«ناگاساكي بەينەسى» اتالعان ادام 88 جاسقا كەلگەندە قازا تاپتى، دەپ جازادى Qamshy.kz اقپارات اگەنتتىگى. يادرولىق قارۋدىڭ تارالۋىنا بەلسەندى تۇردە قارسى شىققان سۋميتەرۋ تانيگۋتيدىڭ ولىمىنە ونكولوگيالىق اۋرۋ سەبەپ بولعان.

1945 جىلى ناگاساكي قالاسىندا زارداپ شەككەن تۇرعىنداردىڭ اراسىندا سۋميتەرۋ تانيگۋتي دە بار. ول دەنەسىندەگى كۇيىكتەرىنە قاراماستان، امان قالىپ، يادرولىق قارۋدىڭ تارالۋىنا قارسى شىققان بەلسەندى ەدى. يادرولىق قارۋعا قارسى تۇرۋدا بار قيىندىققا توتەپ بەرگەن سۋميتەرۋ قاريا قاتەرلى ىسىكپەن كۇرەسە المادى. 88 جاسقا اياق باسقاندا ومىردەن وزدى.

تامىز ايى.. ناگاساكي قالاسىنا قۇلاعان بومبا... سول ساتتە تانيگۋتي ەپيورتالىقتان 2 شاقىرىم قاشىقتىقتا بولعان ەدى. 16 جاستاعى پوشتاشى ادەتتەگىدەي گازەت تاسىپ جۇرگەن ۋاقىتتا جارىلىس تولقىنى جىگىتتى ۆەلوسيپەدىنەن ۇشىرىپ جىبەرگەن. ءوزى امان قالسا دا، 2 جىل ۋاقىتى ازاپپەن ءوتتى. دەنەسىندەگى كۇيىكتەرى ايىققانشا ىشىمەن عانا جاتىپ ءجۇردى، اراسىندا ەسىنەن تانىپ قالاتىن بولعان.

«ويانعانىمدا يىعىمنىڭ قيسايىپ، ارقامداعى تەرىمنىڭ قالاي اشىلىپ كەتكەنىن ءوز كوزىممەن كوردىم. اينالامدى قارا تۇنەك باستى، ادامداردىڭ ايقايلاعان، كومەك سۇراپ جىلاعان داۋىستارى ەستىلدى. قالا ورتكە اينالدى. ناعىز توزاق...» – سۋميتەرۋ تانيگۋتيدىڭ ەستەلىگىنەن.

1946 جىلى اقش فوتوگرافى تانيگۋتي ەمدەلىپ جاتقان اۋرۋحاناعا بارىپ، ونى سۋرەتكە ءتۇسىرىپ العان ەدى. سول جىلدان بەرى سۋرەت زارداپ شەككەن ناگاساكي تۇرعىندارىنىڭ سيمۆولى اتاندى.

تانيگۋتي ناگاساكي پوليگونىنان امان قالعانداردىڭ توبىن باستاپ، يادرولىق قارۋدىڭ تارالۋىنا بەلسەندى تۇردە قارسىلىق تانىتتى. ول «يادرولىق قارۋدان ەشكىم، ەشقاشان ازاپ شەكپەۋى ءتيىس!» دەگەن ۇراندى ۇستانىپ، ءوزى سوعان سەنىمدى بولدى...