2018 جىلى ناۋرىزدا رەسەي فەدەراسياسىنىڭ بيلىگىندە ۇلكەن وزگەرىس بولماق. 11 ناۋرىز كۇنى ەلدە پرەزيدەنتتىك سايلاۋ وتەدى. سايلاۋعا پۋتين تۇسە مە، جوق پا، ول جاعى ازىرگە بەلگىسىز. ءبىر باسشىنىڭ ورنىنا وزگەسى كەلسە، حالىق اراسىندا الاڭداۋشىلىق تۋىندايتىنى انىق. جەرگىلىكتى mk.ru پورتالى رەسەيلىك ساياساتكەرلەر اراسىندا پۋتيننەن كەيىنگى رەسەيدى قالاي ەلەستەتۋگە بولاتىنى جايىندا ساۋالناما جۇرگىزدى. ساراپشىلاردىڭ پىكىرىن Qamshy.kz اقپارات اگەنتتىگى وقىرمان نازارىنا ۇسىنادى.

اندرەي نەچايەۆ، بۇرىنعى ەكونوميكا ءمينيسترى

«كەز كەلگەن ادامنىڭ ورنىن باسۋعا بولادى. تەك ءبارى سەناريي بويىنشا جۇزەگە اسۋ كەرەك. پرەزيدەنتتىڭ ميراسقورى بيلىك جۇيەسىن ساقتاپ، ءداستۇرلى كۇيدە جالعاستىرسا، ءبارى وزگەرىسسىز كۇيدە قالىپ، بۇگىنگى بيلىك جۇيەسى ۇزاق جىلدارعا سوزىلاتىن بولادى.

ال ەگەر ءپۋتيننىڭ كونسەرۆاتيۆتىك كوزقاراستارىن قولدامايتىن، ۇستانبايتىن ادام كەلسە، ءبىرىنشى كەزەكتە ەكونوميكانىڭ  دامۋ باعىتى توقتاپ قالۋى ابدەن مۇمكىن. ەگەر ەكونوميكانى مەملەكەتتەندىرۋدى جاقتاۋشى، باسەكەلەستىكتى جانشۋ پروسەستەرى ورناسا، وندا مەملەكەت ۇلكەن توقىراۋعا ۇشىرايدى. ەلىمىزدە ەكونوميكالىق شەشىم قابىلداۋ جۇيەسى جوعارى ورتالىقتاندىرىلعان. بارلىق نەگىزگى شەشىمدەردى پرەزيدەنتتىڭ ءوزى قابىلدايدى».

دميتريي گۋدكوۆ، تاۋەلسىز ساياساتكەر

«پۋتين بۇگىندە قارتايىپ قالعان. ءبىرىنشى كەزەكتە مورالدىق تۇرعىدان شارشادى. جاڭا بۋىن – جاڭا تەحنولوگيا. ال پرەزيدەنت ەشقانداي جەلىگە تىركەلمەگەن، ءتىپتى سمارتفونى دا جوق. جاڭا بۋىن – بىر-بىرىمەن ۇزدىكسىز قارىم-قاتىناستا بولۋ. ال پرەزيدەنت حالىقپەن بايلانىسۋ ءۇشىن جىلىنا ءبىر رەت قانا تىكەلەي ەفيرگە شىعادى.   

جاڭا بۋىن – تەڭدىكتىڭ ورناعانى، شەكارانىڭ اشىلعانى».

انتون ورلوۆ، زاماناۋي ساياسي ماسەلەلەر ينستيتۋتىنىڭ ديرەكتورلار كەڭەسىنىڭ ءتوراعاسى

«كەلەسى پرەزيدەنتتى حالىق مىندەتتى تۇردە پۋتينمەن مۇقيات سالىستىرادى. بۇل جاعداي مەملەكەتتىڭ بولاشاق پرەزيدەنتى ءۇشىن اۋىر پسيحولوگيالىق جۇك بولماق.

ال ول ادام كىم بولادى دەگەن سۇراققا جاۋاپ بەرۋ قيىن، دەگەنمەن مەملەكەتتىڭ ودان تالاپ ەتەتىن دۇنيەلەرىن ءتىزىپ ايتۋعا بولادى. جاڭا باسشىنىڭ ۇلتتىق مۇددەنى قورعاي وتىرىپ، باتىس ەلدەرىمەن كەلىسىمگە كەلە الاتىن قابىلەتتىلىگى بولۋى شارت. ەگەر مەملەكەت ول ادامنان مۇنداي قاسيەتتى بايقاماسا، ەلدە توقتاتۋى قيىن نارازىلىق داۋى پايدا بولادى.

بۇگىندە رەسەيدىڭ جاعدايى مۇشكىل، ەكونوميكالىق داعدارىستى وتكەرىپ جاتىر. ال پۋتين – باستى ستابيليزاتور. ءبىزدى ەكى جاعداي كۇتىپ تۇر: ەلدە رەتسىز، بەرەكەسىز جۇيە ورنايدى، نە بولماسا مۇلدەم جاڭا ءارى جوعارى دەڭگەيگە ويىسامىز. باتىس ەلدەرى ەكونوميكالىق ساياساتتا رەسەيدى شەكتەپ قويۋى مۇمكىن. بۇل جاعداي ەلدىڭ توقىراۋىنا اكەلىپ سوعادى. سول سەبەپتى مەملەكەتتىڭ بولاشاق باسشىسىنىڭ ءار قادامى رەسەيدى نە وشىرەدى، نە وسىرەدى».

ۆالەريي راشكين، رەسەي كوممۋنيستىك پارتياسىنىڭ ماسكەۋ قالالىق كوميتەتىنىڭ ءبىرىنشى ورىنباسارى  

«ءپۋتينسىز الەم دە، رەسەي دە قۇلدىرامايدى. ءتىپتى وزگەرىس بولعان جاعدايدىڭ وزىندە، ەلگە ەشقانداي ءقاۋىپ تونبەيدى. پۋتين قالىپتاستىرعان بيلىك جۇيەسى دەموكراتيانى دەگراداسياعا ۇشىراتتى، بيلىكتەگى ادالدىق پەن تۇتاستىق تۇجىرىمدارى جويىلدى، جەمقورلىقپەن كۇرەستىك، ءسويتىپ جەڭىلدىك. كىمنىڭ قانشا ۇرلاعانى، ونى كىمنىڭ ۇرلاعانى ماڭىزدى ەمەس. ول ادام قولعا تۇسسە دە، جازالانبايدى.

الايدا ەل يگىلىگى ءۇشىن ىستەگەن ەڭبەكتەرىن دە ايتىپ وتپەسكە بولماس. قىرىمنىڭ تاعدىرى شەشۋدە، اۋىر جولداردى وتكەردى. ءبىز ونىڭ باعىتىن سول جولعا بۇرعانىمىزبەن، شەشىم قابىلداۋ ءۇشىن دە ەركەكتىك مىنەز كەرەك ەدى.

پۋتين وزىندىك بيلىك جۇيەسىن قالىپتاستىرعان جوق. ول ەلسين مەن گايداردىڭ جولىن جالعاستىرىپ كەلەدى. سولاردىڭ ساياساتىن اينا-قاتەسىز ورىنداپ كەلدى. ال پۋتيننەن كەيىن حالىق تولقيدى ما؟ مەنىڭ ويىمشا، كەلەسى سايلاۋدا ناعىز باسەكەلەستەر كۇرەسى ورنايدى. سەبەبى قوعام ءپۋتيننىڭ باعىتتارىنان مەزى بولدى».