قازاقستان رەسپۋبليكاسى ۇلتتىق ۇلانىندا 2017 جىلعى وقۋ جىلىنان باستاپ جاڭا جوبا، جاڭا پاتريوتتىق ءىس-شارا قولعا الىنىپ وتىر. شارانىڭ اتى - «ەلباسى ساباقتارى» دەپ اتالادى، دەپ حابارلايدى Qamshy.kz اقپارات اگەنتتىگى ق ر ۇلتتىق ۇلانى «وڭتۇستىك» وڭىرلىك قولباسشىلىعىنىڭ باسپا ءسوز قىزمەتىنە سىلتەمە جاساي وتىرىپ.
اتالعان ساباقتار قۇقىقتىق ءتارتىپ اسكەرلەرىنىڭ رەسپۋبليكاداعى بارلىق قۇرىلىمدىق اسكەري بولىمدەرىندە وتكىزىلەتىن بولادى. اسكەرگە رۋح بەرۋشى تاربيەشى وفيسەرلەر وتان كۇزەتىندە جۇرگەن جاۋىنگەرلەرگە، جالپى اسكەري ۇجىمنىڭ ءار مۇشەسىنە قازاقستان رەسپۋبليكاسىنىڭ تۇڭعىش پرەزيدەنتى، ەلباسى نۇرسۇلتان ءابىش ۇلى نازاربايەۆتىڭ ساليقالى ساياساتىنىڭ ارقاسىندا تاۋەلسىزدىك جىلدارى ەلىمىزدىڭ جەتكەن بارشا جەتىستىكتەرى جايلى كەڭ تۇرعىدا ءتۇسىندىرىپ، تاربيە ساعاتى رەتىندە جەتكىزىلەتىن بولادى.
ەلباسى ساباقتارى ءار ءتۇرلى تاقىرىپتاردى قامتىعان. ماسەلەن، «ەلباسىنىڭ وتان جايلى ايتقاندارى»، «ەلباسىنىڭ حالىقتار دوستىعى مەن بىرلىگى جايلى ۇلاعاتتارى»، «ەلباسىنىڭ وتباسى جايلى ايتقاندارى»، «ەلباسىنىڭ ەل تاريحى جايلى ايتقاندارى»، «ەلباسىنىڭ ۇلتتىق قاۋىپسىزدىك جايلى بايلامدارى» جانە تاعى باسقا پرەزيدەنتىمىزدىڭ اسا وزەكتى تولعام-ويلارى جاۋىنگەرلىك ۇجىم مۇشەلەرىنىڭ رۋحىن كوتەرۋ مەن شىڭداۋعا جولباسشى تاربيە وزەگى رەتىندە الىنىپ وتىر.
جالپى العاندا، تاربيەلىك-تانىمدىق ساباقتاردىڭ باستى ماقساتى – وتان قورعاۋشىلاردى ەلدى سۇيۋگە، حالىققا، ەلباسىنا قالتقىسىز قىزمەت ەتۋگە تاربيەلەۋ، اسكەري قىزمەتشىلەردىڭ قوعامدىق-ازاماتتىق ومىرگە بەلسەندى ارالاسۋىنا سەپتەسۋ، تۇلعالار بويىندا شەشەندىك ونەردى دامىتۋ بولىپ تابىلادى.
ەڭ ءبىرىنشى ساباق 2017 جىلى 13 قىركۇيەكتە ۇلتتىق ۇلاننىڭ «وڭتۇستىك» وڭىرلىك قولباسشىلىعىندا تاربيەشى وفيسەرلەرمەن جانە اسكەري قوعامدىق ۇيىمداردىڭ وكىلدەرىمەن وتكىزىلگەن جيىن اياسىندا الماتى قالاسىندا ءوتتى. شىمىلدىق اشار ساباقتى تاقىرىبى: «ەلباسىنىڭ ءتىل تۋرالى جانە ۇلتتىق كود جايلى ايتقاندارى» جايلى بولدى. ساباق بارىسىندا قازاق ءتىلىنىڭ لاتىن الىپبيىنە اۋىسۋ ماسەلەلەرى، ەلىمىزدەگى ۇشتىلدىلىك ساياساتى مەن قازاق ءتىلىنىڭ ۇلتتىق كودى مەن قازاق حالقىنىڭ مادەنيەتىن ساقتاۋداعى ايرىقشا ءرولى تالقىلاندى. سونداي-اق، شارا بارىسىندا ەلباسىنىڭ مەملەكەتتىك ءتىل جانە شەت تىلدەر جايلى ايتقان وي-تولعامدارى باسىلعان بەينە-اۋديو جازبالار تىڭدارمان نازارىنا ۇسىنىلدى.
ساباقتى وتكىزگەن «وڭتۇستىك» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پولكوۆنيك سابىرجان ەسەنتاي ۇلى سۇلەيمەنوۆ: «ەلباسى حالقىمىزدىڭ ارقا سۇيەر الىپ تۇلعاسى، تاۋ تۇعىرى. نۇرسۇلتان ءابىش ۇلى نازاربايەۆتىڭ وسى ۋاقىتقا دەيىنگى اتقارىپ جاتقان تولاعاي ىستەرىنە بارشامىز كۋاگەرمىز. حالقىن شەكسىز ءسۇيىپ، ەلىنىڭ ءبىر قاجەتىنە جاراسام دەپ تىنىم تاپپاي جۇرگەن ءوز ۇلتىنىڭ اسىل پەرزەنتى، ەلباسىمىزدىڭ ارقاسىندا شيرەك عاسىر ۋاقىتىنىڭ ىشىندە ەلىمىز جارقىن دامۋ جولىنان ءوتتى. كەزىندە ارمان بولعان يگى ىستەرىمىز جۇزەگە اسىپ وتىر. قازاق حالقى وزگە ەلدەرمەن تەرەزەسى تەڭ، كەرەگەسى كەڭ تۇرعىدا دامىپ، وركەندەپ كەلەدى. بۇل ەلدىڭ ماڭدايىنا بىتكەن ب ا ق. ەلباسىنىڭ وسى ۋاقىتقا دەيىن ايتىپ كەلە جاتقان وي-تولعامدارى ۇلكەن تاربيەلىك مانگە يە. وزدەرىڭىز بىلەتىندەي، تۇڭعىش پرەزيدەنتىمىز الۋان تاقىرىپتاردا ءار جيىن، كەڭەستەردە، ءوزىنىڭ جازعان كىتاپتارىندا، ماقالالارىندا ۇلكەن كەلەلى ويلار، ەلىمىزدى جارقىن بولاشاققا باستار باعدارلاردى كورسەتىپ كەلەدى. ماسەلەن، ءتىل، شەكارا، ۇلتتىق قاۋىپسىزدىك، يادرولىق قارۋلانۋدىڭ ادامزاتقا قاتەرى، ۇلتارالىق دوستىق، وتان، تۋعان جەر، ۇلت، تاعى دا كوپتەگەن تاقىرىپتاردا ايتقان ويلارى جەكە ازاماتتى دا، الدە ۇجىمداردى دا تاربيەلەۋگە پايدالانىلار تۇنىپ تۇرعان قاينار كوز. قىسقاشا قايىرىپ ايتقاندا، تاربيەنىڭ قاينارى. مىنە، ءبىز وسىنى ەسكەرىپ، ەندىگى كەزەكتە ەلباسىنىڭ سوزدەرىن دايەككە الا وتىرىپ، جەكە قۇرامدى تاربيەلەمەكپىز. ەلباسىنىڭ ايتقان ءار تاقىرىپتاعى ويلارى ءبىر، ءبىر ساعات بولىپ جىكتەلىپ، ماماندارىمىزبەن مۇراعاتتان الىنعان بەينەجازبالارىمەن دايەكتەلىپ، جەكە قۇرامعا ۇسىنىلاتىن بولادى»، - دەپ اتاپ ءوتتى.
