۇل وزگەرىس ەكونوميكالىق قىلمىستارعا قاتىستى. ۇستالعان ادام باستاپقىدا ايتقان سوزىنەن اينىپ قالماس ءۇشىن سوتقا جەتكىزۋ مەرزىمىن قىسقارتۋ جانە قىلمىستىق ءىستى تەرگەۋ شەڭبەرىنەن شىعاتىن دالەلدەمەلەردى الىپ تاستاۋ ۇسىنىلادى دەپ حابارلايدى Qamshy.kz اقپارات اگەنتتىگى. 

بۇل رەفورمالار حالىقارالىق ستاندارتتارعا ساي جاسالعان. وعان قوسا ەلىمىزدەگى قۇقىقتىق ساياساتىن ىلگەرى جالعاستىرۋ بولىپ تابىلادى. قۇقىقتىق سالاداعى وزگەرىستەرگە بايلانىستى بۇگىن ورتالىق كوممۋنيكاسيالار قىزمەتىندە باسپا ءسوز كونفەرەنسياسى ءوتتى. وعان جوعارعى سوتتىڭ قىلمىستىق ىستەر بويىنشا سوت القاسى ءتوراعاسىنىڭ مىندەتىن اتقارۋشى ەردەن ءارىپوۆ، باس پروكۋروردىڭ ورىنباسارى مارات احمەتجانوۆ جانە ىشكى ىستەر ءمينيسترىنىڭ ورىنباسارى راشيد جاقىپوۆ قاتىستى.

باسپا ءسوز كونفەرەنسيا بارىسىندا قۇقىق قورعاۋ ورگاندارى، سوت جانە باسقا دا مەملەكەتتىك ورگانداردىڭ وكىلدەرى قۇقىق قورعاۋ قىزمەتىن جەتىلدىرۋ جانە قىلمىستىق پروسەستى رەفورمالاۋدىڭ نەگىزگى جولدارىن تالقىلادى.

مارات احمەتجانوۆ، باس پروكۋروردىڭ ورىنباسارى:  

– ەلباسى باستاپ بەرگەن قۇقىقتىق ساياساتتى ىلگەرى جىلجىتۋ. ونىڭ ىشىندە – قىلمىستىق پروسەستى جەتىلدىرۋ، ادام قۇقىعىن قورعاۋدى نىعايتۋ، قىلمىستىق ساياساتقا قاراپايىم كوزبەن قاراۋ، – دەدى. 

جاڭا رەفورما جۇرگىزۋدىڭ جولدارىن ناقتىلاۋ ءۇشىن ۆەدومستۆوارالىق جۇمىس توبى ۇلىبريتانيا، گفر، ەستونيا جانە گرۋزيا مەملەكەتتەرىنىڭ قۇقىقتىق سالاسىن زەرتتەگەن. 

سونىمەن قاتار تۇتقىندالعان ادامدى سوت الدىنا اكەلۋ ۋاقىتى 72 ساعاتتان 48 ساعاتقا قىسقارتىلۋ ۇسىنىلعان.

اتاپ كورسەتىلگەن وزگەرىستەر مەن باستامالاردىڭ بارلىعى زاڭ جوباسىنا ەنىپ، ونىڭ نەگىزگى باعىتتارىن مەملەكەت باسشىسى ماقۇلداعان. قازىرگى ۋاقىتتا زاڭ جوباسى دايىندالىپ جاتىر.