28 ناۋرىزىندا تۇندە جامبىل وبلىسىنىڭ ءبىرقاتار اۋداندارى مەن تاراز قالاسىندا جەر سىلكىندى. وبلىس اكىمدىگى رەسمي مالىمدەمە تاراتتى.

جەر ءدۇمپۋىنىڭ جوعارى قارقىنى – 5 بالل – مەركى اۋدانىنداعى مەركى اۋىلىندا تىركەلدى. ت. رىسقۇلوۆ اۋدانىنىڭ قۇلان اۋىلىندا جەر سىلكىنىسىنىڭ كۇشى 4 باللدى، تاراز، شۋ قالالارىندا، قورداي، مويىنقۇم اۋداندارىندا – 2 باللدى قۇرادى.

وبلىس اكىمىنىڭ تاپسىرماسىنا سايكەس وبلىستىق جەدەل شتاب جۇمىس ىستەپ جاتىر. 

بارلىق تىرشىلىكتى قامتاماسىز ەتۋ جۇيەلەرى قالىپتى جۇمىس ىستەپ جاتىر. زارداپ شەككەندەر تۋرالى مالىمەت جوق. الدىن الا مالىمەت بويىنشا ت.رىسقۇلوۆ اۋدانى قاراقىستاق اۋىلىنداعى مادەنيەت ءۇيى، مەركى اۋداندىق اۋرۋحاناسى، ويتال اۋىلىنداعى مەكتەپ عيماراتىنىڭ قابىرعاسىندا جارىقتىڭ پايدا بولعانى انىقتالدى. باسقا نىساندار تۋرالى اقپارات ناقتىلانىپ جاتىر، - دەلىنگەن رەسمي اقپاراتتا.

ايماق باسشىسى ەربول قاراشوكەيەۆ جاعدايمەن تانىسۋ ءۇشىن ت.رىسقۇلوۆ جانە مەركى اۋداندارىنا باردى.

8(7262)513575 ءنومىرى بويىنشا "جەدەل جەلى" ىسكە قوسىلدى. تولىق اقپارات قوسىمشا حابارلانادى.

ەسكە سالساق، وتكەن تۇندە ساعات 03:46-دا جامبىل وبلىسىنىڭ كەي جەرلەرىندە جەر سىلكىندى.