بۇگىن قازاق ەلى بەلگىلى ەتنوگراف، جازۋشى جانە عالىم بولات بوپايۇلىن اقتىق ساپارعا شىعارىپ سالدى. 

قالامگەردىڭ جانازا نامادى الماتىداعى قونايەۆ مەشىتىندە وقىلدى.

جانازاعا كۇللى ادەبيەت سۇيەر قاۋىم جينالىپ، جازۋشىمەن قوشتاستى.

 بولات بوپاي ۇلى 1960 جىلى 1 قاڭتاردا جۇڭگو حالىق رەسپۋبليكاسىنىڭ التاي ايماعى، كوكتوعاي اۋدانىندا دۇنيەگە كەلگەن. ول 1986 جىلى ىلە پەداگوگيكالىق ۋنيۆەرسيتەتىنىڭ قازاق ءتىلى مەن ادەبيەتى فاكۋلتەتىن، 1998 جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلولوگيا فاكۋلتەتىنىڭ قازاق ادەبيەتى مەن تەورياسى كافەدراسىندا اسپيرانتۋرانى ءتامامداعان.  

ەڭبەك جولىن ءۇرىمجى قالاسىندا ۇستازدىق ەتۋدەن باستاپ، «شىڭجاڭ جاستار-ورەندەر باسپاسىندا» رەداكتور قىزمەتىن اتقاردى. قازاقستانعا قونىس اۋدارعان سوڭ، ەتنوگرافيا سالاسىندا تەرەڭ زەرتتەۋلەر جۇرگىزىپ، 30-دان استام كىتاپ جازدى. ونىڭ ەڭبەكتەرى قازاق حالقىنىڭ ءسالت-داستۇرىن، دۇنيەتانىمىن، ۇلتتىق بولمىسىن زەرتتەۋگە ارنالدى. «قازاق مىنەزى»، «قازاق كادەسى»، «قازاقى ءتۇس جورۋ»، «باستاۋدان باقيعا دەيىن»، «قازاقتىڭ گۇل مادەنيەتى»، «قازاق ناۋرىزناماسى»، «قازاق اسپان ەسەبى» سياقتى ەڭبەكتەرى ۇلتتىق قۇندىلىقتاردى ۇرپاققا جەتكىزۋدە ماڭىزدى ءرول اتقاردى.  

بولات بوپاي ۇلى – قازاقستان جازۋشىلار وداعىنىڭ جانە قازاقستان جۋرناليستەر وداعىنىڭ مۇشەسى، قازاق ۇلتتىق ءسالت-داستۇر، ادەت-عۇرىپ اكادەمياسىنىڭ اكادەميگى. ول «مادەنيەت ۇزدىگى» توسبەلگىسىمەن ماراپاتتالىپ، قازاقستان رەسپۋبليكاسىنىڭ قۇرمەتتى ازاماتى اتانعان.  

 ونىڭ شىعارماشىلىعى مەن عىلىمي ەڭبەكتەرى قازاق مادەنيەتى مەن ءداستۇرىن زەرتتەۋگە جانە ناسيحاتتاۋعا زور ۇلەس قوستى. بولات بوپاي ۇلىنىڭ مول مۇراسى ۇلت جادىندا ماڭگى ساقتالادى.   

65 جاسىندا كوز جۇمعان ەتنوگرافتىڭ دەنەسى كەڭساي زيراتىنا جەرلەندى.