بيىل باتىس قازاقستان وبلىسى بويىنشا 380 مەكتەپ وقۋشىلارعا ەسىگىن ايقارا اشتى. سولاردىڭ ءبىرى – نازاربايەۆ زياتكەرلىك مەكتەبىندەگى «العاشقى قوڭىراۋ» سالتاناتىنا وبلىس اكىمى  ا.كولگىنوۆ قاتىسىپ، ۇستازدار مەن وقۋشىلاردى جاڭا وقۋ جىلىنىڭ باستالۋىمەن قۇتتىقتادى دەپ حابارلايدى Qamshy.kz اقپارات اگەنتتىگى.

- بۇگىنگىدەي بەيبىت زاماندا جاستارعا قويىلاتىن تالاپ – ءبىلىم الۋ. ەگەر ءار وقۋشى مەكتەپ قابىرعاسىندا، كەيىن جوعارى وقۋ ورنىندا ساپالى ءبىلىم الاتىن بولسا، ەرتەڭگى كۇنى ەلىمىزدى جاڭا بيىكتەرگە جەتەلەرى انىق. ەلباسىمىزدىڭ «رۋحاني جاڭعىرۋ» باعدارلاماسىندا دا جاستارعا ەرەكشە كوڭىل ءبولۋ كەرەك ەكەندىگى ايتىلعان. ويتكەنى كەز كەلگەن ۇلتتىڭ بولاشاعى – جان-جاقتى جەتىلگەن، ءبىلىم العان، ازات ويلى، سانالى ۇرپاق. سوندىقتان بار ىنتا-جىگەرلەرىڭىزدى وقۋعا ارناڭىزدار، - دەپ قۇتتىقتاۋ تىلەگىن جەتكىزدى وبلىس اكىمى. سونداي-اق مەكتەپتىڭ جىلداعى داستۇرىنە ساي نازاربايەۆ مەكتەبىنىڭ 7ء-شى سىنىپ وقۋشىلارىمەن مەكتەپ اۋلاسىنا الما اعاشىن وتىرعىزدى.

كەيىن ا.كولگىنوۆ №7 جالپى ورتا ءبىلىم بەرەتىن مەكتەپ وقۋشىلارىمەن جۇزدەستى. وبلىستاعى ەڭ بايىرعى مەكتەپتەردىڭ ءبىرى سانالاتىن وقۋ ورداسىنىڭ ۇجىمىمەن اڭگىمەلەسىپ، عيمارات ءىشىن ارالاپ، مەكتەپتىڭ ماتەريالدىق-تەحنيكالىق بازاسىن كوردى. وبلىس اكىمى ارنايى  باس سۇققان تاعى ءبىر ءبىلىم وشاعى – دارىندى بالالارعا ارنالعان س.سەيفۋللين اتىنداعى №11 مەكتەپ-ينتەرنات-كەشەنى. مۇندا ءبىلىم الەمىنە جاڭا قادام باسقان العاشقى سىنىپ وقۋشىلارىمەن اسەرلى اڭگىمە ءوربىپ، وبلىس اكىمى ولارعا ەلباسىنىڭ سىي كىتاپتارىن تابىس ەتتى. 90 جىلعا جۋىق تاريحى بار ءبىلىم وشاعىنان وسى جىلدار ىشىندە مىڭداعان ءبىلىمدى شاكىرت تۇلەپ ۇشتى. سولاردىڭ ءىزىن جالعاعان بۇگىنگى بۋىن وقۋشىلار دا ءوز جەتىستىكتەرىمەن مەكتەپ مەرەيىن اسىرىپ ءجۇر. ارنايى كەزدەسۋگە كەلگەن وبلىس اكىمىن قازاقستاننىڭ قالىپتاسۋى مەن دامۋى تۋرالى سىر شەرتەتىن ارنايى دەرەكتى ءفيلمدى كورۋگە شاقىرعان جوعارى سىنىپ وقۋشىلارى كەيىن سۇراقتارىن دا قويدى. ەل بولىپ قولعا الىنعان «رۋحاني جاڭعىرۋ» باعدارلاماسىنىڭ ماڭىزى تۋرالى سۇراپ، ءوز ويلارىمەن دە ءبولىستى. سۇراق قويۋشى وقۋشىلاردىڭ اراسىندا ءوز ويلارىن اعىلشىن تىلىندە جەتكىزگەندەر دە بولدى. سونداي-اق جاستاردىڭ قارجىلىق ساۋاتتىلىعىن ارتتىرۋ ماقساتىندا مەكتەپ باعدارلاماسىنا ارنايى ءپان ەنگىزۋ تۋرالى دا ۇسىنىستارىن ايتتى.

ايتا كەتۋ كەرەك، بيىل باتىس قازاقستان وبلىسى بويىنشا 12 ءبىلىم بەرۋ نىسانىنا 1 241،0 ملن.تەڭگەگە كۇردەلى جوندەۋ جۇرگىزىلسە، 10 ءبىلىم بەرۋ نىسانىنىڭ قۇرىلىس سالىنۋدا. ولاردىڭ 4ء-ۋى اۋدانداردا. سونداي-اق كەلەر جىلى كۇردەلى جوندەۋدى قاجەت ەتەتىن نىسانداردىڭ ءتىزىمىن جاساۋ بويىنشا جۇمىستار اتقارىلۋدا.  ءبىلىم كۇنى  №21 جالپى ورتا ءبىلىم بەرەتىن مەكتەپكە ارنايى بارعان وبلىس اكىمى وقۋ ورداسىن ارالاپ كورىپ، الداعى جىلى كۇردەلى جوندەۋدى قاجەت ەتەتىن نىسانداردىڭ قاتارىنا قوسۋ تۋرالى تاپسىرما بەردى.