جەلىدە بىرنەشە كۇن بۇرىن Ay Yola مۋزىكالىق جوباسىنىڭ Homay كومپوزيسياسى تارادى. ءان باشقۇرت تىلىندە ايتىلعان. ول ءبىر كۇندە حيتكە اينالىپ، قازاقستاندىقتار اراسىندا كەڭىنەن تانىلىپ جاتىر.

Ay Yola توبىنىڭ Homay ءانى 14 ناۋرىزدا شىقتى. ءاننىڭ ءسوزىن ديانا كيلدينا جازعان. وسى ۋاقىت ىشىندە Ay Yola YouTube-ارناسىنداعى بەينەبايان 930 مىڭنان استام قارالىم جيناعان. سونداي-اق ءاننىڭ ءبىرىنشى شۋماعىن عانا قامتيتىن مىڭداعان ۆيدەو عالامتورعا تاراپ كەتتى.

“Ay Yola-نىڭ Homay ءانى ەكى كۇننەن بەرى ويىمنان كەتەر ەمەس. ونى قايتا-قايتا تىڭداپ ءجۇرمىن. ءار جولى ماڭىزدى نارسەنى سەزىنەمىن. ونىڭ نە ەكەنىن ناقتى تۇسىندىرە المايمىن. ءبىراق ول مەنىڭ گەنەتيكالىق جادىمداعى ءبىر سۇراققا جاۋاپ بەرگەندەي”، “وسى ءاندى تىڭداسام قاتتى تولقيمىن. باشقۇرت نەمەسە تاتار ەمەسپىن، قىرعىزبىن، ءبىراق بۇل ءان ماعان جاقىنىراق سياقتى”، “Homay-دى قايتالاپ تىڭداپ وتىرمىن. ءان ارقىلى تەرەڭ تاريحىمىزدى ەسكە تۇسىرەمىن. اتا-بابالارىمىز باسىنان وتكەرگەن كەزەڭدەردى كوز الدىما ەلەستەتەمىن”، “باشقۇرتتاردىڭ Ay Yola توبى جازعان Homay ءانى جەلىلەردە كەڭىنەن تاراپ جاتىر. بۇل اتاۋ باشقۇرتتاردىڭ "ورال-باتىر" ەپوسىنان شىققان ميفتىك حوماي قۇسىنا قاتىستى. تۇركى حالىقتارىنىڭ ميفولوگياسىندا حوماي قۇسى ("حۋمو") ۇماي تاڭىرىمەن بايلانىستىرىلعان ساتتىلىك پەن باقىت سيمۆولى. ەندى بۇل ترەك تۇركى حالىقتارىنىڭ ءبارىنىڭ پلەيليستىندە بار"، – دەپ جازدى جەلى قولدانۋشىلارى.