الماتى پروكۋراتۋراسىنىڭ وكىلدەرى مۇراتحان ءتوقماديدىڭ ىسىنە قاتىستى ءجۇرىپ جاتقان تەرگەۋ بارىسىن بويىنشا پىكىر ءبىلدىردى، - دەپ حابارلايدى Qamshy.kz اقپارات اگەنتتىگى ۆەدومستۆونىڭ باسپا ءسوز قىزمەتىنە سىلتەمە جاساپ.

ۆەدومستۆو وكىلدەرىنىڭ مالىمەتىنشە، ۆەدومستۆوارالىق جەدەل-تەرگەۋ توبى ق ر قىلمىستىق كودەكسىنىڭ 194-بابى ("قورقىتىپ الۋ") جانە 287-بابى ("قارۋدى، ءوق-دارiلەردi، جارىلعىش زاتتاردى جانە جارىلىس قۇرىلعىلارىن زاڭسىز يەمدەنۋ، بەرۋ، وتكiزۋ، ساقتاۋ، تاسىمالداۋ نەمەسە الىپ ءجۇرۋ") بويىنشا ايىپتالعان مۇراتحان توقماديگە قاتىستى سوتقا دەيىنگى تەرگەۋ جۇرگىزىپ جاتىر.

"ق ر قىلمىستىق-پروسەسسۋالدىق كودەكسىنىڭ 70-بابىنىڭ 5-بولىگىنە سايكەس، قورعاۋشى وعان جاريا بولعان مالىمەتتەردى ايتا المايدى. ال وسى كودەكستىڭ 201-بابىندا سوتقا دەيىنگى تەرگەۋگە قاتىستى دەرەكتەرگە جاريا ەتۋگە جول بەرىلمەۋى ءتيىس ەكەنى جانە مالىمەتتەردىڭ تەك پروكۋروردىڭ رۇقساتىمەن جاريا ەتىلەتىنى ايتىلادى"، - دەلىنگەن حابارلامادا.

"ا.ورالباي مەن د.وتەبەكوۆ مۇنداي جاۋاپكەرشىلىكتى الۋدان باس تارتتى. وسىعان بايلانىستى كۇدىكتىنىڭ ادۆوكاتتارى ا.ورالباي مەن د.وتەبەكوۆ بيىل 29 جانە 31 تامىزدا قىلمىستىق ىستەن الىپ تاستالدى"، - دەپ حابارلادى الماتى پروكۋراتۋراسىنىڭ باسپا ءسوز قىزمەتىندەگىلەر.

رەسمي مالىمەتتەرگە قاراعاندا، قازىرگى ۋاقىتتا ادۆوكاتتاردى اۋىستىرۋ ماسەلەسى قاراستىرىلىپ جاتىر.

"5 قىركۇيەكتە مۇراتحان ءتوقمادي پروكۋرورمەن كىناسىن مويىنداۋ تۋرالى مامىلەگە كەلگىسى كەلەتىنىن ايتتى. ونىڭ بۇل ءوتىنىشىن پروسەسسۋالدىق پروكۋرور قاراپ، شەشىم شىعاراتىن بولادى. قىلمىستىق ءىستى تەرگەۋ جۇمىستارىن الماتى قالالىق پروكۋراتۋراسى باقىلايدى"، - دەلىنگەن پروكۋراتۋرانىڭ حابارلاماسىندا.

ەسكە سالا كەتەيىك، مۇراتحان ءتوقمادي 12 ماۋسىمدا ۇستالعان بولاتىن. الماتىدا ارنايى قىزمەت "دەپۋتاتتىق كورپۋس" اتتى قىلمىستىق توپتى ۇستاۋ بويىنشا وپەراسيا وتكىزگەن ەدى. باق-تا شىققان اقپارات بويىنشا، بۇل قىلمىستىق توپتى "قازشىنىقۇرىلىس" زاۋىتىنىڭ يەسى مۇراتحان ءتوقمادي باسقارعان. سونداي-اق، پروكۋراتۋرا مالىمەتىنشە، ونىڭ ءۇيىن ءتىنتۋ كەزىندە قارۋ-جاراق پەن ءوق-دارى تابىلعان.