اقپارات جانە قوعامدىق دامۋ ءمينيسترى ايدا بالايەۆا "قازاقفيلم" جەرىنىڭ ساتىلعانىنا قاتىستى اقپاراتتى جوققا شىعارىپ، ەل اراسىندا جۇرگەن قاۋەستكە نۇكتە قويدى.

مينيستر كينوستۋدياعا بايلانىستى اقپارات قوعامدا قىزۋ تالقىعا تۇسكەنىن اشىق ايتتى. سونداي-اق قازاقستاندىقتاردىڭ "ءقازاقفيلمنىڭ” تاعدىرىنا الاڭداۋشىلىق بىلدىرگەنىنە قۋانعانىن دا جاسىرمادى.

“ەڭ الدىمەن ايتارىم، كينو سالاسىنا قاتىسى بار تۇلعالاردىڭ كينوستۋديا توڭىرەگىندەگى پروسەستەرگە قاتىستى ءوز پىكىرىن بىلدىرۋگە قۇقىعى بار. الايدا اقپارات تاراتقاندا تەك فاكتىلەرگە سۇيەنۋگە كەڭەس بەرەمىن. "زاڭ مەن ءتارتىپ" قاعيداتى بارشاعا ورتاق، ال ونى ەلەمەۋ ءتيىستى زاڭ اياسىندا جاۋاپكەرشىلىككە اكەلىپ سوعادى. بىرىنشىدەن، "قازاقفيلم" جەرىنىڭ ساتىلۋى جونىندەگى اقپاراتقا قاتىستى. بۇل ماسەلە توڭىرەگىندەگى نەگىزسىز قاۋەسەت ءبىرجولا توقتاتىلۋى ءتيىس. "قازاقفيلمگە" تيەسىلى جەرلەر كينوستۋديا يەلىگىندە قالا بەرەدى. جەر ساتىلعان جوق جانە تەك كينەماتوگرافيا مۇددەسى ءۇشىن پايدالانىلىپ جاتىر”، – دەپ جازدى ايدا بالايەۆا.

ول كينوستۋديانى جوندەۋگە قوماقتى قارجى سالۋعا دايىن ينۆەستورلار جايلى اقپاراتتىڭ راستالماعانىن اتاپ ءوتتى. ايتۋىنشا، مادەنيەت جانە اقپارات مينيسترلىگى ناقتى ينۆەستورلارمەن جۇمىس ىستەۋگە دايىن بولعانىمەن، ازىرگە ەشقانداي ناقتى ۇسىنىس، بىردە-بىر كەپىلدىك حاتى جوق. بارلىعى تەك اڭگىمە دەڭگەيىندە.

مينيستر كينوستۋديانىڭ استاناعا كوشۋ ماسەلەسىنە قاتىستى پىكىر ءبىلدىردى. 

“بۇل دا ەشقانداي نەگىزى جوق قاۋەسەت. قازىرگى ۋاقىتتا ەلورداعا "قازاقانيماسيا" شىعارماشىلىق بىرلەستىگىن كوشىرۋ مۇمكىندىگى قاراستىرىلىپ جاتىر. مۇندا ماڭىزدى جايت – "قازاقانيماسيا" وندىرىستىك بازا ەمەس، انيماسيالىق كونتەنت جاساۋعا تاپسىرىستاردى بولەتىن قۇرىلىم. سوندىقتان ونىڭ استاناعا كوشۋى سالانىڭ جۇمىسىنا ەش كەدەرگى كەلتىرمەيدى. وكىنىشكە قاراي، كەيىنگى بەس جىلدا ەلىمىزدە ساپالى انيماسيالىق فيلمدەر تۇسىرىلگەن جوق. وسىعان بايلانىستى انيماسيالىق يندۋستريانى كرەاتيۆتى يندۋستريالار قورىنىڭ اياسىندا دامىتۋ ورىندى بولماق. قور قۇرىلىمىندا انيماسيانى دامىتۋعا باعىتتالعان كرەاتيۆتى حاب جاساقتالىپ جاتىر”، – دەدى اقپارات جانە قوعامدىق دامۋ ءمينيسترى.

ايدا بالايەۆانىڭ ايتۋىنشا، پرەزيدەنت قول قويعان جاڭا زاڭعا سايكەس ەلىمىزدە فيلمدەردى قارجىلاندىرۋدىڭ جالپى كولەمىنىڭ كەمىندە 30%-ى جىل سايىن تىكەلەي "قازاقفيلمگە" باعىتتالادى.