جەكسەنبى كۇنى، 2017 جىلعى 10 قىركۇيەكتە كورمە كەشەنىنىڭ اۋماعىندا ەكسپو-2017 حالىقارالىق مامانداندىرىلعان كورمەسىنىڭ جابىلۋ سالتاناتى وتەدى دەپ حابارلايدى Qamshy.kz اقپارات اگەنتتىگى. ءىس-شارانىڭ رەسمي ءبولىمى كونگرەسس ورتالىعى عيماراتىندا وتەدى، الايدا كورسەتىلىم امفيتەاتر ساحناسىنان 20:00-دەن 20:50-گە دەيىن جۇرگىزىلەدى.

10-قىركۇيەكتە كورمە شتاتتىق رەجيمدە قىزمەت ەتەدى، بارلىق پاۆيلوندار قوناقتاردى 09:30-دان 20:00-گە دەيىن قابىلدايدى. ايتا كەتەرلىگى، كورمەگە كىرۋ اۋماعى الدىنداعى رەسمي بيلەت كاسسالارى 09:00-دەن 18:30-عا دەيىن جانە 22:00-دەن 00:30-عا دەيىن جۇمىس ىستەيتىن بولادى. ال، 19:00-دەن 22:00-گە دەيىنگى ۋاقىت ارالىعىندا كورمەنىڭ بارلىق كىرەبەرىستەرى جابىلادى. وڭتۇستىك جانە باتىس كىرەبەرىستەرى ساعات 22:00-دەن باستاپ قايتا اشىلادى جانە 01:00-گە دەيىن كورمەگە كەلۋشىلەردى قابىلدايدى.

پاۆيلوندار اتريۋمى 22:00-دە اشىلىپ، 02:30-عا دەيىن جۇمىس ىستەيدى. وسى ۋاقىت ارالىعىندا حالىقارالىق پاۆيلوندار وزدەرىنىڭ كونسەرتتىك باعدارلامالارىن ۇسىنادى. كورمە كەشەنى اۋماعىنداعى مەيرامحانالار مەن تاماقتانۋ ورتالىقتارى جۇمىستارىن 22:00-دەن 02:30-عا دەيىن جالعاستىرادى.

كونسەرتتىك باعدارلاما ساعات 18:00-دەن 20:00-گە جانە 21:00-دەن 23:10-عا دەيىن امفيتەاتر ساحناسىندا وتەدى، ونى ەكسپو-2017 كورمەسىنە كىرۋ بيلەتى ارقىلى تاماشالاۋعا بولادى. كورمەنىڭ جابىلۋ سالتاناتىنا ارنالعان ساليۋت ساعات 21:15-تە وتەدى.

ەستەرىڭىزگە سالايىق، ەكسپو-2017 حالىقارالىق مامانداندىرىلعان كورمەسى استانادا 2017 جىلدىڭ 10 ماۋسىمىندا باستالعان بولاتىن. «بولاشاق ەنەرگياسى» كورمە تاقىرىبى ەنەرگەتيكا سالاسىنىڭ قازىرگى كەزدەگى جاھاندىق ماسەلەلەرىن قامتىدى. كورمەگە بالامالى ەنەرگيا كوزدەرى سالاسىنداعى جاڭا تەحنولوگيالاردى ۇسىنعان 115 مەملەكەت جانە 22 حالىقارالىق ۇيىم قاتىسۋدا.