2017 جىلدىڭ 9-13 قىركۇيەك ارالىعىندا استانادا قازاقستان رەسپۋبليكاسى مادەنيەت جانە سپورت مينيسترلىگى جانە قازاقستان تەاترلار اسسوسياسياسى حالىقارالىق ەكسپو-2017 كورمەسىنىڭ مادەني باعدارلاماسى اياسىندا حالقىمىزدىڭ ءبىرتۋار تۇلعاسى، قازاقستاننىڭ ەڭبەك سىڭىرگەن ونەر قايراتكەرى، مەملەكەتتىك سىيلىقتىڭ يەگەرى، كورنەكتى تەاتر سىنشىسى اشىربەك سىعايدىڭ 70 جىلدىعىنا ارنالعان قازاقستان دراما تەاترلارىنىڭ XXV رەسپۋبليكالىق فەستيۆالىن وتكىزەدى دەپ حابارلايدى Qamshy.kz اقپارات اگەنتتىگى.

فەستيۆالدىڭ نەگىزگى ماقساتى – بار عۇمىرىن تەاتر ونەرىنە ارناعان سارابدال سىنشى، بىرەگەي تەاتر قايراتكەرىنىڭ شىعارماشىلىعىن كوپشىلىككە دارىپتەۋ، سوڭىنان قالدىرعان مۇرالارىن جاڭعىرتۋ، ەسىمىن ەل ەسىندە ماڭگى قالدىرۋ.

سونداي-اق، قازاقستانداعى تەاتر ونەرىنىڭ بۇگىنگى دامۋ باعىتتارى مەن كوركەمدىك كەلبەتىن زەردەلەپ، ءوزارا شىعارماشىلىق قارىم-قاتىناستى ودان ءارى نىعايتۋ، تەاتر ونەرىندەگى ساباقتاستىقتى ساقتاپ، جاڭاشىلدىق ۇردىستەردى دامىتۋ، دارىندى اكتەرلەر مەن رەجيسسەرلەرگە قولداۋ كورسەتۋ – ماقسات-مۇراتىمىزعا اينالىپ وتىر.

فەستيۆالگە سوڭعى 2-3 تەاترلىق ماۋسىمدا تۇساۋكەسەرى وتكەن جانە بەدەلدى تەاتر سىنشىلارىنىڭ جوعارى باعاسىنا يە بولعان، بۇرىن فەستيۆالدەرگە قاتىسپاعان ۇزدىك قويىلىممەن قاتىسۋعا ەلىمىزدىڭ دراما، مۋزىكالىق دراما، مۋزىكالىق-كومەديا، ساتيرا، بالالار مەن جاسوسپىرىمدەر تەاترلارى قاتىسادى.

فەستيۆالدىڭ رەسمي اشىلۋى 9 قىركۇيەك كۇنى، ساعات 17:00-دە «جاستار» تەاترى ساحناسىندا وتەدى.

فەستيۆالگە رەسپۋبليكالىق ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى، اتىراۋ وبلىستىق ماحامبەت اتىنداعى قازاق دراما تەاترى، رەسپۋبليكالىق اكادەميالىق نەمىس دراما تەاترى، ق.قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى، اقمولا وبلىستىق ورىس دراما تەاترى، استانا جاستار تەاترى، شىعىس قازاقستان وبلىسى «داريعا-اي» جاستار تەاترى، «جاس ساحنا» تەاترلارى قاتىسادى. 

بەس كۇن بويى استانا قالاسىنىڭ قوناقتارى مەن تۇرعىندارى فەستيۆال قويىلىمدارىن ق.قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى، «قازاقستان» ورتالىق كونسەرت زالى جانە جاستار تەاترى ساحنالارىنان تەگىن تاماشالاي الادى.

فەستيۆالدىڭ رەسمي جابىلۋ سالتاناتى 13 قىركۇيەك كۇنى، ساعات 18:00-دە «استانا بالەت» تەاترى ساحناسىندا وتەدى.