قازاقستاننىڭ تۇركياداعى ەلشىلىگى ەلدەگى جاعدايعا بايلانىستى رەسپۋبليكا ازاماتتارىنا ۇندەۋ جاساپ، ساقتىق شارالارىن ساقتاۋعا شاقىردى.

ەلشىلىك قالىپتاسقان جاعدايعا بايلانىستى قازاقستاندىقتاردى:

حالىق كوپ جينالاتىن ورىندارعا بارماۋعا؛

شەرۋلەر مەن ميتينگىلەرگە قاتىسپاۋعا؛

كۇشەيتىلگەن قاۋىپسىزدىك شارالارىن ساقتاۋعا؛ 

قىراعىلىق پەن ساقتىققا؛

جاڭالىقتاردى قاداعالاپ، بيلىكتىڭ نۇسقاۋلىقتارىن ورىنداۋعا؛

قازاقستاننىڭ تۇركياداعى ديپلوماتيالىق وكىلدىكتەرىمەن بايلانىستا بولۋعا شاقىردى.

سونىمەن قاتار الەۋمەتتىك جەلىدە ميتينگتەر تۋرالى اقپاراتتى جانە بولعان وقيعالارعا قاتىستى باعا بەرىپ، پىكىر بىلدىرۋدەن اۋلىق بولىڭدار دەپ ەسكەرتتى. 

قازاقستاننىڭ تۇركياداعى شەتەلدىك وكىلدىكتەرىنىڭ جەدەل جەلى تەلەفوندارى:

1. قازاقستان رەسپۋبليكاسىنىڭ انكاراداعى ەلشىلىگى: +905352734496

2. قازاقستان رەسپۋبليكاسىنىڭ ىستانبۇلداعى باس كونسۋلدىعى: +905012621465

3. قازاقستان رەسپۋبليكاسىنىڭ انتالياداعى باس كونسۋلدىعى: +905394400522

4. قازاقستان رەسپۋبليكاسىنىڭ يزميردەگى باس كونسۋلدىعى: +905530998789

ەسكە سالايىق، بۇعان دەيىن 19 ناۋرىزدا ىستامبۇل مەرى جانە ونىڭ سەرىكتەرى ۇستالدى. شەندىلەردى جەمقورلىق، پاراقورلىق جانە ساتىپ الۋ ارەكەتتەرىنە قاتىسى بار دەپ ايىپتادى.

شەنەۋنىكتەردى پوليسيا 4 كۇن بويى قاماۋدا ۇستايدى دەپ جوسپارلانعان. قالادا جاپپاي تارتىپسىزدىكتەردىڭ الدىن الۋ ءۇشىن 4 كۇنگە نارازىلىق اكسيالارىنا تىيىم سالىندى. كولىك قوزعالىسىنا جانە مەترو جەلىلەرىنىڭ جۇمىسىنا شەكتەۋلەر ەنگىزىلدى. كەيىن بۇكىل تۇركيادا جاپپاي نارازىلىقتار باستالىپ، ولاردىڭ ءالى دە جالعاسۋى مۇمكىن ەكەنى ايتىلدى.

بۇعان دەيىن تۇركيانىڭ باس پروكۋراتۋراسى يماموگلۋنىڭ "بيزنەس باسقارۋ" ماماندىعى بويىنشا العان ديپلومىنىڭ شىنايىلىعى مەن زاڭدى كۇشىن تەكسەرۋ ءۇشىن ىستامبۇل ۋنيۆەرسيتەتىنە سۇراۋ سالعان. ونىڭ سولتۇستىك كيپردەگى ۋنيۆەرسيتەتتەن ىستامبۇلعا اۋىسۋى كەزىندە زاڭ بۇزۋشىلىقتار بولعانى تۋرالى كۇدىك تۋعان. ويتكەنى سول كەزدە بۇل وقۋ ورنى تۇركيا تاراپىنان رەسمي مويىندالماعان. بۇعان بايلانىستى 17 ناۋرىزدا ىستامبۇل ۋنيۆەرسيتەتى يماموگلۋنىڭ ديپلومىن جارامسىز دەپ تانىدى. بۇل ونىڭ پرەزيدەنتتىك سايلاۋعا قاتىسۋىنا قيىندىق تۋعىزۋى مۇمكىن.