ششۋچينسكتە IV ۇلتتىق قۇرىلتايدىڭ وتىرىسى اياسىندا سەكسيالار باستالدى.

ءماجىلىس دەپۋتاتى ماكسيم روجين اتاپ وتكەندەي، بۇل - IV قۇرىلتاي. پرەزيدەنت ءارقاشان قۇرىلتايدىڭ ەلىمىزدىڭ تاريحىندا، رۋحانياتىندا ەرەكشە ورنى بار جەرلەردە وتكىزۋدى ۇسىنىپ كەلەدى.

بۇگىن ءبىز بۋراباي وڭىرىنە جينالىپ وتىرمىز. قۇرىلتاي ءوزىنىڭ ماقساتىن ورىندايدى دەگەن وي بار. ويتكەنى ءار قۇرىلتايدا ءارتۇرلى كوزقاراستاعى ازاماتتار جينالادى. بۇل - پىكىر الۋاندىلىعى، ويتكەنى ءتۇرلى كوزقاراستا ديالوگ ارقىلى بەلگىلى ءبىر شەشىمدەر پايدا بولادى دەگەن سەنىم بار. بۇل جەرگە ءبىرويلى، بىركەلكى ازاماتتار جينالمايدى. ءتىپتى كەي جاعدايدا كەيبىر ماسەلەلەر بويىنشا ازاماتتاردا قاراما-قايشى پىكىرلەر دە پايدا بولادى، - دەدى دەپۋتات.

ول بۇگىن ءوزى قاتىساتىن سەكسيادا قوعامنىڭ مادەني سالاسىندا ءورشىپ جاتقان ماسەلەلەر كوتەرىلەتىنىن اتاپ ءوتتى.

مەن بۇگىن ادەپ ماسەلەسى جايلى ايتقىم كەلەدى. قوعامدى، قوعام مۇشەسى رەتىندە ءوزىمدى قوعامدا بولىپ جاتقان ادەپسىز دۇنيەلەر الاڭداتىپ وتىر. نەگە ونداي جاعداي تۋىنداپ جاتىر؟ ونى قالاي شەشۋگە بولادى؟ وسى سۇراقتاردى ورتاعا تالقىعا سالعىم كەلەدى. ازاماتتىڭ قاۋىپسىزدىگىنە، بالانىڭ مەكتەپتەگى، قوعامداعى قاۋىپسىزدىگىنە قاتىستى ويلار بولادى، - دەيدى روجين.

دەپۋتات ادەپ - ول فۋندامەنت ەكەنىن، سول سەبەپتى الدىمەن ادەپ ماسەلەسىن كوتەرۋ ورىندى دەيدى.

مىسالى، سوڭعى كەزدەرى جۇرگىزۋشىلەردىڭ كوشەدە توبەلەسىپ قالۋى، وقۋشىلاردىڭ ءبىر-بىرىن ۇرىپ-سوعۋى. مەنى بۇل ماسەلەلەر الاڭداتادى. ويتكەنى مەنىڭ بالام مەكتەپكە بارادى، ەرتەڭ مەنىڭ بالام كوشەگە شىعادى، قوعام مۇشەسى بولادى. ەندى مەن بالامنىڭ ادەپتى بولۋى ءۇشىن جۇمىس ىستەۋىم كەرەك. باسقالارى دا سولاي جاساۋى كەرەك. ونى قالاي جاسايمىز؟ بالكىم، ءبىز ۇيدە تاربيە بەرىلىپ جاتىر دەيمىز. ءبىراق قوعامدا وسىنداي جاعدايلار بولادى. قايدان شىعادى؟ نەگە بولادى؟ ءبىز قاي جەردەن ولقىلىق جىبەردىك؟ وسىنى كوتەرگىم كەلىپ وتىر، - دەپ ويىن ايتتى ماكسيم روجين.

ول ەلىمىزدە مادەنيەت ۇيلەرىن كوبەيتۋ كەرەك دەپ سانايدى. سەبەبى دەپۋتاتتار وڭىرلەردى ارالاعاندا كەيبىر وڭىرلەردە مادەنيەت وشاقتارىنىڭ جوق ەكەنىن بايقاعان.

كەيبىر وڭىرلەردە مادەنيەت ۇيلەرى ءالى جوق. اۋىلدى جەرلەردە بالالاردىڭ نە كىتاپ وقيتىن جەرى جوق. پرەزيدەنت ايتقانداي، مادەنيەت ءۇيى كونسەرت وتەتىن ورىنعا عانا ەمەس، جاستار جينالىپ، ءتۇرلى باعىتتاعى جۇمىستار جۇرگىزىلەتىن ورىندارعا اينالۋى كەرەك. كەيبىر وڭىرلەردە ازاماتتار ونى ءالى كۇتىپ وتىر. اۋىلداردا تاربيە بەرەتىن قاريالار دا قالمادى. سول قاريالاردى مادەنيەت ۇيلەرىنە الىپ كەلۋ كەرەك شىعار، - دەدى ول.

روجين ءقازىر اتا-انالار بالاسىن اسىراۋ ءۇشىن جۇمىستان قولى بوساماي جۇرەتىنىنە نازار اۋداردى.