الماتى وبلىسىندا ەلباسى نۇرسۇلتان نازاربايەۆتىڭ "بولاشاققا باعدار: رۋحاني جاڭعىرۋ" اتتى ماقالاسى اياسىندا تۇڭعىش رەت "رۋحاني كەرۋەن" جوباسى باستاۋ الدى. الماتى وبلىستىق ءدىن ىستەرى باسقارماسى ۇيىمداستىرعان يگى شاراعا وبلىس اكىمىنىڭ ورىنباسارى جاقسىلىق ومار ارنايى كەلىپ، اق جول تىلەدى، - دەپ حابارلايدى Qamshy.kz اقپارات اگەنتتىگى.

"رۋحاني كەرۋەن" جوباسى بارىسىندا وبلىسىمزدىڭ زيالى قاۋىم وكىلدەرى جەرگىلىكتى ەلدى مەكەندەردى ارالاپ، ءوڭىردىڭ تىنىس-تىرشىلىگىمەن تانىسادى. كەرۋەننىڭ قۇرامىندا ءار ءتۇرلى سالانىڭ بىلىكتى دە ءبىلىمدى 50 مامانى بار. بۇل جوبا 3 ايعا سوزىلادى دەپ جوسپارلانىپ وتىر.

كەرۋەن مۇشەلەرى وڭىردەگى قالا، اۋدانداردى ارالاپ، ءتۇسىندىرۋ جۇمىستارىن جۇرگىزەدى. تالدىقورعان قالاسىنىڭ "جاستار" ساياباعىندا ورىن العان "رۋحاني كەرۋەن" جوباسىنىڭ سالتاناتتى اشىلۋىندا الماتى وبلىسى اكىمىنىڭ ورىنباسارى جاقسىلىق مۇقاش ۇلى شارانىڭ ماقساتى مەن مىندەتىن ايتا كەلە، كەرۋەنگە مۇشەلەرىنە اق جول تىلەدى.

"الەمدەگى ءدىني احۋالدىڭ قيىندىعىنا وزدەرىڭىز كۋا بولىپ جۇرسىزدەر. ونىڭ سالقىنى بىزگە دە تيۋدە. سوعان قارسى ەكسترەميزمدى بولدىرماۋ جانە اسىل ءدىنىمىز بەن ەجەلدەن قالىپتاسقان ۇلتتىق ءسالت-داستۇرىمىزدى جاڭعىرتۋ ماقساتىندا وسىنداي جوبانى قولعا الدىق. يگى شارا كوپشىلىگىمىز ءۇشىن وتە ماڭىزدى شارا بولماق. "رۋحاني كەرۋەن" مۇشەلەرىنە اق جول جانە ناتيجەلى جۇمىس تىلەيمىن. بۇل كەرۋەن ارقىلى ءبىز اسىرەسە، جاس ۇرپاققا ءدىن مەن ءسالت-داستۇردىڭ ەگىز ۇعىمىن ەكەنىن ءتۇسىندىرۋىمىز كەرەك. ۇلتتىق سانا مەن ۇلتتىق ءسالت-داستۇردى، ۇلتتىق سانانى جەكە دارا ءبولىپ قاراۋ مۇمكىن ەمەس. مۇنىڭ بارلىعى ءبىر تامىردىڭ وزەگىندەي دۇنيە ەكەنىن كوپشىلىككە ءتۇسىندىرۋىمىز كەرەك. وسى ماسەلەگە وڭ ناتيجە بەرۋ ماقساتىندا وبلىس اكىمىنىڭ قولداۋىمەن، وبلىستىق بيۋدجەتتەن ارنايى قارجى ءبولىنىپ، وبلىستىق ءدىن باسقارماسى، كەيىنگە تامان ءدىندى زەرتتەۋ ورتالىعى قۇرىلدى. وسى سالا ماماندارىنىڭ ۇيىمداستىرۋىمەن قولعا الىنعان جۇمىس ناتيجەسى بەرەكەلى ءارى جەمىستى بولادى دەپ ويلايمىن"، - دەپ يگى شارا جايلى اڭگىمەلەدى.

الماتى وبلىسىندا بولعان كەز كەلگەن شارانىڭ باسى-قاسىندا ءجۇرىپ، اقىل-كەڭەسى مەن ومىرلىك تاجىريبەسىمەن ءبولىسىپ جۇرەتىن وبلىستىق ارداگەرلەر كەڭەسىنىڭ ءتوراعاسى ەرمەك كەلەمسەيىت ۇلتتىق ءسالت-داستۇرىمىز بەن مادەنيەتىمىزدى جانداندىرىپ، جاستاردىڭ جۇرەگىندەگى وتانعا، تۋعان ەلگە، جەرگە دەگەن پاتريوتتىق سەزىمدەرىن وياتۋ قازىرگى كۇننىڭ باستى تاقىرىبى ەكەنىن تىلگە تيەك ەتتى. الماتى وبلىسىنىڭ قۇرمەتتى ازاماتى، كينواكتەر ءالىمعازى رايىمبەكوۆ كەرۋەن مۇشەلەرىنە اق باتاسىن ارنادى.

"رۋحاني كەرۋەن" جوباسى اياسىندا قۇرىلعان جۇمىس توبى ەلدىمەكەندەردى ارالاۋ بارىسىندا "رۋحاني جاڭعىرۋ: ەل ەرتەڭىنىڭ باستاۋى" تاقىرىبىندا زيالى قاۋىم وكىلدەرىمەن كەلەلى كەزدەسۋ، "دەنساۋلىق - بولاشاق كەپىلى!" تاقىرىبىندا ءدىني سەبەپتەرمەن ەكپە، قان قۇيۋدان باس تارتقان ازاماتتارمەن كەزدەسىپ، تۇسىندىرمە جۇمىستارى جۇرگىزىلەدى. "رۋحاني جاڭعىرۋ: تۋعان جەر - التىن بەسىك" اتتى سۋرەت جانە كىتاپ كورمەسى مەن "اقپاراتتىق ءتۇسىندىرۋ جۇمىسى - ءدىني ساۋاتتىلىقتى ارتتىرىپ، رۋحاني بايلىعىمىزدى دارىپتەيدى" تاقىرىبىندا بىلىكتى ءدىن تانۋشى عالىمدارمەن دوڭگەلەك ۇستەل ۇيىمداستىرىلادى. دەسكرۋكتيۆتى ءدىني اعىم ىقپالىنا تۇسكەن ازاماتتارعا وڭ جولدى نۇسقاۋ ماقساتىندا "رۋحاني مۇرا" اتتى كونسەرتتىك باعدارلاما، شىعارماشىلىق توپتىڭ "دەرتكە داۋا - حاق جولى" اتتى قويىلىمدارى قويىلماق.

ءاربىر قازاقستان ازاماتىنىڭ رۋحاني ساناسىن جاڭعىرتۋ، تۋعان جەرىنە دەگەن سۇيىسپەنشىلىك جانە پاتريوتتىق سەزىمدەرىن ارتتىرۋ ماقساتىندا جولعا شىققان "رۋحاني كەرۋەن" تومەندەگى باعىتتار بويىنشا ءوز جۇمىستارىن جۇزەگە اسىرادى.

I. 4 - 7 قىركۇيەك: جامبىل، قاراساي، تالعار

II. 20 - 22 قىركۇيەك: اقسۋ، سارقان، الاكول

III. 4 - 6 قازان: پانفيلوۆ، ۇيعىر، رايىمبەك

IV. 18 - 20 قازان: ەنبەكشىقازاق، ىلە، قاپشاعاي

V. 1 - 3 قاراشا: كوكسۋ، كەربۇلاق، بالقاش

VI.  8 - 10 قاراشا: ەسكەلدى، تەكەلى، قاراتال

VII. 17 قاراشا: تالدىقورعان قالاسى.