KAZ Minerals توبى جاڭا قارجىلىق ديرەكتور مەن تاۋەلسىز اتقارۋشى ەمەس ديرەكتوردى تاعايىنداۋ تۋرالى حابارلايدى. بۇعان دەيىن، ياعني 2017 جىلعى 27 ساۋىردە، كومپانيا سايمون حيلدىڭ ديرەكتورلار كەڭەسىنىڭ ءتوراعاسى لاۋازىمىنان كەتۋى جانە بۇل قىزمەتكە ولەگ نوۆاچۋكتىڭ تاعايىندالۋى تۋرالى، مايكل لينچ-بەللدىڭ باسقارما ءتوراعاسىنىڭ ورىنباسارى، ال ەندريۋ ساۋزامنىڭ توپتىڭ باسقارما ءتوراعاسى بولىپ تاعايىندالۋى تۋرالى حابارلانعان دەپ جازادى Qamshy.kz اقپارات اگەنتتىگى.
دجون حەدفيلد 2017 جىلدىڭ 20 قازانىندا كەلىپ، 2018 جىلعى 1 قاڭتاردان باستاپ باس قارجى ديرەكتورى لاۋازىمىنا تاعايىندالادى. قازىرگى ۋاقىتتا حەلفيلد مىرزا Intertek كومپانياسىنىڭ بريتاندىق بولىمشەسىندە قارجى ديرەكتورى بولىپ جۇمىس ىستەيدى. بۇعان دەيىن ول 14 جىل بويى BG Group جانە Royal Dutch Shell كومپانيالارىندا ءتۇرلى قارجىلىق لاۋازىمداردا جۇمىس ىستەگەن. ونىڭ ىشىندە اۆستراليانىڭ كۆينسلەند شتاتىنداعى قۇنى $20 ملرد گاز جوباسىندا قارجىلىق باقىلاۋشى جانە BG Group-تىڭ ۇلىبريتانيا مەن نورۆەگياداعى بارلاۋ جانە ءوندىرۋ بولىمشەلەرىندە قارجى جونىندەگى ۆيسە-پرەزيدەنت بولعان. BG كومپانياسى Shell-دىڭ قۇرامىنا كىرگەننەن كەيىن دجون حەدفيلد Shell-دىڭ ۇلىبريتانيا مەن يرلاندياداعى بارلاۋ جانە ءوندىرۋ بولىمشەلەرىندەگى قارجىلىق كوماندالارىن قايتا قۇرۋعا جاۋاپتى بولدى.
ەليسون بەيكەر تاۋەلسىز اتقارۋشى ەمەس ديرەكتور جانە اۋديت جونىندەگى كوميتەتتىڭ مۇشەسى رەتىندە ديرەكتورلار كەڭەسىنە 2017 جىلعى 9 قازاننان باستاپ كەلەدى. بەيكەر حانىمنىڭ اۋديت، كاپيتال نارىقتارى جانە كونسۋلتاسيالىق قىزمەتتەر سالاسىنداعى 25 جىلدىق ەڭبەك ءوتىلى بار. ول PricewaterhouseCoopers-تىڭ ۇلىبريتانياداعى مۇناي-گاز باعىتىن جانە ەبۆا-نى باسقارعان. بۇعان دەيىن Ernst & Young-تا ەنەرگەتيكا، كوممۋنالدىق قىزمەتتەر جانە پايدالى قازبالاردى ءوندىرۋ سالاسىندا جۇمىس ىستەدى. ەليسون بەيكەردىڭ دامۋشى نارىقتار، ونىڭ ىشىندە قازاقستاننىڭ ەنەرگەتيكالىق جانە تاۋ-كەن ونەركاسىبى سەكتورلارىنداعى تاجىريبەسى دە بار.
KAZ Minerals توبىنىڭ باسقارما ءتوراعاسى ولەگ نوۆاچۋك بىلاي دەپ مالىمدەدى: «مەن دجون حەدفيلد پەن ەليسون بەيكەردى KAZ Minerals-تا قارجى ديرەكتورى جانە تاۋەلسىز اتقارۋشى ەمەس ديرەكتور رەتىندە كورۋگە اسىقپىن. دجون دا، ەليسون دا كومپانيا دامۋىنىڭ كەلەسى ساتىسىندا توپقا مول تاجىريبە اكەلەدى دەپ سەنەمىن».
