ەكسپو-2017 حالىقارالىق مامانداندىرىلعان كورمە اياسىندا گۆاتەمالا رەسپۋبليكاسىنىڭ ۇلتتىق كۇنى اتاپ ءوتىلدى دەپ حابارلايدى Qamshy.kz اقپارات اگەنتتىگى.

گۆاتەمالا لاتىن امەريكا اۋماعىنداعى مەملەكەتتەر اراسىندا ەلەكتر ەنەرگيا ءوندىرىسى ورتالىعى بولىپ تابىلادى. بۇل تۋرالى ءىس-شارا بارىسىندا سىرتقى ىستەر مينيسترلىگىنىڭ كوپجاقتى جانە ەكونوميكالىق حالىقارالىق قاتىناس جونىندەگى باس ديرەكتوردىڭ ورىنباسارى كارلوس كازالي مالىمدەدى. ونىڭ ايتۋىنشا، ەكسپو-2017 كورمەسى حالىقتارعا «بولاشاق ەنەرگياسىن» ءوندىرۋ جانە دامىتۋ ءۇشىن شىعارماشىلىق جانە يننوۆاسيالىق تۇجىرىمدامالارىن قولدانۋعا تاماشا مۇمكىندىك بەرەدى.

«گۆاتەمالا - جاڭارتىلاتىن ەنەرگيا كوزدەرىن دامىتۋ يدەيالارى مەن جوبالارىن كورسەتۋ ارقىلى استاناداعى كورمەنىڭ تاقىرىبىن دامىتۋعا ۇلەس قوساتىن ەلدەردىڭ ءبىرى. تابيعي رەسۋرستاردىڭ الۋان تۇرلىلىگى ارقاسىندا، گۆاتەمالانىڭ ەكسپو-2017 كورمەسىنە قاتىسۋى ءبىزدىڭ ەنەرگەتيكالىق سالاعا تىكەلەي شەتەلدىك ينۆەستيسيالاردى تارتۋعا مۇمكىندىكتەر بەردى. كورشىلەس ەلدەردى، سونداي-اق بۇكىل سۋ ەلەكتر ستانسيالاردى سۋمەن قامتاماسىز ەتەتىن نەگىزگى رەسۋرس – مەملەكەتتەگى وزەندەر. گۆاتەمالانىڭ تىنىق مۇحيتى جاعالاۋىنداعى ايماقتا قانت قۇراعى پلانتاسيالارى ورنالاسقان، ولار سونىمەن قاتار، بيوماسسا ەنەرگياسىن ءوندىرۋ رەسۋرستاردىڭ ءبىرى بولىپ تابىلادى»، - اتاپ ءوتتى كارلوس كازالي.

قازاقستان رەسپۋبليكاسى دەنساۋلىق ساقتاۋ ۆيسە-مينيسترى الەكسەي سوي ءوز كەزەگىندە كورمەنىڭ تاقىرىبى كەزدەيسوق تاڭدالماعاندىعىن، «بولاشاق ەنەرگياسى» قازاقستاننىڭ 2050 جىلعا قاراي جاڭارتىلاتىن ەنەرگيا كوزدەرىنە كوشۋ ماقساتىن كورسەتەتىنىن حابارلادى.

«قازاقستان گۆاتەمالامەن ساياسي، ەكونوميكالىق، عىلىمي، تەحنولوگيالىق جانە مادەني، سونداي-اق بالامالى ەنەرگيا كوزدەرى سالاسىندا ىنتىماقتاستىقتى نىعايتۋعا مۇددەلى. گۆاتەمالا رەسپۋبليكاسىنىڭ ۇلتتىق كۇنى ەكى مەملەكەت اراسىندا ءوزارا ءتيىمدى ەكى جاقتى قاتىناستى نىعايتۋعا جاڭا مۇمكىندىكتەر بەرەتىنىنە كامىل سەنەمىن»، - دەپ قورىتىندىلادى دەنساۋلىق ۆيسە-مينيسترى.

جاڭارتاۋىمەن تانىمال گۆاتەمالا ەنەرگيانىڭ 61% جاڭارتىلاتىن ەنەرگيا كوزدەرىنەن وندىرەدى. مەملەكەت ەنەرگياسىنىڭ باسىم بولىگىن سۋ ەنەرگەتيكاسى قۇرايدى. ەنەرگيانىڭ 57% ۇلەسى سۋ ەلەكتر ستانسيالارىندا الىنادى. سونىمەن قاتار، ەلدە كۇن، جەل ەنەرگياسى مەن بيوماسسا وندىرىلەدى.

ەكسپو-2017 كورمەسىنىڭ لاتىن امەريكا پلازاسىندا 8 مەملەكەت ۇسىنىلعان، ونىڭ ىشىندە گۆاتەمالا رەسپۋبليكاسى ەرەكشە ورىندى الادى. پاۆيلون ەكسپوزيسيالارى كورمە كەلۋشىلەرىن مەملەكەتتەگى جاڭا تەحنولوگيالارىمەن، سونداي-اق لاتىن امەريكا ەلىنىڭ مادەنيەتى جانە تاريحىمەن تانىستىرادى.