ءۇيدىڭ ساندىعىندا جاتقان اسىل مۇرا مۋزەيگە ورالىپ جاتىر. ورالدا جۇرت كونە قۇراندار مەن قولجازبالاردى جاپپاي وتكىزىپ، وبلىستىق مۋزەي قورىن 200-گە جۋىق جادىگەرمەن تولىقتىردى.

200-گە جۋىق ارتەفاكت مۋزەيگە ءتۇستى

2025 جىلى باستالعان قوعامدىق باستاماعا ءوڭىر تۇرعىندارى ءۇن قوستى. مۋزەي قىزمەتكەرلەرى اكەلىنگەن دۇنيەلەردى قابىلداپ، تىزىمگە الۋ مەن عىلىمي سيپاتتاما جازۋ جۇمىسىن جۇرگىزىپ جاتىر.

جينالعان ەكسپوناتتاردىڭ قاتارىن كونە قۇران باسىلىمدارى، عاسىرلىق تاريحى بار كىتاپتار جانە ءارتۇرلى جازبا ەسكەرتكىشتەر قۇرادى.

قورعا قالاي وتكىزىلەدى

يەلەرىنىڭ قالاۋىمەن قۇجاتتار مەن كىتاپتار مۋزەيدىڭ تۇراقتى نە ۋاقىتشا قورىنا قابىلدانادى. وسىلايشا، وتباسىلىق شەجىرە مەن ەل تاريحىنا قاتىستى سيرەك دۇنيەلەر كاسىبي جاعدايدا ساقتالادى.

كاتالوگتار قازاق تىلىندە، QR-كودپەن شىعادى

وبلىستىق تاريحي-ولكەتانۋ مۋزەيىنىڭ ديرەكتورى جانتاس سافۋللين كاتالوگتار تۋرالى مالىمەت بەردى: «كاتالوگتاردى QR-كودپەن شىعارامىز. نەگىزگى نۇسقانى قازاق تىلىندە ازىرلەيمىز، ال ىلەسپە اۋدارمالاردى QR-كود ارقىلى ۇسىنامىز. عالىمدار كاتالوگتارمەن تانىسىپ، كەيىن قورداعى تۇپنۇسقامەن جۇمىسىن جالعاستىرا الادى»، – دەدى ول.

مالىمەت پاراقشالارى قازاق، ورىس، اعىلشىن جانە تۇرىك تىلدەرىندە دايىندالىپ، جيناق كۇيىندە باسىلىپ شىقپاق.

ۇلتتىق مۇرانى بىرگە ساقتايىق

زەرتتەۋشىلەردىڭ ايتۋىنشا، حالىق قولىندا ءالى دە انىقتالماعان قۇندى جازبالار مەن كىتاپتار كوپ. مۋزەي ماماندارى يەلەرىمەن بايلانىسىپ، جادىگەرلەردىڭ شىعۋ توركىنىن انىقتاپ، عىلىمي اينالىمعا قوسۋ جۇمىسىن جالعاستىرىپ جاتىر.

تاريحقا نەمقۇرايدى قاراماعان جۇرتتىڭ ارقاسىندا وڭىرلىك قور تولىقسىپ، ۇلتتىق جادىنىڭ جازبا ايعاقتارى ساقتالىپ جاتىر.

بۇل تۋرالى ايماقتاعى تەلەارنا سيۋجەتىندە حابارلاندى.

بۇل تۋرالى Qamshy.kz اقپارات اگەنتتىگى حابارلايدى.