مادەنيەت جانە سپورت مينيسترلىگى قوعامدىق ماڭىزى بار ادەبيەتتى ساتىپ الۋ ماقساتىندا بۇرىن باسىلىپ شىعارىلماعان ادەبيەتتى ىرىكتەۋ جۇرگىزە باستاعانىن جاريا ەتتى. ىرىكتەۋگە قاتىسۋ ماقساتىندا اۆتور (اۆتورلار) نەمەسە ونىڭ سەنىمحاتى بويىنشا وكىلى ءوزىنىڭ ادەبيەتىن مادەنيەت سالاسىنداعى ۋاكىلەتتى ورگانعا ۇسىنا الادى دەپ حابارلايدى Qamshy.kz اقپارات اگەنتتىگى مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.

ق ر مادەنيەت جانە سپورت مينيسترلىگى قولعا العان ادەبيەتتى ىرىكتەۋدى جاريالاۋداعى ماقسات – جاڭا زامان اۆتورلارىن قالىپتاستىرۋ، قالامگەرلەردى ىزدەنۋگە، رۋحانياتىمىزدى جانداندىرۋعا ىنتالاندىرۋ. اۆتورلار ۇسىنعان شىعارمالاردى ىرىكتەۋ، ساتىپ الۋ، ونى باسۋ جانە تاراتۋ مينيسترلىك قۇزىرەتىندە ەكەنىن اتاپ ايتقان ءجون.

تاعى ءبىر باسا نازار اۋدارارلىق ماسەلە تاڭداۋلى تۋىندىلاردى ىرىكتەۋ ماقساتىندا مينيسترلىك جانىنان قۇرىلعان ساراپتاما كوميسسياسى شىعارمالاردىڭ ءاربىرىن سارالاپ، قورىتىندىسىن شىعارادى. بۇل ساراپتاما قورىتىندىلارى ۇكىمەت جانىنداعى «قوعامدىق ماڭىزى بار ادەبيەتتى ساتىپ الۋ ماسەلەلەرى جونىندەگى ۆەدومستۆوارالىق كوميسسيانىڭ» قاراۋىنا ۇسىنىلادى. ياعني، ساتىپ الىناتىن شىعارمالاردىڭ ءتىزىمىن وسى كوميسسيا بەكىتەدى.

ەڭ باستىسى، ىرىكتەۋدەن وتكەن شىعارمالارعا كوتەرگەن تاقىرىبىنىڭ كوكەيكەستىلىگىنە وراي ءبىر باسپا تاباعى 100-150 مىڭ تەڭگە كولەمىندە قاراجات تولەنەدى. ال شىعارما مينيسترلىكتىڭ مەنشىگىنە وتەدى. ىرىكتەۋ ەنسيكلوپەديالىق جانە انىقتامالىق، كوركەم، تانىمدىق، قوعامدىق-ساياسي، عىلىمي-كوپشىلىك، اۋدارما ادەبيەت، بالالارعا جانە جاسوسپىرىمدەرگە، مادەنيەت جانە ونەر تۋرالى، ونىڭ ىشىندە نوتالىق (نوتالار شىعارمانىڭ 50 پايىزىن قۇرايدى)، مەرەيتويلار مەن اتاۋلى كۇندەرگە ارنالعان ادەبيەتتەر بويىنشا جۇرگىزىلەدى.

قورىتا ايتقاندا، مەملەكەت تاراپىنان شىعارماشىلىق سالاسىنداعى قاۋىمعا كورسەتىلەتىن مۇنداي قامقورلىق قالامگەرلەرگە تىڭ دەم بەرەتىنىنە جانە ماتەريالدىق تۇرعىدان ەڭبەكتەرىنىڭ لايىقتى باعالانۋى ادەبيەتىمىزگە جاڭا تۋىندىلار اكەلۋگە سەرپىن بەرەدى.