دەنساۋلىق ساقتاۋ ءمينيسترى اقمارال ءالنازاروۆا جەدەل جاردەم قىزمەتىن جەرگىلىكتى اتقارۋشى ورگانداردىڭ قۇزىرەتىنە بەرۋ ۇسىنىسى قاراستىرىلىپ جاتقانىن ايتتى.

اقمارال ءالنازاروۆا ماجىلىستە ءمامس جۇيەسى تۋرالى زاڭ جوباسىن تانىستىرۋ بارىسىندا جاڭا ۇسىنىس قاراستىرىلىپ جاتقانىن ءسوز ەتتى.

"جەدەل جاردەمگە بايلانىستى پروبلەما جوق ەمەس، بار، وسى ورايدا كەلەسى جىلى بارلىق وبلىس جەرگىلىكتى بيۋدجەت ەسەبىنەن ءتيىستى قاراجات ءبولىپ، جەدەل جاردەم كولىگى ماسەلەسىن شەشۋدى جوسپارلاپ وتىر. بىزدە تاعى ءبىر ۇسىنىس بار، جەدەل جاردەم قىزمەتىنىڭ ءتيىستى ءتاريفىن بەلگىلەپ، جەرگىلىكتى اتقارۋشى ورگاندارعا بەرۋ ماسەلەسى قارالۋدا"، — دەدى ءماجىلىس دەپۋتاتتارىنىڭ ساۋالىنا جاۋاپ بەرۋ كەزىندە اقمارال ءالنازاروۆا.

ودان ءارى مينيستر جەدەل جاردەم قىزمەتىن ءوڭىر اكىمدىكتەرىنىڭ قۇزىرەتىنە بەرۋدىڭ سەبەبىن اتادى.

"كولىك، ينفراقۇرىلىم، اۆتوكولىكتەر تۇراعى ماسەلەلەرىن شەشۋ، بريگادالاردىڭ سانىن كوبەيتۋ جەرگىلىكتى اتقارۋشى ورگانداردىڭ قۇزىرەتىندە بولۋى كەرەك. قاراجات ءبولۋ، باسقا دا ماسەلەلەر تەز ارادا شەشىلەدى"، — دەيدى ول.

بۇعان دەيىن اقمارال ءالنازاروۆا 2027 جىلدان باستاپ جەدەل جاردەم قىزمەتى بويىنشا جاڭا نورما ەنگىزىلەتىنىن مالىمدەگەن ەدى.

ودان بولەك دەنساۋلىق ساقتاۋ ءمينيسترى مەديسينا سالاسىنا ينۆەستيسيا قۇيعىسى كەلەتىن كاسىپكەرلەرگە جول اشىق ەكەنىن جەتكىزدى.