اقتوبە قالاسىندا «نۇرلى جەر» باعدارلاماسى بويىنشا سالىنعان العاشقى ءۇي پايدالانۋعا بەرىلدى دەپ حابارلايدى Qamshy.kz اقپارات اگەنتتىگى. 9 قاباتتى ۇيگە تۇرعىنداردى كىرگىزۋ سالتاناتىنا اقتوبە وبلىسىنىڭ اكىمى بەردىبەك ساپاربايەۆ، اقتوبە قالاسىنىڭ اكىمى يلياس يسپانوۆ، «قازاقستان تۇرعىن ءۇي قۇرىلىس جيناق بانكى» اق باسقارما ءتورايىمى ءلاززات يبراگيموۆا،  «دامۋ» كاسىپكەرلىكتى دامىتۋ قورى» اق باسقارما ءتوراعاسى اباي سارقۇلوۆ، «سبەربانك» اق ەب باسقارما ءتوراعاسى الەكساندر كامالوۆ، «سوللەرس» ج ش س ديرەكتورى اندرەي ستوروجيەۆ قاتىستى.

كوپ قاباتتى تۇرعىن ءۇي قۇرىلىسىن قارجىلاندىرۋ ماقساتىندا سبەربانك «سوللەرس» قۇرىلىس كومپانياسىنا 3 جىل مەرزىمگە 400 ميلليون تەڭگەگە نەسيە جەلىسىن اشتى.  ال كومپانيا قۇرىلىسقا 102 ملن تەڭگە ءوز قارجىسىن سالدى. جوبانىڭ جالپى قۇنى 502 ملن تەڭگە. سبەربانك، قازاقستان تۇرعىن ءۇي قۇرىلىس جيناق بانكى جانە «سوللەرس» كومپانياسىنىڭ اراسىندا شارتقا قول قويىلدى. ول قۇجات بويىنشا پاتەرلەردىڭ 50%-ىن قازاقستان تۇرعىن ءۇي قۇرىلىس جيناق بانكى ءوز سالىمشىلارىنا تاراتادى. ياعني، 27 پاتەر قازاقستان تۇرعىن ءۇي قۇرىلىس جيناق بانكى سالىمشىلارىنا شارشى مەترى 140 مىڭ تەڭگەدەن بەرىلەدى. قالعان پاتەرلەردى قۇرىلىس كومپانياسى ءوزى ساتا الادى نەمەسە قازاقستان تۇرعىن ءۇي قۇرىلىس جيناق بانكىنىڭ سالىمشىلارىنا ۇسىنا الادى. «نۇرلى جەر» باعدارلاماسىنىڭ اياسىندا «سوللەرس» ج ش س نەسيە پايىزىن سۋبسيديالاي الدى.  جىلىنا 14% مولشەرلەمەنىڭ 7 پايىزىن «دامۋ» قورى قارجىلاندىرادى. تۇرعىن ءۇي كەشەنىنىڭ جالپى اۋماعى 3 771 ش.م.

 «بۇل جوبا بيزنەس، مەملەكەت جانە بانكتىڭ ءتيىمدى ارىپتەستىگىنىڭ كورىنىسى. «نۇرلى جەر» باعدارلاماسىنىڭ ارقاسىندا تۇرعىن ءۇي قۇرىلىسى مەن يپوتەكالىق نەسيەلەندىرۋ سالاسىندا وڭ وزگەرىستەرگە قاراي جول اشىلاتىن بولادى. ءبىز ءوز تاراپىمىزدان باعدارلاماعا بەلسەندى قاتىسىپ، جاقىن ۋاقىتتا قىزىلوردا مەن ورالداعى قۇرىلىس كومپانيالارىن قارجىلاندىرماقپىز»، - دەيدى «سبەربانك» اق ەب باسقارما ءتوراعاسى الەكساندر كامالوۆ.

«نۇرلى جەر» باعدارلاماسىنىڭ حالىقتىڭ تۇرعىن ءۇي جاعدايىن جاقسارتۋعا ارنالعان كوپتەگەن باعىتتارى بار. سونىڭ ءبىرى – «تۇرعىن ءۇي سالۋعا جەكە قۇرىلىس كومپانيالارىن ىنتالاندىرۋ» دەپ اتالادى. بۇگىن وسى باعىت اياسىندا ءبىرىنشى ءۇي پايدالانۋعا بەرىلىپ، قونىستانعاندار اراسىندا تۇرعىن ءۇي قۇرىلىس جيناق بانكىنىڭ سالىمشىلارى دا بار. بۇل - جاعىمدى جاڭالىقتىڭ سوڭى ەمەس دەپ ويلايمىن. باعدارلاما بويىنشا جىل سوڭىنا دەيىن 12 مىڭعا جۋىق پاتەر مەن 350-دەي جەكە ۇيلەردىڭ قۇرىلىسى ءبىتىپ، حالىققا بەرىلەدى»،-دەدى «تۇرعىن ءۇي قۇرىلىس جيناق بانكى» اق باسقارما ءتورايىمى ءلاززات يبراگيموۆا.

«بۇگىنگە دەيىن «دامۋ» قورى ەكى قۇرىلىس كومپانياسىن سۋبسيديالادى. بۇل - «سولەرس» جانە استانالىق «التىن شار West». ەندەشە ءبىز جاقىندا استانادا 20 مىڭ ش.م بولاتىن ۇلكەن كەشەندى پايدالانۋعا بەرەمىز دەپ ۇمىتتەنەمىز. كەشەن سول جاق جاعالاۋدا، EXPO 2017 كورمەسى ماڭىندا ورنالاسادى. تۇرعىن ءۇي اۋماعىندا بالالار جانە سپورتتىق الاڭدار سالىنىپ، جولدار جوندەلىپ، جابىق پاركينگ، ساۋدا-كوڭىل كوتەرۋ ورىندارى بولادى. ءقازىر ەكىنشى دەڭگەيلى بانكتەردىڭ قاراۋىندا 24 قۇرىلىس كومپانياسىنىڭ ءوتىنىمى جاتىر. ونىڭ بەسەۋى ماقۇلدانىپ تا قويدى. ياعني، قۇرىلىس كومپانيالارى تاراپىنان «نۇرلى جەر» باعدارلاماسىنا دەگەن قىزىعۋشىلىق جوعارى. بۇل - ءۇيدىڭ باعاسىنا دا وڭ اسەرىن تيگىزۋى كەرەك»،- دەدى كەشەننىڭ اشىلۋىندا ءسوز العان «دامۋ» قورىنىڭ باسقارما ءتوراعاسى اباي سارقۇلوۆ.