ناۋرىز بەن ءساۋىر ايلارىندا بولجام بويىنشا، اۋا رايى جىلىنىپ، مول جاۋىن-شاشىن تۇسپەك.  وسىعان بايلانىستى اقمولا، قوستاناي، اقتوبە، باتىس قازاقستان، اتىراۋ وبلىستارىنىڭ اكىمدەرى وڭىرلەردە ەلدى مەكەندەردى سۋ باسۋدىڭ الدىن الۋ بويىنشا اتقارىلىپ جاتقان شارالار تۋرالى باياندادى، دەپ حابارلادى primeminister.kz. 

13 ناۋرىزداعى جاعداي بويىنشا ەلىمىزدىڭ قار باسىپ جاتقان اۋماعى 67%-دى قۇرايدى. ەكولوگيا جانە تابيعي رەسۋرستار ءمينيسترى ەرلان نىسانبايەۆ قىزىلوردا، تۇركىستان، جامبىل، باتىس قازاقستان، اتىراۋ جانە ماڭعىستاۋ وبلىستارىندا ءقازىردىڭ وزىندە قار ەري باستاعانىن ايتتى. بۇل رەتتە ەلىمىزدىڭ سولتۇستىك-باتىسىندا، سولتۇستىك-شىعىسىندا جانە ورتالىعىندا توڭنىڭ قالىڭ بولۋى بايقالىپ وتىر. قوستاناي وبلىسىندا 150 سم-گە دەيىن جانە ودان دا كوپ، اقمولا وبلىسىندا – 139 سم-گە دەيىن، پاۆلودار وبلىسىندا – 159 سم-گە دەيىن، قاراعاندى وبلىسىندا –132 سم-گە دەيىن توڭ بار. بولجامدارعا سايكەس، ناۋرىز جانە ءساۋىر ايلارى جىلى بولادى دەپ كۇتىلۋدە، ەلىمىزدىڭ باسىم بولىگىندە جاۋىن-شاشىن مول بولادى، بۇل سۋ تاسقىنى ءقاۋپىن ارتتىرادى.

«مەملەكەت باسشىسى سۋ تاسقىنىنىڭ الدىن الۋ شارالارىنا باسىمدىق بەرۋدى تاپسىردى. ۇكىمەت سۋ تاسقىنىنىڭ الدىن الۋ جانە كەرى اسەرىن جويۋعا باعىتتالعان ۇيىمداستىرۋشىلىق-پروفيلاكتيكالىق، ينجەنەرلىك-تەحنيكالىق جانە جەدەل شارالار قابىلداۋدا. دەگەنمەن، ايماقتاردىڭ دايىندىعى جوعارى دەڭگەيدە بولۋى كەرەك. اكىمدىكتەر ەلدى مەكەندەردى تاسقىن سۋدان قورعاۋ ءۇشىن كەشەندى شارالار قابىلداۋى ءتيىس. ولاردىڭ اينالاسىن توپىراق ۇيىندىلەرىمەن بەكىتىپ، ءبىرىنشى كەزەكتە سىرتتان كەلەتىن سۋدى بوگەۋ كەرەك. سۋ وتكىزۋ قۇرىلىستارى، كوپىرلەر مەن تيۋبينگتەر قاتىپ قالعان مۇز بەن قوقىستاردان تازارتىلىپ، قارعىن سۋدى وتكىزىپ جىبەرۋگە دايىن بولۋى ءتيىس. وزەن ارنالارىن تازارتىپ، بەكىتۋ قاجەت. دالا وزەندەرىنىڭ بىتەلۋگە اينالعان جەرلەرىن كەڭەيتۋ كەرەك. سۋ باسۋ ءقاۋپى جوعارى ەلدى مەكەندەردە كۇشتەر مەن قۇرالداردى، ونىڭ ىشىندە ءتيىستى تەحنيكانى دايىنداۋ قاجەت. ەۆاكۋاسيا ورىندارىن انىقتاڭىزدار. ولار تىرشىلىككە قاجەتتى بارلىق قۇرالدارمەن جابدىقتالۋعا ءتيىس»، — دەپ ايتتى پرەمەر-مينيستر.

بىلتىر قازاقستاندا جەردىڭ توڭى جىبىمەي جاتىپ كۇرت ەرىگەن قالىڭ قار سۋى مەن ارناسىنان اسقان وزەن سۋى ەلدى مەكەندەردى باسىپ، جۇرت ۇيىنەن، مال-مۇلكىنەن ايىرىلعان. 17 وبلىستىڭ ونىن سۋ الىپ، سەگىز وبلىستا توتەنشە جاعداي جاريالانعان.

2024 جىلى ساۋىردە توتەنشە جاعدايلار مينيسترلىگى اتىراۋ وبلىسى قۇلسارى قالاسىندا تاسقىننان ءتورت ادام وپات بولعانىن مالىمدەگەن. بۇدان بولەك، اقتوبە وڭىرىندە ەرىگەن قار سۋىنا باتىپ مەرت بولعان ەكى بالانىڭ اجالىنا "تاسقىننىڭ قاتىسى جوق" دەدى جەرگىلىكتى بيلىك. ال اباي وبلىسىندا وزەن تاسىپ جاتقاندا ءتورت ادام حابارسىز كەتتى.

بۇۇ بىلتىر كوكتەمدە قۇلسارىدا بولعان اپاتتىڭ سالدارىن ازايتۋعا بولار ەدى دەپ جازعان. سۋ تاسقىنىنان كەيىن قۇلسارىعا جاقىن ماڭنان وتەتىن جەم وزەنىنىڭ جوعارعى جاعىندا بىردە-بىر گيدروپوست جوق ەكەنى بەلگىلى بولدى.