برازيليا پوليسياسى ەسىرتكى ساۋدالاۋشىلارعا قارسى رەيد جۇرگىزىپ كەم دەگەندە 80 ادامدى تۇتقىندادى دەپ حابارلايدى euronews-كە سىلتەمە بەرىپ Qamshy.kz اقپارات اگەنتتىگى. قاماۋعا الىنعاندار التى توننا كوكايندى ەۋروپاعا جونەلتپەك بولعان. زاڭسىز ارەكەتتى ىسكە اسىرۋ ءۇشىن قىلمىستىق توپ سان-پاۋلۋ شتاتىنداعى سانتوس پورتىن پايدالانعان. ءتارتىپ ساقشىلارىنىڭ ايتۋىنشا، ەسىرتكىگە قارسى وپەراسيا ەلدىڭ التى ايماعىندا جۇرگىزىلگەن. وعان 800 پوليسەي قاتىستى. 

تۇتقىنعا الىنعانداردىڭ 28ء-ى – سانتوس قالاسىنداعى پورت تەرمينالىنىڭ قىزمەتكەرلەرى. ولار ەسىرتكى ساۋدالاۋشىلارمەن اۋىز جالاسىپ، ءوزارا سىبايلاستىق ورناتقان. ءسويتىپ تىيىم سالىنعان تاۋارلاردى ءتيىستى باعىتقا تاسىمالداپ وتىرعان. كولۋمبيا، پەرۋ، بوليۆيادان كەلگەن كوكايننىڭ باسىم بولىگى ەۋروپاعا جونەلتىلگەن.