قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ سيفرلاندىرۋ ماسەلەلەرى جونىندەگى رەسپۋبليكالىق كەڭەسكە قاتىستى، دەپ حابارلايدى Qamshy.kz اقپارات اگەنتتىگى.

ەلباسى ءىس-شارا الدىندا ارنايى ازىرلەنگەن كورمەنى ارالاپ كوردى. وندا ءتۇرلى باعىتتار بويىنشا 30-دان استام ءىت-جوبالار قويىلعان.

كەڭەسكە مەملەكەتتىك ورگانداردىڭ، ۇلتتىق كومپانيالاردىڭ جەتەكشىلەرى، پارلامەنت دەپۋتاتتارى، شەتەلدىك ءىرى كاسىپورىندار مەن كومپانيالاردىڭ وكىلدەرى قاتىستى.

باسقوسۋدا پرەمەر-مينيستر باقىتجان ساعىنتايەۆ، اقپاراتتىق-كوممۋنيكاسيالىق تەحنولوگيالار جانە يننوۆاسيالار سالاسىنداعى ساراپشىلار بايانداما جاسادى.

مەملەكەت باسشىسى «سيفرلىق قازاقستان» مەملەكەتتىك باعدارلاماسىن تانىستىرۋ بارىسىندا ايتىلعان مالىمەتتەردى ەسكەرىپ، ەلىمىزدىڭ ەكونوميكاسىن دامىتۋ ءۇشىن سيفرلىق تەحنولوگيالاردى قارقىندى ەنگىزۋدىڭ ماڭىزدىلىعىن اتاپ ءوتتى.

– ءبىز تاۋەلسىزدىك جىلدارى ىشىندە الەمنىڭ باسەكەگە قابىلەتتى 50 ەلىنىڭ قاتارىنا قوسىلدىق. ءقازىر وزىق دامىعان 30 ەلدىڭ قاتارىنا ەنۋ مىندەتى تۇر. ول قازاقستاننان جاڭا يننوۆاسيالىق دامۋدى جانە جەدەل تەحنولوگيالىق جاڭعىرۋدى تالاپ ەتەدى. سوندىقتان مەن وسى جىلدىڭ باسىندا قازاقستان حالقىنا ارناعان جولداۋىمدا ءۇشىنشى جاڭعىرۋ جونىندە جاريالادىم. ونىڭ نەگىزى سيفرلاندىرۋ بولىپ تابىلادى، – دەدى قازاقستان پرەزيدەنتى.

ەلباسى سيفرلاندىرۋ كاسىپورىندار مەن جالپى ەلىمىزدىڭ باسەكەگە قابىلەتتىگىن، سونداي-اق حالىقتىڭ ءومىر ءسۇرۋ ساپاسىن ارتتىرۋ ءۇشىن قاجەت ەكەنىن ايتتى.

مەملەكەت باسشىسى وكىلەتتى ورگاندار مەن كاسىپورىندار تاراپىنان ەرەكشە ءمان بەرۋدى قاجەت ەتەتىن سيفرلاندىرۋدىڭ جەكەلەگەن باعىتتارىنا توقتالدى.

– مەملەكەتتىڭ، جەكە كاسىپورىندار مەن ۇيىمداردىڭ ءوزارا ءىس-قيمىلىن جولعا قويۋ ماڭىزدى. بيزنەسكە سيفرلىق تەحنولوگيالاردى كەڭ اۋقىمدا ەنگىزۋى ءۇشىن جاعداي جاساۋ كەرەك، – دەدى قازاقستان پرەزيدەنتى.

سونىمەن قاتار، ەلباسى بىلىكتىلىگى جوعارى مامانداردى دايارلاۋدىڭ ماڭىزدىلىعىنا توقتالىپ، ءبىلىم بەرۋ سالاسىنداعى ساياساتتى قايتا قاراۋ قاجەتتىگىن اتاپ ءوتتى.

بۇدان بولەك، مەملەكەت باسشىسى عىلىمي-زەرتتەۋ ينستيتۋتتارى مەن جوعارى وقۋ ورىندارىنىڭ بازاسىندا، سونداي-اق يننوۆاسيالىق كلاستەرلەر اياسىندا قۇزىرەتتىلىك ورتالىقتارىن دامىتۋ ماسەلەلەرىنە نازار اۋداردى.

قازاقستان پرەزيدەنتى ءىت-ستارتاپتار حالىقارالىق تەحنوپاركىنىڭ جاڭا تەحنولوگيالاردى ازىرلەۋ مەن ولاردى ەنگىزۋ ماسەلەسىندە باستى ءرول اتقاراتىنىن ايتتى.

– ەلىمىزدىڭ قارجى سەكتورى وزىق تەحنولوگيالاردى مەيلىنشە سەزىنەتىن سالا بولعاندىقتان، سيفرلاندىرۋعا قاتىستى شەشىمدەردى كەڭىنەن قولدانا باستادى. ول الداعى ۋاقىتتا دا وسى ۇدەرىستىڭ باسىندا بولۋى كەرەك. «استانا» حالىقارالىق قارجى ورتالىعىنىڭ الدىندا جاڭا قارجىلىق تەحنولوگيالار مەن قۇرالداردى دامىتۋ مىندەتى تۇر، – دەدى ەلباسى.

نۇرسۇلتان نازاربايەۆ بەلگىلەنگەن مىندەتتەردى شەشىپ، عىلىمي زەرتتەۋلەر مەن ازىرلەمەلەردى ىنتالاندىرۋ ءۇشىن نورماتيۆتىك قۇقىقتىق بازانى جەتىلدىرۋدى تاپسىردى.

سوڭىندا مەملەكەت باسشىسى بولاشاقتاعى جاھاندىق سىن-تەگەۋرىندەر مەن تەحنولوگيالىق ترەندتەردى زەرتتەۋ قاجەتتىگىن اتاپ ءوتتى.

– بۇگىن ايتىلعان ماسەلەلەردىڭ بارلىعى ەلىمىزدىڭ ءۇشىنشى جاڭعىرۋى اياسىنداعى ماڭىزدى مىندەتتەر سانالادى. ۇكىمەت ولاردى مەملەكەتتىك باعدارلامادا ەسكەرۋى قاجەت. سونداي-اق، ورتاق ماسەلەلەردى شەشۋ ءۇشىن ەۋرازيالىق ەكونوميكالىق كوميسسيا اياسىندا ارناۋلى كوميسسيا قۇرۋ كەرەك. سونىمەن قاتار، باعدارلامانى جەتىلدىرە ءتۇسۋ ءۇشىن پرەزيدەنت جانىنان كوميسسيا قۇرۋدى تاپسىرامىن، – دەپ تۇيىندەدى قازاقستان پرەزيدەنتى.