فۋتبول فەدەراسياسىنىڭ بۇرىنعى باسشىلارىنا قاتىستى قىلمىستىق ءىس تەرگەپ-تەكسەرۋ جۇرگىزۋ ءۇشىن قارجىلىق مونيتورينگ اگەنتتىگىنە بەرىلدى.

قازاقستان فۋتبول فەدەراسياسى مەن بىرنەشە فۋتبول كلۋبتارىنا جۇرگىزىلگەن پروكۋرورلىق تەكسەرۋ ناتيجەسىندە باسقارۋداعى تيىمسىزدىك پەن 3 ملرد تەڭگە كولەمىندە قارجىلىق زاڭ بۇزۋشىلىقتار انىقتالدى.

باس پروكۋراتۋرانىڭ مالىمەتىنشە، نەگىزگى بۇزۋشىلىقتار قاتارىندا نەگىزسىز سىياقىلار تولەۋ، ينفراقۇرىلىم وبەكتىلەرىن سالۋ كەزىندە قاراجاتتى ماقساتسىز پايدالانۋ، سپورتشىلارمەن جاسالعان كۇماندى كەلىسىمدەر جانە سپورتشىلاردى تاماقتاندىرۋعا بولىنگەن قارجىنى جىمقىرۋ فاكتىلەرى بار. 

- فەدەراسيانىڭ بۇرىنعى باسشىلىعى جەكەلەگەن قىزمەتكەرلەر مەن سپورتشىلارعا 300 ملن تەڭگەدەن استام سومادا نەگىزسىز سىياقى تولەگەن.

فەدەراسيانىڭ اكىمشىلىك عيماراتى مەن تالعار قالاسىنداعى جاتتىعۋ بازاسىن سالۋ بارىسىندا ءىس جۇزىندە ورىندالماعان جۇمىستارعا 350 ملن تەڭگەدەن اسا تولەمدەر جاسالعان.

2021 جىلى باستالعان الماتى وبلىسىنداعى بازا قۇرىلىسى توقتاپ تۇر، ال مەردىگەردىڭ شوتتارى بۇعاتتالعان.

سونىمەن قاتار 135 ملن تەڭگە ستراتەگيالىق قۇجاتتار مەن ستاندارتتاردى ازىرلەۋگە بولىنگەن قاراجاتتىڭ ورىندى جۇمسالۋى كۇمان تۋدىرادى، – دەلىنگەن حابارلامادا.

بۇل قۇجاتتاردا ناقتى ىسكە اسىرۋ تەتىكتەرى، ونىڭ ىشىندە جەكە ينۆەستيسيالاردى تارتۋ جولدارى كورسەتىلمەگەن، ال كلۋبتاردى باسقارۋ ستاندارتى ءىس جۇزىندە ەنگىزىلمەگەن.

«ورداباسى»، «اقتوبە» جانە «جەتىسۋ» فۋتبول كلۋبتارىنداعى تەكسەرۋلەر دە كەلىسىمشارت سومالارىن اسىرىپ كورسەتۋ، ويىنشىلاردى تومەن باعامەن ساتۋ، جوعارى باعامەن ساتىپ الۋ جانە قاراجات جىمقىرۋ سياقتى ءبىرقاتار ەلەۋلى بۇزۋشىلىقتار انىقتالدى.  

سوتقا دەيىنگى تەرگەپ-تەكسەرۋ جۇمىستارى باستالدى. فۋتبول فەدەراسياسىنىڭ بۇرىنعى باسشىلارىنا قاتىستى قىلمىستىق ءىس تەرگەپ-تەكسەرۋ جۇرگىزۋ ءۇشىن قارجىلىق مونيتورينگ اگەنتتىگىنە بەرىلدى.

باس پروكۋراتۋرا سپورت سالاسىندا زاڭدىلىق پەن اشىقتىقتى قامتاماسىز ەتۋ بويىنشا جۇمىستاردى جالعاستىرادى.