قازاقستان رەسپۋبليكاسى ۇلتتىق ۇلانىنىڭ باس قولباسشىلىعىنا ايگىلى روك-مۋزىكانت ۆيكتور سويدىڭ اكەسى – روبەرت سوي مەن ۆيكتور سوي اتىنداعى قوردىڭ قازاقستانداعى ءتوراعاسى لەونيد حان كەلدى. ۇلتتىق ۇلان باس قولباسشىسىنىڭ ورىنباسارى گەنەرال-مايور مۇحامەتقالي ساتوۆپەن كەزدەسۋ بارىسىندا بەلگىلى ءانشىنىڭ جاس ۇرپاقتىڭ اسكەري-پاتريوتتىق تاربيەدەگى ءرولى ءسوز ەتىلدى دەپ حابارلايدى Qamshy.kz اقپارات اگەنتتىگى ق ر ۇلتتىق ۇلانىنىڭ باسپا ءسوز قىزمەتىنە سىلتەمە جاساپ.

قاراعاندى قالاسىندا انشىگە ارنالىپ ەسكەرتكىش اشىلۋىمەن ەلىمىزگە جولى تۇسكەن روبەرت ماكسيموۆيچ ۋاقىتىنىڭ تىعىزدىعىنا قاراماستان ۇلتتىق ۇلانننىڭ باس قولباسشىلىعىنا شاقىرۋىن ۇلكەن ىلتيپاتپەن قابىلدادى.

كەزدەسۋ بارىسىندا قادىرمەندى مەيمان شاقىرتۋعا قۋانىشتى ەكەنىن ايتىپ وتسە، ءوز كەزەگىندە ۇلتتىق ۇلاننىڭ باس تالىمگەرى ونىمەن جەكە كەزدەسۋ ۇلكەن مارتەبە ەكەنىن تىلگە تيەك ەتتى.

روبەرت سوي قىزىلوردا وبلىسىنىڭ تۋماسى. سول سەبەپتى دە ەلىمىز وعان ەتەنە تانىس. «قازاقستان – مەنىڭ وتانىم» دەپ الاڭسىز ايتۋى دا وسىدان بولسا كەرەك. استانا مەن قازاق ەلىنىڭ ادام تانىماستاي وزگەرۋى، قارىشتاپ العا دامىپ كەلە جاتقانى – ونى قۋانتىپ وتىرعانىن العا تارتتى. اسكەري ءىس تە روبەرت ماكسيموۆيچكە تاڭسىق ەمەس ەكەن. لەنينگراد قالاسىنداعى د.ف.ۋستينوۆ اتىنداعى بالتىق مەملەكەتتىك تەحنيكالىق ۋنيۆەرسيتەتىنىڭ تۇلەگى ءوزىنىڭ وتستاۆكاداعى «كاپيتان-لەيتەنانت» ەكەنىن زور ماقتانىشپەن ايتىپ ءوتتى. 

روبەرت سويدى، اسىرەسە، ۇلىنىڭ قازاقستانداعى تانىمالدىلىعى تاڭ قالدىردى. ال قاراعاندىداعى ۇلىنا ارنالعان ەسكەرتكىشتىڭ قويىلۋى تۋراسىندا وي بىلايشا ءوربىتتى:

– مەنىڭ ويىمشا ەسكەرتكىشتەردى ۇلى ادامدارعا قويۋ كەرەك. ۆيتكا ءوز ونەرىمەن سول ۇمىتىلماس ادامداردىڭ قاسىنا جاقىندادى، – دەپ بالاسى ءۇشىن ماقتانىش سەزىمىن دە جاسىرمادى. ۆيكتور سويدىڭ ەسىمىن ۇلاقتاپ، ونىڭ ونەردەگى ورنىن ايشىقتاي وتىرىپ، ەسكەرتكىش ورناتقاندارى ءۇشىن قازاقستانعا شەكسىز ريزاشىلىعىن ءبىلدىردى.

گەنەرال-مايور مۇحامەتقالي ساتوۆ ءوز كەزەگىندە تالاي بۋىن وكىلدەرىنىڭ «كينو» توبىنىڭ، ونىڭ ىشىندە ۆيكتور سويدىڭ ولەڭدەرىمەن وسكەندەرىنىڭ جانە دە ونىڭ داۋسىنىڭ ەرەكشە ەستە قالعانىن ءسوز ەتتى. تالانت يەسىنىڭ ەرتە ءولىمى بارشا مۋزىكا سۇيەر قاۋىمنىڭ قابىرعاسىن قايىستىرعانى ءسوزسىز. 27 جىلدىڭ ءجۇزى وتسە دە، توپتىڭ جانكۇيەرلەرى وسى وقيعانى جۇرەگىنە جاقىن قابىلدايتىنىن جەتكىزدى.

كەزدەسۋ سوڭىندا ۇلتتىق ۇلاننىڭ باس تالىمگەرى قوناقتارعا العىسىن ايتىپ، ۆيكتور سويدىڭ اكەسىنە ۇلاندىقتاردىڭ تاريحىنان سىر شەرتەر «قۇقىقتىق ءتارتىپ اسكەرىنىڭ جىلناماسى» اتتى كىتاپ پەن اسكەري باسىلىمداردى سىيعا تارتتى. ۆيكتور سوي اتىنداعى قوردىڭ ءتوراعاسى لەونيد حاندى «قۇقىقتىق ءتارتىپ اسكەرىنە – 25 جىل» مەرەكەلىك مەدالىمەن ماراپاتتادى.