اقوردا تارتقان اقپارات بويىنشا، بۇگىن نۇرسۇلتان نازاربايەۆ رەجەپ تاييپ ەردوعاندى استانادا سالتاناتپەن قابىلداعان.

– قانشا كەزدەسسەك تە كوپ بولمايدى. قازىرگى زاماننىڭ ءوزى قيىنداپ تۇر. ءجيى كەزدەسىپ، كوپ اقىلداسۋ كەرەك. 25-26 جىل ىشىندە قازاقستان مەن تۇركيا اراسىنداعى قارىم-قاتىناس دوستىق ءارى باۋىرلاستىق باعىتتا دامىپ كەلەدى، – دەگەن نۇرسۇلتان نازاربايەۆ.      

سونداي-اق نۇرسۇلتان نازاربايەۆ تۇركيا پرەزيدەنتىنە بيىلعى 10 قىركۇيەكتە استانادا يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى سامميتىنە قاتىسۋعا نيەت بىلدىرگەنى ءۇشىن العىس ايتقان.    

بۇدان بولەك، مەملەكەت باسشىسى بيىلعى 14 قىركۇيەكتە ەلوردامىزدا سيرياداعى قارۋلى قاقتىعىستى رەتتەۋ جونىندەگى استانا كەلىسسوزدەرىنىڭ التىنشى راۋندى وتەتىنىنە نازار اۋداردى.

تۇركيا رەسپۋبليكاسىنىڭ پرەزيدەنتى قازاقستانعا ساپارمەن كەلۋگە شاقىرعانى ءۇشىن نۇرسۇلتان نازاربايەۆقا ريزاشىلىعىن ءبىلدىردى. 

– استاناعا كەلگەنىمە قۋانىشتىمىن. مەن العاش رەت قازاقستانمەن الماتى قالاسىنا بارعان ساپارىمدا تانىسقان ەدىم. ەندى جاڭا قالاعا، جاڭا ەلورداعا كەلىپ وتىرمىن، قازاقستاندى ءوزىمنىڭ ەكىنشى ۇيىمدەي كورەمىن، – دەدى ر.ەردوعان.

تۇركيا پرەزيدەنتى ءوز ەلىنىڭ قازاقستانمەن ساياسي، ەكونوميكالىق، مادەني، اسكەري قاتىناستاردى دامىتىپ جاتقانىن اتاپ ءوتتى.    

– بۇگىندە ەلدەرىمىز اراسىنداعى تاۋار اينالىمى 2 ميلليارد دوللار شاماسىندا. ارينە، بۇل جەتكىلىكتى ەمەس. ءبىز كەلىسكەندەي، ماقساتىمىز – تاۋار اينالىمىن 5 ميلليارد دوللارعا جەتكىزۋ. تۇركيا مەن قازاقستاننىڭ الەۋەتى وعان جەتكىلىكتى،  – دەگەن تۇركيا رەسپۋبليكاسىنىڭ باسشىسى.

تۇركيا پرەزيدەنتى بيىلعى 14 قىركۇيەكتە استانادا سيرياداعى جاعدايعا قاتىستى كەزدەسۋدىڭ ماڭىزدىلىعىنا توقتالىپ، ونىڭ جەنيەۆا كەلىسسوزدەرىنە وڭ ىقپال ەتەتىنىنە سەنىم ءبىلدىردى.      

ايتا كەتەتىن بولساق، بۇل ەردوعاننىڭ استاناعا پرەزيدەنت رەتىندە ەكىنشى كەلۋى. جۇرت ونى EXPO-Astana كورمەسى اشىلۋى كەزىندە نازاربايەۆتىڭ قوناعى بولادى دەپ كۇتكەن. الايدا ەردوعان استاناداعى ەكسپو-نىڭ جابىلۋىنا كەلدى.

سونداي-اق، ازەربايجان باسشىسى يلحام الييەۆ تە بۇگىن ءتۇس اۋا استاناعا كەلدى.