2017 جىلدىڭ 2-8 قىركۇيەك ارالىعىندا استانادا قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن حالىقارالىق ەكسپو-2017 كورمەسىنىڭ مادەني باعدارلاماسى اياسىندا قازاقستان تەاترلارى اسسوسياسياسى جاس رەجيسسەرلەردىڭ قايرات سۇگىربەكوۆ اتىنداعى I رەسپۋبليكالىق فورۋم-فەستيۆالىن وتكىزەدى دەپ حابارلايدى Qamshy.kz اقپارات اگەنتتىگى.

جاس رەجيسسەرلەر – قازاق تەاترىنىڭ ەرتەڭى. ۇلتتىق ساحنا ونەرىنىڭ قۇلاشىن كەڭ جايىپ، الەم الدىندا تانىلۋى دا جاس بۋىننىڭ ىزدەنىستەرى مەن ۇمتىلىستارىنان باستاۋ الادى. اتالعان ونەر مەرەكەسىندە جاس رەجيسسەرلەردىڭ شەبەرلىك ساعاتتارىنان ءوتىپ، رۋحاني ساباق الىپ، دۇنيەتانىمدارىنىڭ وزگەرىپ، ونەردە وزگەشە جول، باعىت-باعدار الارى ءسوزسىز.

فورۋم-فەستيۆال جاس تەاتر رەجيسسەرلەرىنىڭ شىعارماشىلىعىنا جول اشىپ، قازاق رەجيسسۋراسىن جاڭا ەسىمدەرمەن تولىقتىرۋدى، سونىمەن قاتار جاس جانە تانىمال تەاتر رەجيسسەرلەرىنە پىكىرتالاستار، لەكسيالار، شەبەرلىك-سىنىپتارى، سەمينارلار باعدارلامالارى ارقىلى ءبىلىم جانە كوممۋنيكاسيا الاڭىن جاساپ، وتاندىق رەجيسسۋرا ونەرىنىڭ ءورىسىن كەڭەيتۋگە مۇمكىندىك تۋعىزادى.

سونداي-اق، قازاقتىڭ جاڭاشىل تەاتر رەجيسسەرى قايرات سۇگىربەكوۆتىڭ ەسىمىن ەستە قالدىرۋ ماقساتىندا ۇيىمداستىرىلىپ وتىر. شارانىڭ باستى ماقساتى – تالانتتى جاس رەجيسسەرلەر شىعارماشىلىعىنا قوعام مەن قالىڭ كوپشىلىكتىڭ نازارىن اۋدارۋ.

فورۋم-فەستيۆالگە رەسپۋبليكامىزداعى 20-40 جاس ارالىعىنداعى جاس رەجيسسەرلەر ەلىك نۇرسۇلتان، داۋرەن سەرگازين، دينا قۇنانباي قىزى، رۇستەم جانىامانوۆ، بولات ابدراحمانوۆ، فارحاد مولداعالييەۆ، جۇلدىزبەك جۇمانباي، گۇلناز قامىسبايەۆا، مەيرام حابيبۋللين، ايدىن سالبانوۆتار قاتىسادى.

التى كۇن بويى استانا قالاسىنىڭ قوناقتارى مەن تۇرعىندارى فورۋم-فەستيۆال بارىسىندا م.اۋەزوۆ اتىنداعى قازاق مەملەكەتتىك اكادەميالىق دراما تەاترى، ع.مۇسىرەپوۆ اتىنداعى بالالار مەن جاسوسپىرىمدەر تەاترى، رەسپۋبليكالىق اكادەميالىق نەمىس دراما تەاترى، استانا جاستار تەاترى، اقتوبە وبلىستىق الاقاي تەاترى، س.مۇقانوۆ اتىنداعى سولتۇستىك قازاقستان وبلىستىق قازاق دراما تەاترى، شىعىس قازاقستان وبلىستىق جاستار تەاترى، ا.ي. تەاترى، ج.شانين اتىنداعى وبلىستىق اكادەميالىق قازاق دراما تەاترى، الماتى قالاسى مەملەكەتتىك قۋىرشاق تەاترى، اتىراۋ وبلىستىق ماحامبەت وتەمىس ۇلى اتىنداعى قازاق دراما تەاترلارىنىڭ قويىلىمدارىن تاماشالاي الادى.

جاستىقتىڭ جالىنى، قيالدىڭ قاناتى، تاۋەكەلدىڭ تۇڭعيىعى سىنعا تۇسەتىن فورۋم-فەستيۆالدىڭ ارقالاعان جۇگى جەڭىل ەمەس. استاناداعى التى كۇن – بولاشاق رەجيسسۋرا الىپتارىنىڭ قالىپتاسۋىنا سەبەپكەر بولادى دەگەن سەنىمدەمىز.