الماتى قالاسىندا بۇگىن كورىسۋ كۇنىنە وراي تەاترلاندىرىلعان كونسەرت ءوتتى. بۇل ءىس-شارا ناۋرىزناما ونكۇندىگىنىڭ باستالۋىن بىلدىرەدى. اتالعان شاراعا قالا اكىمىنىڭ ورىنباسارى ازامات قالدىبايەۆ تا قاتىستى. 

«كوكتوبەدەگى امال كۇنى» كونسەرتى ساعات 11:00-دە باستالدى. روزا رىمبايەۆا، جانار ايجانوۆا، «جىگىتتەر» توبى، ايگۇل قوسانوۆا جانە «الاتاۋ» ءداستۇرلى ونەر تەاترىنىڭ ارتيستەرى ونەر كورسەتتى. سونداي-اق مەرەكە قۇرمەتىنە ساعات 9:00-دەن 13:00-گە دەيىن اسپالى جولمەن ءجۇرۋ تەگىن بولادى.

ايتا كەتەيىك، 14 ناۋرىز كۇنى قازاقستاندا جالپىۇلتتىق «ناۋرىزناما» ونكۇندىگى باستالادى. 

كورىسۋ كۇنى – قازاق حالقىنىڭ ەجەلدەن كەلە جاتقان دوستىق پەن بىرلىكتى، اعايىن اراسىنداعى سىيلاستىقتى دارىپتەيتىن مەيرام. بۇل كۇن ءار جىلى 14 ناۋرىزدا اتاپ وتىلەدى. اسىرەسە، باتىس قازاقستان، اتىراۋ، اقتوبە، ماڭعىستاۋ وڭىرلەرىندە كەڭىنەن تويلانادى. كەيىنگى جىلدارى بۇل ءداستۇر ەلىمىزدىڭ باسقا دا ايماقتارىندا بەلسەندى تۇردە جاڭعىرىپ كەلەدى.