ق ر ۇلتتىق ەكونوميكا ءمينيسترى تيمۋر سۇلەيمەنوۆ قۇجات «قازاقستان-2050» ستراتەگياسىندا»، 30 وزىق دامىعان ەلدىڭ قاتارىنا كىرۋ تۇجىرىمداماسىندا، بەس ينستيتۋسيونالدىق رەفورمادا، سونداي-اق، قازاقستاننىڭ ءۇشىنشى جاڭعىرۋىندا كورسەتىلگەن ماقساتتار مەن مىندەتتەردى ىسكە اسىرۋ ءۇشىن ازىرلەنگەنىن مالىمدەدى.
جىل باسىنان بەرى قازاقستاندا ەكونوميكالىق بەلسەندىلىكتىڭ جاقسارعانى بايقالۋدا. 7 ايداعى ءجىو ءوسىمى 4 %-دى قۇرادى. جىل قورىتىندىسى بويىنشا 3،4% دەڭگەيدە ەكونوميكا ءوسىمى بولادى دەپ كۇتىلۋدە. بۇدان وزگە، حۆق بولجامىنا سايكەس، 2017-2018 جىلدارى ەكونوميكاسى دامىعان ەلدەردىڭ بەلسەندىلىگىنىڭ ارتۋى سەبەبىنەن 3،5–3،6% دەڭگەيدە الەمدىك ىلگەرىلەمەلى ەكونوميكالىق ءوسىم بولادى دەپ كۇتىلۋدە.
2018-2022 جىلدارعا ارنالعان بولجام مەن 2018-2020 جىلدارعا ارنالعان بيۋدجەتتىك پارامەترلەردى قالىپتاستىرۋدىڭ نەگىزى رەتىندە مۇناي باعاسى – $45 كەزىندەگى بازالىق سەناريي الىندى.
ءجىو ناقتى ءوسىمى 2018 جىلى 3،1% دەڭگەيىندە بولجانعان، 2022 جىلى 4،2%-عا دەيىن ءوسىم كۇتىلۋدە. ءجىو ءوسىمىنىڭ ورتاشا جىلدىق قارقىنى الداعى كەزەڭدە 3،7%-دى قۇرايدى. اتاۋلى ءجىو الداعى جىلى 55،9 ترلن. تەڭگەدەن 2022 جىلى 75،9 ترلن. تەڭگەگە دەيىن وسەدى. حالىقتىڭ جان باسىنا شاققاندا ءجىو 2018 جىلى $9’000 قۇرايدى، 2022 جىلى $11’700 دەيىن ۇلعايتىلادى.
ييدمب جوبالارىن ەنگىزۋ، «نۇرلى جول» جانە «نۇرلى جەر»، اوك دامىتۋ مەملەكەتتىك باعدارلامالارىن ىسكە اسىرۋدى جالعاستىرۋ، سونداي-اق، ءۇشىنشى جاڭعىرتۋدى ىسكە اسىرۋ بويىنشا جوبالىق باسقارۋدى ەنگىزۋدىڭ ارقاسىندا وڭدەۋ ونەركاسىبىندە – 4،2% دەڭگەيىندە، اۋىل شارۋاشىلىعىندا – 5،7%، قۇرىلىس سالاسىندا – 4،0%، كولىك سالاسىندا – 5،1% جانە ساۋدادا – 3،5% ءوسىمنىڭ جوعارى قارقىنى ورىن الادى دەپ كۇتىلۋدە.
ۇلتتىق بانك 2018 جىلى 5-7% ارالىعىندا، 2019 جىلى 4-6% ارالىعىندا جانە 2020-2022 جىلدارى 3-4% تومەندەتۋ ارقىلى جىلدىق ينفلياسيانىڭ ماقساتتى ءدالىزىن ساقتاعان. جۇمىسسىزدىق دەڭگەيى 2018 جىلى 4،9%-دان 2022 جىلى 4،7%-عا دەيىن قىسقارتىلادى.
ءوسىم پارامەترلەرىنە قول جەتكىزۋ ءۇشىن نەگىزگى نازار ەكونوميكالىق ساياساتتىڭ كەلەسى باسىمدىقتارىنا بەرىلەدى: ماكروەكونوميكالىق تۇراقتىلىقپەن قامتاماسىز ەتۋ، جەدەلدەتىلگەن تەحنولوگيالىق جاڭعىرتۋ، بيزنەس ورتانى تۇبەگەيلى جاقسارتۋ مەن كەڭەيتۋ، ادام كاپيتالىنىڭ ساپاسىن جاقسارتۋ، ينستيتۋسيونالدىق قايتا قۇرۋ.
سونداي-اق، نەگىزگى باسىمدىق ەكونوميكالىق دەربەستىك پەن وڭىرلەردىڭ جاۋاپكەرشىلىگىن نىعايتىپ، كەڭەيتۋ جانە قازاقستان ازاماتتارىنا ءومىر ءسۇرۋ مەكەنىنە قاراماستان بىردەي دەڭگەيدە ومىرلىك جانە ەڭبەك جاعدايلارىن جاساۋ ماقساتىندا تەڭدەستىرىلگەن ايماقتىق دامىتۋعا باعىتتالادى.
