Qamshy.kz اقپاراتتىق اگەنتتىگى دەرەككوزىنىڭ حابارلاۋىنشا جاقىن كۇندەرى بىرنەشە وبلىستىڭ اكىمدەرى اۋىسىپ قالۋى مۇمكىن.
بۇعان دەيىن، دالىرەك ايتساق، 14 ناۋرىزدا پرەزيدەنت جارلىعىمەن اقمولا، قاراعاندى، ماڭعىستاۋ جانە سولتۇستىك قازاقستان وبلىستارىنىڭ اكىمدەرى اۋىسقانى بەلگىلى. اقمولا وبلىسىنا مالىك مۋرزالين، قاراعاندىعا ەرلان قوشانوۆ، ماڭعىستاۋعا ەرالى توعجانوۆ تاعايىندالسا، سولتۇستىك قازاقستان وبلىسىنا قۇمار اقساقالوۆ باسشى بولىپ بارعان ەدى.
باسقا بىرنەشە وبلىس اكىمدەرىنىڭ لاۋازىمدارىنا تاعايىندالعانىنا كوپ بولا قويعان جوق. دەگەنمەن، الماتى وبلىسى مەن الماتى قالاسىنىڭ، قىزىلوردا، جامبىل وبلىستارىنىڭ اكىمدەرى اۋىسادى ەكەن دەگەن سىبىس بۇعان دەيىن دە بىرنەشە رەت شىققان بولاتىن. ول بولجامدى دا نەگىزسىز دەي المايسىز. ماسەلەن، جامبىل وبلىسىنىڭ باسشىسى كارىم كوكىرەكبايەۆ بۇل لاۋازىمعا 2013 جىلى جەلتوقسان ايىندا تاعايىندالدى. قىرىمبەك كوشەربايەۆ تا وسى جىلى ۆيسە-پرەمەرلىكتەن قىزىلوردا وبلىسىنا اكىم بولىپ باردى. اماندىق باتالوۆ الماتى وبلىسىنىڭ تىزگىنىن 2014 جىلى ۇستاسا، باۋىرجان بايبەكتىڭ الماتىعا باسشى بولعانىنا دا ەكى جىلدان استى. بۇل قاتارعا اقتوبە وبلىسىنىڭ اكىمى بەردىبەك ساپاربايەۆتى دا قوسۋعا بولادى.
ەلباسىنىڭ قاتىسۋىمەن وتكەن سوڭعى جيىندار مەن ەلدەگى قالىپتاسىپ وتىرعان ساياسي، ەكونوميكالىق احۋالعا قاراپ كادرلىق اۋىس-تۇيىستەر تەك وبلىس اكىمدەرىمەن شەكتەلمەۋى مۇمكىن دەگەن دە بولجام جاساۋعا بولادى. بۇدان بۇرىنىراق Qamshy.kz اقپارات اگەنتتىگى «استانا ەكسپو-2017» باسشىسى احمەتجان ەسىموۆتىڭ پرەمەرلىك كرەسلوعا جايعاسۋى مۇمكىن ەكەنىن جازعان ەدى. ودان بولەك، تاياۋ كۇندەرى ۇكىمەتتىڭ باسقا دا مۇشەلەرى اۋىسىپ جاتسا تاڭ قالىپ كەرەك ەمەس. ماسەلەن، سىرتتان ينۆەستيسيالار تارتۋعا جاۋاپتى ينۆەستيسيالار جانە دامۋ مينيسترلىگىنىڭ جۇمىسىنا قاتىستى وسىعان دەيىن از سىن ايتىلعان جوق. مينيسترلىكتەن بولەك وسى باعىتتاعى جۇمىستارمەن اينالىساتىن ارنايى قۇرىلعانىمەن، ەلگە اعىلىپ جاتقان ينۆەستورلاردى كورە المادىق. بۇل ولقىلىقتار ەلباسىنىڭ جاڭا كادرلىق شەشىمدەر قابىلداۋىنا سەبەپ بولۋى ابدەن مۇمكىن.
