ءماجىلىس دەپۋتاتى ابزال قۇسپان پرەمەر-مينيستر ولجاس بەكتەنوۆكە جولداعان دەپۋتاتتىق ساۋالىندا كيىكتەرگە قاتىستى ماسەلە كوتەردى.

دەپۋتاتتىڭ سوزىنشە، تابيعي تەپە-تەڭدىكتى ساقتاۋ جولىندا ۇكىمەتتىڭ ارەكەتسىزدىگى اۋىل شارۋاشىلىعىنا ورنى تولماس زيان كەلتىرىپ وتىر.

مەملەكەت باسشىسى ۇلتتىق قۇرىلتايدا كيىك پوپۋلياسياسىنىڭ كۇرت ءوسۋى اۋىل شارۋاشىلىعىنا كەرى اسەر ەتىپ، ەكوجۇيەگە ارتىق سالماق ءتۇسىرىپ جاتقانىن اتاپ ءوتتى. بۇل ماسەلە ءبىر كۇندە پايدا بولعان جوق – ايماقتاردان اتقارۋشى بيلىككە جولدانعان جۇزدەگەن ءوتىنىش پەن تالاپ-ارىز ۇكىمەت تاراپىنان جىلدار بويى ەلەۋسىز قالىپ كەلەدى.

2023 جىلى بۇۇ جانىنداعى جابايى جانۋارلاردىڭ قونىس اۋداراتىن تۇرلەرى كوميتەتىنىڭ (CMS) ساراپشىلارى ارنايى كەلىپ، باتىس قازاقستان وبلىسىنىڭ اۋداندارىن ارالادى. زەرتتەۋ ناتيجەسىندە ق ر ۇكىمەتىنە ناقتى ۇسىنىستار جاسالدى، ولاردىڭ باستىسى – جەرگىلىكتى حالىق پەن كيىك اراسىنداعى قاقتىعىستى شەشۋ. الايدا، ۇكىمەت كۇنىبۇگىن بۇل ۇسىنىستاردى ورىنداۋ بويىنشا ناقتى ءبىر ىس-ارەكەتكە كوشكەن جوق، - دەدى ابزال قۇسپان.

وسىعان بايلانىستى دەپۋتات ۇكىمەتتەن تالاپ ەتتى:

1. كيىك پوپۋلياسياسىن رەتتەۋ بويىنشا ناقتى شارالار قابىلداۋدى، اتاپ ايتقاندا:

• بيىل كيىك سانىن رەتتەۋ جۇمىستارىن جۇرگىزۋ تۋرالى رەسمي شەشىم قابىلداپ، ونىڭ ادىستەرى مەن ەكولوگيالىق نەگىزدەمەسىن جاريالاۋدى؛

• كيىك پوپۋلياسياسىن رەتتەۋ بويىنشا جاۋاپتى ءبىر مەملەكەتتىك ورگاندى بەلگىلەۋدى جانە ونىڭ ناقتى ءىس-شارالارىن بەكىتۋدى.

وسى جەردە ايتا كەتەتىن ءبىر ماسەلە – كەڭەس ۇكىمەتى كەزىندە كيىكتىڭ ەتى دە، تەرىسى دە پايداعا استى، ولاردىڭ سانى سوڭعى كەزدەگىدەي كۇرت وزگەرىستەرگە ۇشىراعان جوق، ونىڭ باستى سەبەبى – كيىك ءۇشىن جاۋاپتى ناقتى ءبىر مەكەمە بولعاندىعىندا. كيىك ءونىمىن حالىق شارۋاشىلىعىنا پايدالانىلۋىن، ازايىپ كەتسە دە، كوبەيىپ كەتسە دە جاۋاپ بەرەتىن ءبىر عانا مەكەمە ەدى. ال قازىرشە؟ كيىكتى قورعايتىن مەكەمە ءوز الدىنا، ال اتۋعا، ليسەنزياسى بار كەز-كەلگەن اڭشىنى قۇقىلى قىلىپ قويدىڭىزدار. ودان قالا بەردى، ەتىن، تەرىسىن پايدالانىلۋىن نەمەسە عالىمدارمەن جۇمىستى ۇيلەستىرىپ وتىراتىن جاۋاپتى ناقتى ءبىر ۇيىم، مەكەمە جوق، - دەيدى ماجىلىسمەن.